الجمعة، 3 أبريل، 2009

التتار من ظلام الهمجية الى نور الاسلام ( و بدأ الزحف)

اهلا بيكم من جديد فى رحلتنا مع التتار الشعب اللى روع العالم و اقض مجضع الملوك فى ذلك العصر
تفاعل الاصدقاء معايا خلانى متحمس جدا لاكمال الحديث عنهم

و انا بكتب افتكرت قصة الكاتب الكبير على احمد باكثير واإسلاماه اللى درسناها فى الثانوى لما كان التتار بيجتاحوا المدن و يستخدم تعبير و اعملوا فى اهلها السيف ، بحس لما اقراه قد ايه كان تصرفاتهم الهمجية امر روتينى بيقوموا بيه زى اى جزار محترف

و طريقة التتار بتفكرنى ببعض الاحداث اللى بتدور حوالينا فى المسرح السياسي الدولى و رغم عدم ايمانى التام بمقولة ان التاريخ بيعيد نفسه لكن لما السياسة بتتبنى على القوة و تكون فى ايد ظالم مبيكونش ليها غير توجه واحد مهما اختلفت المسميات التتار - امريكا و مين بعدهم مش عارفين

احنا دلوقتى واقفين مع جنكيز خان فى خيمته بيبص لحدود دولته وصلت لفين من الشرق و الجنوب بيحاوطه المحيط و الشمال مفيهوش غير خطر مجهول مدفون فى قلب ثلوج سيبيريا فكان الحل الوحيد قدام طموحه اللامحدود انه يبص للغرب ، للدولة الخوارزمية الباب اللى حيمهدله اجتياح قلب الخلافة الاسلامية ، الدولة الخوارزمية وقتها كانت اشبه بإمبراطورية صغيرة بتضم العديد من دول آسيا اشهرها باكستان و افغانستان و بتمتد حتى داخل ايران وده بالنسبة لجنكيز خان اشبه بالوليمة الشهية اللى ريحتها بتخلى اى مقاومة قدامها تنهار فكان من السهل عليه تجاهل اى شئ يتعلق بالمعاهدات اللى ابرمها مع الملك ( محمد بن خوارزم شاه ) بشأن احترام الحدود و الجوار و عدم الاعتداء على السيادة و انتم عارفين الباقى

و بدأ زحف الجراد التتارى على الدولة الخوارزمية و كانت اولى المعارك فى عام 616هـ/ 1219م عند نهر اسمه سيحون و استمرت اربع ايام و اسفرت عن 20 الف شهيد و و اكتر من 40 الف جرادة - اقصد تتارى - و لما لقى محمد بن خوارزم الكفتين غير متساويتين و انه مش حيقدر يواجه الاعداد الهايلة اللى بتواجهه انتهز اول فرصة تهدى فيها المعركة و انسحب بالجيش عشان يأمن العاصمة اورجندة و المدن الكبرى و اعداد الجيش من جديد لكنه فى انشغاله بتأمين عائلته و المقربين له اهمل فى تأمين الجزء الشرقى من مملكته بالإضافة لشعبه اللى ضحى بيه عشان ينقذ كنوز اهل قصره و محدش يقوللى التاريخ بيعيد نفسه

فى الوقت ده جنكيز خان كان جهز جيشه و انتهى من اقليم كازاخستان و حاصر مدينة بخارى اللى استسلم اهلها و طلبوا منه الامان و اعطاه ليهم لكن دخوله كان نكبة على مدينة بخارى و مطمنش فيها و لا ارتاح غير بعد ما قتل كل المحاربين و دمرها و نكل بأهلها و اغتصب نسائها امام اعين ذويهم و اهاليهم فى مشهد يبعث القشعريرة فى الاجساد و دى كانت بداية زحف التتار على العالم الاسلامى

فى الجزء القادم حنستكمل بقية المواجهة بين جنكيز خان و الملك الهارب محمد بن خوارزم شاه

هناك 12 تعليقًا:

احمد سعيد يقول...

الله ينور عليك

او عليكى


بجد كان نفسى من زمان فى مدونه تاريخيه جميله زى دى

انا اعشق التاريخ صراحه

بس اقولك على حاجه

هو اقتراح يعنى

عايزين نغير المعالجه النصيه للتاريخ

لان اسلوب السرد التاريخى مش هينفع فى المدونه

يعنى مواضيع مذكورة فى تلال من الكتب

مش هنقدر نعرضها فى بوست الا اذا اختصرنا كتييييييييييير

وبكدة هيبقى فيه اخلال بالموضوع

لانك مش هتقدم جديد

بل بالعكس

الرجوع للكتب هيقدم اكتر


ممكن نغير اسلوب المعالجه

مش عارف ازاى لانى نفسى فشلت فى الموضوع دة الى الان

نجحت فى استيعابه

بس فشلت فى التطبيق

بس انا فاكر لما قريت التاريخ من مصادرة الاصليه

زى عجائب الاثار للجبرتى

والسلوك للمقريزى

وبدائع الزهور لابن اياس

لاحظت بطعم تانى ونكهه الذ بكتير عن قرايه المعالجات السرديه اياها اللى احنا متعودين عليها...

طبعا لاداعى لذكر المعالجات الدراسيه اياها بتاع اسباب الحمله الفرنسيه

العقم التعليمى اياه اللى كرة الناس فى التاريخ


ايه رايك مثلا

ان الحدث يتعرض من وجهه نظر الاتجاهات المشاركه فيه

يعنى مثلا نحكى على بك من خلال رؤيته للاحداث
وبعدين نفس الموضوع من رؤيه محمد بك ابو الدهب

او ممكن نخلى الاسلوب ادبى شويه بدل شغل السرد اللى اتعودنا عليه

او ممكن نركز على فترات اشبه بالثقوب السوداء فى تاريخنا واللى نادر لما حد بيتكلم عنها

مصر ايام الفاطميين مثلا

بعد الفتح العثمانى

عقب الاحتلال البريطانى ونفى عرابى

وممكن تعالج التاريخ من منظور اجتماعى

بدلا من المنظور السياسى

ودة اتجاة منتشر من فترة فى اوساط الباحثين المصريين

والتحفير فى دار الوثائق شغال على ودنه

فى عقود الزواج والحجج الملكيه والاوقاف

يعنى بيحلل المواطن

عايش ازاى بيفكر ازاى

زى كتب ادوارد لين كدة لما اتكلم عن مصر هو واخته

ايه رايك ؟؟؟؟؟؟

emadiab يقول...

معاك اخوك عماد شريك كيارا فى المدونة

اقتراحاتك على العين و الراس يا ابو سعيد و محل دراسة و لو واخد بالك احنا هنا منفتحين على حضارات العالم كله و بنعالج مختلف نواحيها و التاريخ عندنا مش بس حروب ده انا ناوى اتكلم عن حضارات و تاريخ شعوب منعرفهاش و ناوى احلل احداث تاريخية معينة و حنعمل دراسات و مناقشات متعلقة بحدث تاريخى و تأثيره على الحياة حنتكلم عن التاريخ نفسه وندرسه ازاى و ليه الناس بتنفر منه رغم انه مهم

و متنساش اننا بس بنحاول نبسط التاريخ للناس اللى مبتفراش و شوية شوية حطور اسلوبى لدرجة انى حعيشك جو الافلام

احمد سعيد يقول...

عماد باشا

الله ينور عليك يا زعيم

يعنى هتحود على التاريخ الاروبى مثلا

واستفوجأ بيك عامل بوست عن الملك جون ولا كرومويل مثلا ؟؟؟؟؟

ميت فل وعشرة


الله ينور

ولو فيه اى حاجه اقدر اقدمها قولى

اتفقنا ؟؟؟

كيــــــــــــارا يقول...

ايوه ايوه فكرني بسنة تانيه وتالته جامعه

ميه ميه ياعماد انت مكسب للمدونه بس ابقي اعمل مده بين البوست والبوست يعني كل بوست يقعد 3 ايام مثلا

***********

احمد سعيد لو تحب تكون معانا قولي اميلك وابعتلك دعوه

احمد سعيد يقول...

cocolcan@yahoo.com

emadiab يقول...

مين بقى يا سى احمد الملوك اللى بتحكى عنهم دول انا اخرى نابليون و ريتشارد كلب الاسد و مارى انطوانيت

كلامك زعلنى قوى شكلك مفريتش المدونة كويس
كيارا عاملة بوست حلو عن التاريخ الاوروبى فى العصور الوسطى ابقى اقراه و انا ان شاء الله حخلص موضوع التتار و بعدها ححود شوية على الشرق و شوية على الغرب و لو عاوز تشارك معانا اسأل كيارا هى صاحبة المدونة و اللى دعتنى للمشاركة بس انت شكلك جامد و بتحب التاريخ موت

احمد سعيد يقول...

لا طبعا يا معلم انا مفريتش المدونه كلها للاسف

شكلكوا هتخلونى انكش فى المكتبه من تانى

بس الاول يا جماعه عايزين ننظم الامور ما بينا

ايه النظام يعنى وهنمشى ازاى

التفاصيل دى

يعنى معتقدش انه هيبقى كويس اننا كل واحد بشتغل مع نفسه ويكتب اللى ييجى على دماغه

مش كدة برضه

ياريت يا جماعه نحاول نتناقش على الماسنجر مثلا

دا لو مكانش يضايقكم

بدل ماكتب الكلمه استنى الرد تانى يوم

لو كدة اتفقوا على ميعاد نتناقش فيه

كيــــــــــــارا يقول...

اممممممم طيب بصوا

ايه رايكم نتقابل علي الماسنجر الساعه 11 بس عاوزين ياهو ولا هوتميل ؟؟؟

احمد سعيد يقول...

حداشر بالليل ؟؟؟

تمام ماشى

بس انا ماعنديش اكاونت على الهوتميل

ياريت لو ياهو يكون احسن

emadiab يقول...

انا موافق يا جماعة و ده الياهوو بتاعى
emad03d@yahoo.com
متتأخروش عن 11 عشان نلحق نتكلم شوية قبل ما انام

نهر الحب يقول...

البوست هايل وفكرته جميلة جدا وجديدة.


تحياتى:
نهر الحب

فوبيا - سايكولاند يقول...

التتارى كان يوقف المسلم يقوله هروح اجيب السيف واجى اقتلك اوعا تتحرك ويروح ويرجع والمسلم لسه ما اتحركش
مع ان المسلمين ماكانوش ضعاف زى دلوقتى
تتار دلوقتى بيجروا قدام المسلمين الضعاف جدا دلوقتى فما بالك لو بقى المسلمين مسلمين بجد هنعمل ايه فى الظلمه