الجمعة، 24 أكتوبر 2008

الادب

اولا بعتذر عن تاخري في البوست ده 

ثانيا اديني هنزل الادب  اهوووو
زي ما انتوا طلبتوا مني في البوست الاخير 
عشان محدش يقول انهم مش كانو مؤدبين 

بس الاول احب اقول ان  مهما توصلنا من نتاج ادبي للقدماء المصرين 
فهو يعتبر قليل جدا رغم انه اللي اكتشف كثير 
كاي نتاج ادبي في اي عصر لازم نلاقي فيه القيم واللي مش له قيمه 

وده مبدا اكيد متفقين عليه 

يالهووووووي عليا رغايه 

انا هدخل في الموضوع اهو

الاول كاي ادب لازم عشان افهمه اكون اعرف لغته ومش مجرد معرفه
وبس لا
لازم اكون جيده جدا فيها 
اولا عشان اقدر اترجم صح 

ثانيا ودي الاهم عشان احس بروح الكاتب وباللي كاتبه 
مش يبقي الكلام بارد وهش ومن غير احساس
وده نفسي اوصله بس انا متوقفه عن مذاكره الهيروغليفي  بقالي فتره 

*******

سمات الادب المصري القديم 

- يتميز بضخامه تاثيره الديني شانه شان كل الاداب القديمة 

- تكرار في الاهداف بهدف ترسيخ المعني الذي كان يهدف اليه اصحابه 

عدم وجود التخصص في غرض القطعه الادبيه الواحده 

- الكثير من ادبنا الشعبي الحديث يرجع في اصله الي الادب المصري القديم
وكثيرا مانجد ان التشابه شديد بين قصصنا الشعبي الحديث وبين القصص في الدوله الوسطي 

يعني مثلا قصة الملاح الغريق تشبه احدي قصص السندباد البحري 



******

قصة الملاح الغريق 


كان في ملاح راحل في بعثه تجاريه فكسر قاربه وتعلق بقطعه من الخشب ووصل الي جزيره خاليه من السكان فيما عدا حية ضخمه حملته الي المكان الذي كانت تعيش فيه وقد جاء في القصه ان هذه الحيه كانت الهه الجزيره وقد اخبرته بانها هي الاخري قد نجت وحدها من شهاب سقط علي الجزيره فاحرق كل اقاربها واخواتها ويسترسل في قصته فيذكر انه عاش لفتره علي هذه الجزيره الي ان جاء قارب حمله الي مصر وهو محمل بهدايا كثيره من الجزيره وبعد ان صعد الي القارب الذي اخذه الي مصر فؤجي باختفاء الجزيره 


********

وبرده في  قصص بتعبر عن سؤ الحاله السياسيه او حدوث بعض الاحداث التاريخيه الهامه  مثل قصه الفلاح الفصيح ودي كانت بتقول ان بعض الحكام مستبدين وطغاه 

بس الملاحظ ان الامراء والملك كانو بيحبو اوي الادب الجيد وتعمدوا اهمال هذا الفلاح كي يكثر من شكواه ويستمعوا الي كلامه الجيد لكن في الاخر الملك رد له حقه 

 ********

وعندنا مثلا قصه سنوهي اللي بتوضح انه فر من مصر بس مش وضحت القصه السبب ومن السياق اللي في القصه نلاحظ انه كان عنصر مناؤي لسنوسرت الاول حينما كان وليا للعهد فلما تولي الحكم خشي سنوهي علي نفسه وفر الي فلسطين ويبين ذلك مقدار ماكان يحدث في البلاط من مؤمرات ودسائس 
وكمان نستشف من كرم  بدو فلسطين لسنوهي بيدل علي ان البدو كانوا يكنون الاحترام للمصرين ولحضارتهم

*******
مثلا قصة خوفو الساحر ظهر فيها الخيال بشكل واضح الا انها تعكس صورة من احداث التاريخ في العصور القديمة 

فهي تشير الي ان ملوكا من سلاله رع سيعتلون العرش بعد ان يحكم خوفو وولده وحفيده وهذه القصه تدل علي ان الملك قد انتقل من الاسرة الرابعه الي ملوك الاسرة الخامسه الذين كانو ينتمون الي اصل غير ملكي 

******
مثلا قصه الامير ذو المصير المحتوم 

تحكي ان ملكا لا ينجب ابناء فطلب من الالهه ان تمنحه ولدا فاستجاب لدعائه ولكن كان مقدرا لهذا الامير ان يموت بلدغة ثعبان او يفترسه تمساح او كلب وتوضح كيف نجا الامير من التمساح

وعااااااااااااااااااااااااااااا 

القصه هنا مش اكتملت عشان البرديه كانت تالفه وكان نفسي اعرف الباقي بقي 

عاااااااااااااااااا

*******

ولم يتناول الادب المصري القصص والاساطير بس لا احنا كمان هنلاقيه متنوع 

هنلاقي النقد مثل تاملات ايبوور وفيه الحكم مثل نصائح بتاح وحوتب وكاجمني وآني وامنموبي وفيه الاغاني والاناشيد الدينيه وغير الدينيه واناشيد النصر والملاحم لتحوتمس التالت وسنوسرت التالت ورمسيس التاني ومرنبتاح 

واغاني الشراب والغزل وغير ذلك .

********

بعتذر عن ان اسلوبي مش زي اما اتعودتو ويمكن ده لاني نفسيا مش مظبوطه 
حاولت ادخل روح خفيفه عشان الكلام يتقبل بس انا عارفه اني فشلت

البوست الجاي هتكلم عن العلوم الرياضيه والهندسيه

هناك 59 تعليقًا:

romansy يقول...

ايوه كده يا كيارا
عودى يا هاميس
مبروك عودتك للمدونه وانك فكرتى من منظور تانى
انك تبينى لينا التخصات فى العهد القديم
حلو القصص بس لو كانت كامله تبقى احسن بكتير
انا قريت قصه الملاح الغريق اجمل حاجه فيها خيالها
برافوا عليكى
ومستنين البوست الجالى

صبرني يارب يقول...

لا بصي يا كيارا هانخسر بعض

انا عايزه القصص دي بالتفاصيل انا باحبها اوي

وبعدين قصة سنوهي بالذااااات عايزاها انشاله تبعتيهالي على الاميل

عشان فى كرتون بيجى اسمه سنوهي ده

وكنت باقول لرضا مره وانا باتفرج عليه مع العيال بتهيئلي كده والله اعلم ان الاسامي الى بيقولوها دي بصحيح كده
وبعص المعلومات طبعا شكلها برضه صحيح
عارفاه ؟؟

سنووووحي وحابي وتيتي شيري
اصل انا باحب الاغنيه اوي
ههههههههههههههههه

وطبعا ولادي بيسألوا اسأله بقى عجيبه عن الشخصيات بتاعتهم وانا ابيض بقى

انا عايزه القصص مااااليش دعوه

وبعدين يا جميل انتي دمك زي العسل على طول ما تقلقيش احنا هانبلعك عادي انشاله بشوية ميه
ههههههههههههههههه
بس ربنا يشيل عنك يارب كل حاجه وحشه ومضايقاكي

سارة نجاتى يقول...

لا طبعا مفشلتيش أسلوبك بسيط و لذيذ أوى بالنسبة لحجم الموضوع اللى بتتكلمى فيه , لكن هل استمدت قصص السندباد و الحاجات دى من أدب مصر القديمة ؟ , أم لأن التيمة نفسها أنتجها كل شعب باعتبار أنها قد تكون نتيجة طبيعية لظروف مشتركة ؟


تحياتى ليكى

Butterfly يقول...

مع انى طول عمرى بكره التاريخ
بس بحب الأثار والقصص والأساطير
أنا استمتعت جدا بجد
شكرا

مهندس مصري بيحب مصر يقول...

انا متابعك لحد اما تروقي
:)
اما نشوف حتقولي ايه عن الهندسة البوست الجاي

كـــيــــــــارا يقول...

رومنسي


عودي ياهاميس

عودي الي اخيكي اتون


يالهوي قلبناها عروسة النيل

لو كامله مكنش حد قري البوست هيبقي طوووويل اوي

نورتيني يارومنسي باول تعليق

كـــيــــــــارا يقول...

قصه سنوهي عشان احلي صب صب

--------


قصـــة سنوهي

يمكن تفسير اسم "سنوهي"(سا نهت) بمعنى "أبن الجميزة" أو "ربيب الشجرة" ( بمعنى ربيب الطريق أو اللقيط) و لكنا نستبعد ذلك حينما نجد من ينسبه إلى الأسرة المالكة أو ربما كان أحد رجال البلاط الملكي فهذا غير واضح.............

كانت هذه القصة من أحب القصص إلى نفس المصري القديم, وتعود إلى عصر الأسرة الثانية عشرة, فقد عاش سنوهي أيام الملكين " أمنمحات الأول" و ابنه "سنوسرت الأول", و هي مثال طيب للأدب المصري القديم,و تمثل رقي القصة المصرية بالفعل, وقد نالت أعجاب الباحثين من حيث الكلمة والأسلوب, و تشير أحداثها إلى الصراع على العرش حيث تعرض الملك "أمنمحات" إلى مؤامرة الاغتيال, ثم إبلاغ "سنوسرت" على حدود مصر الغربية بالنبأ, ثم فرار "سنوهي" و مغامراته في مناطق شمال شرق مصر, و ذهابه إلى الأمير "ننش بن عامو" أمير "رتنو" العليا ثم اشتعال رأسه شيبا و لوعته إلى مصر و ترحيب الفرعون بعودته ليعيش ثم يدفن على أرض مصر

وتقول القصة:

الأمير الوراثي, و مدير ضياع الملك في بلاد الأسيويين, و السمير الوحيد للملك, و المحبب إليه "سنوهيت" يقول: كنت خادما يتبع سيده, و خادم نساء الملك يخدم الأميرة, زوجة "سنوسرت" و الابنة الملكية "لأمنمحات" أنه في الثلاثين, في اليوم التاسع من الشهر الثالث من فصل الفيضان طار الملك "أمنمحات" إلى السماء و اتحد مع قرص الشمس و امتزج جسم بجسم خالقه (أي مات) و عندئذ صمت القصر و امتلأت القلوب حزنا, و أغلق البابان العظيمان, و جلس رجال القصر و رءوسهم على ركابهم, و حزن القوم

كان قد أرسل جلالته جيشا إلى أرض "التمحو" و كان بكر أولاده "سنوسرت" ضابطا فيه, و قد كان في هذه الأثناء عائدا بعد أن استولى على أسرى من "التحنو" و كل أنواع الماشية التي يخطئها العدد, وأرسل أمناء القصر إلى حدود غرب الدلتا ليخبروا بن الملك بالحادث الذي وقع في البلاط, وقد قابله الرسل في الطريق و لحقوا به عند الغروب, فلم يتأخر إذ طار الصقر مع خادمه, و لم يعلم بذلك الجيش , ورغم ذلك فقد أرسلت إلى أولاد الملك الذين كانوا معه في الجيش

عندئذ كان قلبي يحترق, و خارت ذراعاي, و استولت الرعدة على جميع أعضائي, فقفزت باحثا عن مكان أختبئ فيه, ثم سرت نحو الجنوب, و لم يكن غرضي الوصول إلى مقر الملك, لأني فكرت أن الشجار قد يقوم هناك, و لم يكن يهمني أن أعيش بعده و عبرت ماء "موتي" القريب مني و وصلت على جزيرة "سنفرو", و مكثت هناك في الحقول المكشوفة, ثم أخذت في السير مبكرا, و عندما طلع النهار, وقابلت رجلا اعترضني في طريقي, و قد أظهر الرعب مني وخاف ولما جاء وقت العشاء كنت قد اقتربت من بلدة "جو" و مررت على الشرق من المحجر الذي في إقليم "سيدة الجبل الأحمر", ثم أسلمت الطريق إلى قدمي متجها نحو الشمال و وصلت "جدار الأمير" و قد أخبأت نفسي خوفا من أن يراني الحارس الذي كان رابضا فوق الجدار ليل نهار, و قد استأنفت السير ليلا, و لما طلع فجر النهار وصلت إلى "بتن" و وقفت عند جزيرة "كم ور" و هنا أغمى علي حتى سقط من الظمأ, وقلت: هذا هو طعم الموت, و لكني رفعت قلبي و جمعت أعضائي لأني سمعت صوت الماشية, و رأيت بدوا و قد عرفني الشيخ الذي كان بينهم و قد كان فيما مضي في مصر فقدم إلى ماء, كما كان يعطيني لبنا, و ذهبت معه إلى قبيلته, و قد عاملوني بشفقة ثم أسلمتني أرض إلى ارض, ثم استأنفت السير إلى "جبيل" و تابعت السير إلى "قدمى" و قضيت هناك نصف عام, ثم أخذني "ننشي" بن "عامو" أمير "رتنو العليا" و قال لي: إن حالك سيكون معي حسنا, لأنك هنا تسمع كلام مصر, و قال لي هذا لأنه عرف صفاتي و سمع بحكمتي, وقد شهد لي المصريين الذين كانوا معه هناك

قال لي: لماذا أتيت إلى هنا؟ هل حدث شئ في مقر الملك؟ فقلت له: إن الملك "سحتب إيب رع" قد ذهب إلى الأفق و لا يعرف احد ماذا تم في هذا الأمر, و قلت ثانيا: إني أتيت من حملة أرض "التمحو" و قد عرفت الخبر فارتعدت فرائصي فلم يعد قلبي يستقر في جسمي, و لا أعرف ماذا أتى بي إلى هذه الأرض, فكأنه القدر و عندئذ قال لي: و كيف يكون حال تلك البلاد من بعده, ذلك الإله المحسن, الذي كان مهابا في كل الأراضي مثل "سخمت" , ولكني قلت له مجيبا إياه: في الحق أن ابنه قد دخل القصر و أخذ إرث أبيه, و هو الإله المنقطع القرين الذي لا يفوقه أحد, و هو الذي أخضع الأراضي الأجنبية ثم يقوم سنوهي بوصف الملك "سنوسرت" , ثم قال لي: حقا أن مصر سعيدة لأنها تعرف أنه يفلح في حكمه و لكن تأمل! إنك هنا و ستسكن معي

لقد جعلني على رأس أولاده, و زوجني من كبرى بناته, وقد جعلني اختار لنفسي من بلاده أحسن ما في حيازته على حدوده إلى بلاد أخرى, و لقد كانت أرضا جميلة تسمى "ياء" و كان فيها التين و الكروم, ونبيذها أكثر من مائها, وكان فيها الشعير و القمح و كذلك كان نصيبي عظيما بسبب ما نلت من الحب و قد نصبني حاكم قبيلة من أحسن قبائل بلاده, وقد كان يضع لي الخبز

قضيت سنين عدة, و نما أولادي, وأصبحوا رجالا أشداء كل يحكم قبيلته كان الرسول الذي يأتي من قبل الملك شمالا أو جنوبا ينزل عندي, و قد أعطيت ماء للظمآن, وهديت على الطريق من كان ضالا, ولما أخذ البدو يخرجون عن الطاعة و يقاومون رؤساء الصحاري كبحت جماحهم و ذلا لان أمير فلسطين قد جعلني عدة أعوام رئيس جيشه, و كل بلد سرت إليها نهبت ماشيتها و أسرت أهلها, وحملت طعامهم وذبحت القوم فيها بساعدي القوي, وقد جعلني على رأس أولاده عندما شاهد كيف تتفوق يداي, وقد جاء رجل قوي من فلسطين ليبارزني في معسكري و قد كان بطلا منقطع النظير أخضع كل فلسطين, وقد أقسم أن يحاربني, وقد دبر سرقتي, وتأمر على أن يأخذ ماشيتي, وفي وقت الليل شددت قوسي, و أعددت سهام, و صقلت أسلحتي, و عند الفجر كانت فلسطين قد جاءت, إذ أنها أثارت قبائلها و حشدت نصف ممالكها و هيأت هذا النزال, و قد برز إلى المكان الذي كنت أقف فيه و قد وقفت بالقرب منه, و كان كل قلب يحترق من أجلي, و قالوا هل هناك رجل أخر شديد يستطيع منازلته؟( و هذا يوضح شيخوخة "سنوهي")

سقط درعه وفأسه عندما تفاديت سلاحه و جعلت سهمه يمر بي طائشا0 و لما اقترب كل منا من الأخر هاجمني, وأرسلت سهمي عليه فلصق بعنقه, فصاح و سقط على أنفه, و ألقيته أرضا بفأسه, و صحت صيحة النصر, وصاح كل أسيوي, و قدمت الثناء "مونتو" قربانا و حزن له أتباعه, أما الأمير "ننشي" بن "عامو" فضمني إلى صدره

أخذت بعد ذلك متاعه و استوليت على كل ما في خيمته, ونهبت معسكره و قد أصبحت عظيما بهذا واسعا في ثروتي, ولقد فعل الإله ذلك رحمة بفرد غضب عليه وجعله يفر إلى أرض أخرى واليوم أصبح قلبه فرحا ثانية

أنت يأيها الإله, الذي أمرت بهذا الهرب, كن رحيما و أعدني ثانية إلى مقر الملك, وربما تسمح لي أن أرى المكان الذي يسكن فيه قلبي, و الأمر الذي هو أهم من ذلك أن تدفن جثتي في الأرض التي ولدت فيها0تعال لمساعدتي, و لقد وقع حادث سعيد, لقد جعلت الإله يرحمني, و ليته يرحمني ثانية حتى تحسن خاتمة من قد عذبه, و إذا كان رحيما بي اليوم فليته يصغى إلى دعواتي آه ليت ملك مصر يرحمني حتى أحيا برحمته, وليتني أسال سيدة الأرض التي في قصره عن إرادتها, وليتني أسمع أوامر أولادها آه ليت جسمي يعود إلى السباب ثانية لأن كبر السن قد نزل بي, و استولى على الضعف, وقلبي متعب و الموت يقترب مني, حينما سأحمل إلى مدن الأبدية دعني أخدم سيدتي الملكة, وليتها تتحدث إلى عن جمال أطفالها

تأتي الخاتمة وهي بسيطة تلائم أذواقنا, فقد جعل "سنوهي" ابنه الأكبر وريثا لمقاطعته, و اتجه نحو الجنوب حيث قابله رسول ملك مصر عند "إيا" و لما بلغ الحدود المصرية وجد في انتظاره سفينة مجهزة تجهيز كامل, وفي الصباح التالي بلغ العاصمة وقاده رجال البلاط إلى داخل القصر و وجدت صاحب الجلالة جالسا على عرشه , وخدرت أعضائي و فارقني قلبي, حتى لم أعد أميز بين الحياة والموت و تحدث إلى الملك بلطف وعفا عني و جهزت لي دار فخمة و كانت تجلب لي الأطعمة من القصر ثم شيد لي عمال الملك مقبرة و يختتم "سنوهي" قصته قائلا: و هكذا فزت بعطايا الملك حتى يوم الفراق.

أحــوال الهـوي يقول...

في مواضع المحتاجة الرغي بتبقي بخيلة جدا انت ذكرت و مضه عن القصة و كأن كل الناس عارفاها ياريت ترغي شوية عن ابعاد القصة بحيث يتبين لنا مدي مهارة و قدرة المصري القديم علي السرد و بناء الاساطير

تحياتي

كـــيــــــــارا يقول...

صب صب حبيبتي

انا بموووووت في الكارتون اصلا

-------

وبعدين يا جميل انتي دمك زي العسل على طول ما تقلقيش احنا هانبلعك عادي انشاله بشوية ميه
ههههههههههههههههه

-------

ههههههههههههههههههههههه ومعاهم شويه عسل
--
بس ربنا يشيل عنك يارب كل حاجه وحشه ومضايقاكي

---------

ياااااااااارب

كـــيــــــــارا يقول...

سارة نجاتى
لا طبعا مفشلتيش أسلوبك بسيط و لذيذ أوى بالنسبة لحجم الموضوع اللى بتتكلمى فيه ,

------


ربنا يخليكي بس لو قريتي لبوستات السابقه هتعرفي اني فشلت فشل ذريع

--------


لكن هل استمدت قصص السندباد و الحاجات دى من أدب مصر القديمة ؟ , أم لأن التيمة نفسها أنتجها كل شعب باعتبار أنها قد تكون نتيجة طبيعية لظروف مشتركة ؟

-------

بصي هو انا مش عارفه هما استمدوها ولا لا بس اللي اعرفه كمثال قلته في البوست اللي قبل كده ان في حاجات معينه بتتكرر بتكرار العصور

بس بيتضاف رتوش وهي تطور العصر وده اللي بيعمل الخلاف

يعني لو قسنا ده بالزراعه هتلاقي الطريقه واحده وبصي في االاجزاء اللي فاتت وهتتاكدي من كلامي

نورتيني ياساره

كـــيــــــــارا يقول...

Butterfly

مع انى طول عمرى بكره التاريخ
بس بحب الأثار والقصص والأساطير
أنا استمتعت جدا بجد

*---------

تؤتؤتؤتؤ مش عندنا حد يكره التاريخ

والحمد لله انك استمتعي بيها :)

كـــيــــــــارا يقول...

مهندس مصري

انا متابعك لحد اما تروقي
:)
اما نشوف حتقولي ايه عن الهندسة البوست الجاي

------------


ايوه ايوه علي الناس اللي عاوزه اللي يخصها

ماشي ماشي

بقي كداااااااا

لا ممكن ابدااا

مش هنزل بقي هه بس

كـــيــــــــارا يقول...

a7wal el Hawa


في مواضع المحتاجة الرغي بتبقي بخيلة جدا

------

ههههههههههههههه ياحيني
-----
انت ذكرت و مضه عن القصة و كأن كل الناس عارفاها ياريت ترغي شوية عن ابعاد القصة بحيث يتبين لنا مدي مهارة و قدرة المصري القديم علي السرد و بناء الاساطير

---------

طيب قصه سنوهي انا عرضتها في الكومنتات :)

الازهرى يقول...

الجميلة كيارا

عودا حميدا
الادب المصري القديم له باع رائع فىروايته
ويكفى قصة الفلح الفصيح كى نعرف انهم وصلو الى الكثير من الرقى فى الادب

وبالمناسبة نهاية قصة الامير ذو المصير المحتوم عندى فى المكتبة وسأحاول البحثعنها وعندما اجدها سأحاول ارسالها

تحياتى

باجوجو يقول...

كيارا
أخيرا هتكملى مشوارك فى التاريخ

أنا بصراحة كنت فقدت الامل

بس قلت يا واد أدخل لو ملقتش جديد

إقرا أى حاجة فى القديم

وكانت المفاجأة بصراحة بوست رائع

بس كنا عايزيين قصص وأدبيات أكتر من كده

لو كنتى خايفة ان الموضوع يطول منك

ممكن تدينى شوية لنكات وأنا أدخل أقرا

لأن القصص دى إحتمال كبير تفيدنى فى السلسلة بتاعتى

تقبلى خالص تحياتى

3aziz 3eni يقول...

الادب هو ادب بمعنى انه قيم ومبادئ
اما الفراعنه القدماء فمثلهم مثل الصينيين والهنود ذو حضارة قديمة قوية ولذلك فهم اهل ادب رائع وان درسنا اشعارهم او على الاقل نقوشهم على المعابد لعرفنا مدى انحضار الادب فى ايامنا هذه

د/ رامي شهاب الدين يقول...

الموضوع لا بأس بيه

بس فين المسابقة إللى أعلنتى عنها؟

ماهو أنا مش هذاكر على الفاضى

عايزين مسابقة .. وجوايز طبعا

تحياتى

maxbeta3zaman يقول...

بالعكس هذه الملخصات المركزه عن مجالات الفن والفكر عند الفراعنه تعطينا فكره عن الأجواء والمناخ العام عندهم ...حتى عشان الشباب يتنحرر شويه " بقى جدك يبنى أهرامات ...وولادك يلعبو فى الطينه؟؟؟"
أرى تشابها خفيفا بين قصة البحار الغريق وقصة مرزوق الشهيرة التى آخرها " السلطانيه ؟؟؟" وهى ملحمة إذاعية قديمه
تحياتى على الجهد المبذول فى هذا الصدد

مفكر يقول...

السلام عليكم....

نايس بوست...يعني خت منه شوية ثاقفة..

أنا مش متخصص في موضوع المقارنات والمفارقات الادبية ولكن الموضوع كان جميل...

أتمنى من حضرتك أن تزوريني..

اخوك مفكر في تانية طب....

صباح الصباح يقول...

يا بنتى اشرحى لنا بتوسع اكتر انا مش فادر افهم كويس

حاجــ عيال ــات يقول...

جميلة مواضيع هو انت رغاية شوية لكن تجنني
وبرافوا عليك كمان قادرة ماتزهقيش الناس
منتظراك دايما

كـــيــــــــارا يقول...

ازهري

*****

ميرسي لكلامك

وياريت فعلا تجبلينهاية قصة الامير ذو المصير المحتوم

هنتظرها :)

كـــيــــــــارا يقول...

باجوجو

********

للاسف انا مش جيبه المعلومات من مواقع دي من كتب عندي

وصعب افسر

كـــيــــــــارا يقول...

لان لو هفسر صحيح يبقي هخصص المدونه كلها عن الادب :)

كـــيــــــــارا يقول...

عزيز عيني

********

معاك حق فعلا

نورتني باول زياره

كـــيــــــــارا يقول...

د/ رامي

******

المسابقه حاضر من عنيا :)

كـــيــــــــارا يقول...

مفكر

****

ده يسعدني انك تكون استفدت من البوست

وهزورك حاضر والله

كـــيــــــــارا يقول...

صياح الصباح

**********

مش هينفع افسر اكتر من كده لان هطول اوي في البوست وانا عندي حاجات كتير عاوزه اقولها :)

كـــيــــــــارا يقول...

حاجات عيال

*********

كلامك ده يسعدني بجد

نورتيني ياقمر

أحــوال الهـوي يقول...

كـــيــــــــارا
ابنتي
الحب و الهيام من المتع المجانية التي توهب للقليل من الناس و السيطرة تاتي من تحجيم هوي النفس و لعبها الدور الرئيسي في العلاقه و هذا يحدث بتغذية النفس بتقوي الله و مخافته فتصبح بعدها نفس تقيه تدل علي الخير و تري جلية الامور
هناك كتاب جميل اسمه روضة المحبين للعلامه ابن القيم به من الدلائل ما ترد علي الكثير من القضايا

تحياتي

أحــوال الهـوي يقول...

كنا بنتحاور انا و عمنا فشكول و طرات لي فكرة قوللي رايك فيها
fashkool
انا راح اشتغل في موضوعات تاريخية و نقفل علي بعض بس خليني ابحث في التاريخ المقارن
جديده حكاية التاريخ المقارن مش كده

يعني جنابك تشتغل علي الفراعنه و انا ابحث في نفس الحقبة علي تاريخ الحضارة المواكبه و بكده نقدر نعرف حال مصر و باقي الدنيا في نفس الوقت
ايه رأيك
أو نطلب من كيارا بما انها من عشاق التاريخ و كتبه تساعدنا بالفكرة دي

تحياتي

Nabil يقول...

اهلا بالاستاذه مره تانيه...

وشكرا علي المعلومات.

ويارب حالتك النفسيه تبقى احسن قريب والموضوع حلو جدا بصراحه


ارق تحيه

منتظرين المزيد

نوسه وريمان فى هاكونا مطاطا يقول...

كيارا


على فكره بحد اسلوبك زى العثل

بجد انتى عسل اوى

وشكرا على المعلومات الادبيه دى

وبحب انا اوى قصه الملاح الغريق

مع تحياتى

ريمان " ملائكيه"

حنين القلب يقول...

تسلم ايدك على العلومات والقصص الحلوة دى
بجد اسلوبك شيق وجميل اوى

تقبلى مرورى

أحــوال الهـوي يقول...

كـــيــــــــارا
و رينا الهمه و نسقي مع عمنا فشكووول و خللي الناس تشوف عظمة بلدنا لما تقارن نفس الفترة العالم كان فين

تحياتي

وميض ابتسامة يقول...

كيارا انا شفت البوست ده متأخر زيادة عن اللزوم ..بصراحة انا بعشق قصص الاجداد القدماء ..
ومش عارف اقولك ايه على المعلومات والحكاوى الجميلة
تحياتى

مهندس مصري بيحب مصر يقول...

ايه اللي حصل لمدونتك الرئيسية ضي القمر

دي إختفت و حل محلها مدونة جنسية إباحية

هو في ايه ؟

Teawater يقول...

ميرسيه يا كيارا انك كتبتي فرعوني وياريت تكملي وتقوليلي يعني ايه
********************
تاملات ايبوور
********************
انا اول مرة اسمع عنها بس قريت قصه الملاح الغريق وبرده قريت قصه الفلاح الغريق شكرا ليكي يا كيكي

أكون أو لا أكون يقول...

ياحلاوه ياولاد... ايام زمان عمرانه... الله اكبر...
الحمد لله... ياشيخه انا اتضايقت جدا... قلت يمكن الهكر استولى عليها... بس الحمد لله جت سليمه...

حمدلله على السلامه...

أحــوال الهـوي يقول...

انت فين

و حشتينا

رومانسى مشاكس يقول...

كيارا


بوستاتك بجد كلها اجمل من بعض تسلم الايادى يا قمر


وفتاك بالعفية

هههههههههههههههههههه



سلام يا قمر


تحياتى

رومانسى مشاكس


مشاكس بس مش ااوى

ههههههههههه

من غير عنـــوان يقول...

مغلومات قيمة
شكرا للإفادة

أمنياتي

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


تحياتى

Kiara يقول...

أحــوال الهـوي

*********
بابتي الغالي

هقرا الكتاب ده
هدور عليه الاول وهقراه

كل سنه وانت طيب

Kiara يقول...

أحــوال الهـوي

**********

وانا موافقه الفكر جميله فعلا

Kiara يقول...

Nabil

********

نبيل

الحمد لله ان المعلومات عجبتك

كل سنه وانت طيب

Kiara يقول...

حسام وريمان فى هاكونا مطاطا

**************

فرحااااااانه اوي ان اسلوبي عجبكم

انتي اللي زي العثل

كل سنه وانتي زي القمر ياريمان

Kiara يقول...

حنين القلب

*********
تسلمي انتي ياقمر ويارب اسلوبي دايما يكون عاجبك

كل سنه وانتي طيبه

Kiara يقول...

أحــوال الهـوي

******

ان شاء الله يابابتي

Kiara يقول...

وميض ابتسامة
********
كلامك فيه تشجيع كبير ليا

كل سنه وانت طيب

عيد سعييييييييييييييد

Kiara يقول...

مهندس مصري

**********
طبعا انت عرفت خلاص اللي حصل

عااااااااااااااااااااااااااااااااااااا

Kiara يقول...

Teawater

***********
شوشو حبيبتي

العفو ياقمر والمدونه قديمه بس شكلك مش كنتي واخده بالك منها

اما يبورر فا دي برديه قديمه اووووووي

Text here

ادخلي هنا هتفهمي منها كل حاجه

نورتيني ياقمر

Kiara يقول...

أكون أو لا أكون

**********

هههههههههههههههههه ايوه ايام زمان الحمد لله بخييييييييييير

Kiara يقول...

أحــوال الهـوي

*******

انا اهووو ياباتي

Kiara يقول...

البحث عن أنا شىء جنونى

***********
الله فكره حلوه بجد

هروح وازور واضيف علطوووووول

Kiara يقول...

رومانسى مشاكس

***********

ده شهاده كبيره اوي منك ليا

كل سنه وانت دايما مشاكس ههههههههههه

Kiara يقول...

من غير عنـــوان

**********
الحمد لله ان المعلومات فادتك

كل سنه وانت طيب

Kiara يقول...

أحــوال الهـوي

*********
وانت طيب يابابتي

كلام على بلاطة يقول...

كل عام وانت بخير