الاثنين، 3 أغسطس 2009

مدخل ( الجزء الثالث ) 3 -



حقد الايوبيين فى الشام على مماليك مصر لقتلهم توران شاة وطمع كل واحد منهم فى مصر , دا غير ان امراء المماليك فى مصر كل واحد منهم برضه طمعان فى الملك , وكحل وسط اتفق الجميع على تعيين شجرة الدر فى العرش , حيث انها فى الاساس كانت جاريه تركيه اشتراها نجم الدين ايوب وبعد كدة اعتقها واتجوزها , فهى كانت اقرب للماليك بحكم نشأتها , دة بالاضافه لذكائها وفطنتها ومعرفتها بكل الامور الهامه فى الدوله , وتولى عز الدين ايبك التركمانى الصالحى اتابكيه العسكر , حيث قام بدور الشريك لشجرة الدر فى الملك...

اول حاجه عملتها شجرة الدر انها انعمت على الامراء والجنود واغدقت عليهم الاموال فأرضت الكبير والصغير , وبالتالى استكانت الامور وهدأت الجبهه الداخليه .
كانت دمياط لسه تحت يد الصليبيين مما يشكل خطر فى حال ارسال حمله صليبيه جديدة , فنجحت شجرة الدر فى الوصول لاتفاق معهم ينص على ما يلى :
- اعادة دمياط للمصريين
- الافراج عن الاسرى المسلمين
- التعهد بعدم مهاجمه السواحل الاسلاميه مرة اخرى
- دفع خمسمائه الف دينار لاطلاق سراح الملك الفرنسى وكتعويض عن الخسائر الناتجه عن الحرب
- يتعهد المسلمين برعايه مرضى الصليببين
- تحدد مدة المعاهدة بعشر سنوات

اللى حصل ان فيه فريق من المماليك كان مع تنفيذ باقى بنود المعاهدة حتى بعد استعادة دمياط ودول كان يتزعمهم شجرة الدر وايبك بينما راى فريق اخر ضرورة نكث المعاهدة وعدم اطلاق سراح لويس , اولا لكونه اطلع على عوراتهم وشاهد المماليك يقتلون سلطانهم !!!!!!
- وثانيا لمركزة الدينى الهام فى اوروبا ( الملك لويس كان قديس على فكرة ) لان دمياط اصبحت بالفعل فى ايدى المسلمين , والفريق دة كان يتزعمه اقطاى وبعض الامراء , الا ان فريق شجرة الدر هو الذى تغلب برايه فى النهايه .

بعد انتهاء الفيلم دة ابتدت شجرة الدر تحاول تثبيت مركزها فى مصر والتقرب بشتى الوسائل للعامه والخاصه والعسكريين والمدنيين على حد سواء , الا انها فشلت لان اهل مصر والمسلمين عموما لم يتقبلوا وجود امراة فى السلطنه , وتحرجت شجرة الدر وحرصت على عدم ظهور اسمها فى المنشورات والاوامر الرسميه او فى الدعاء على المنابر حيث كان يكتب ويقال : ملكه المسلمين والدة خليل امير المؤمنين , وصاحبه الملك الصالح , والمستعصميه ( نسبه للخليفه العباسى , من باب مسح الجوخ يعنى )
وقامت اضطرابات فى مصر وتظاهر الناس واتهمواها بالتساهل مع الصليبيين ( شعب محترم والله طول عمرة , يعنى لو كان حاكم مفترى وجبار مكنش حد فتح بقه ) وخرجت عليها بلاد الشام ورفض امراء الايوبيين هناك الدخول تحت سلطتها , وفى نفس الوقت لجأ اتباع شجرة الدر للخليفه العباسى فرفض مساعدتهم وقال لهم ان كانت الرجال عدمت عندكم فاخبرونا حتى نسير لكم رجلا ..

واستعد امراء الشام للزحف على مصر , ونظرا لخطورة الوضع كان مافيش غير حل واحد , انها تتجوز ايبك وتتنازل له عن العرش ودة بالفعل اللى عملته شجرة الدر وبكدة تولى ايبك ملك مصر واصبح اسمه السلطان الملك المعز عز الدين ايبك الجاشنكير التركمانى الصالحى ..

ايبك مكانش من اقوى الامراء ولا اشهرهم بل كان من الامراء المتوسطين وكان فيه من هم اقوى نفوذا منه زى اقطاى وبيبرس وقلاوون ( يعنى بيبرس مكانش امير درجه تانيه زى ما فى الفيلم ) الا ان ايبك كان صاحب دين ومروءة ورجاحه عقل , بالاضافه لان كل الامراء كانوا خايفين من بعضهم فاتفقوا على تعيين ايبك كحل وسط وآمن لجميع الاطراف , بحيث انهم يقدروا يعزلوة وقت ما يحبوا .

ايبك لما تولى السلطنه وجد امامه اربع اخطار تهددة وهى كالاتى :
- حصلت انتفاضه شعبيه ضد الحكم المملوكى بوجه عام
- مؤامرات باقى امراء المماليك ضدة وسعيهم للسيطرة عليه
- شجرة الدر
- اصرار الايوبيين فى الشام على الزحف لمصر والاستيلاء عليها من المماليك

ايه ياعم الكلام دة ؟ واحدة واحدة كدة ثورة ايه وبتاع ايه ؟؟

اقولكم
اول خطر كان متمثل فى قبائل عربيه كتير استوطنت مصر بعد الفتح الاسلامى واقامت فى مساحات كبيرة من الصعيد والشرقيه , واستقروا وعملوا بالزراعه , دول بقى احتقروا المماليك ورفضوا يخضعوا لحكمهم لانهم مماليك ومكانوش احرار , وشافوا انهم احق بملك مصر منهم , وبالفعل عملوا ثورة مسلحه تزعمها رجل اسمه حصن الدين ابن ثعلب , وكان فيه سبب كمان عجّل بالثورة دى , ان المماليك تعسفوا فى تحديد اسعار المنتجات الزراعيه وتلاعبوا باسعارها ( زى يوسف والى واباظه كدة ) وكانت النتيجه ان فلاحين كتير هجروا القرى ونزحوا الى المدن مما جعلهم وجها لوجه مع المماليك .
وبسرعه التف حولهم كثير من المصريين وشاركوهم فى الثورة لانهم لم يقبلوا ان يحكمهم سلطان جرى عليه رق , حتى انهم كانوا كل ما يشوفوا ايبك ينتقدوة ويشتموة ويسمعوة ما يكرة , وبالفعل اقام حصن الدين دوله مستقله فى مصر الوسطى والشرقيه لا تخضع لحكم المماليك , فبعت ايبك جيش بقيادة اقطاى للقضاء على الثورة وبالفعل عامل اقطاى الثورة بمنتهى الشدة والقمع ونجح فى هزيمه الثوار فى بلبيس , الا ان حصن الدين ظل مسيطرا على مصر الوسطى وفضل يحكمها الى ان تولى بيبرس الحكم فقبض عليه وشنقه .

طبعا رد الفعل الطبيعى لانتصار اقطاى هو ان نفوذ اقطاى زاد اكتر واكتر واصبح اقوى من الاول لدرجه انه طلب من ايبك يديله الاسكندريه وايبك مقدرش يقول لأ !!
وبدأ اقطاى يقوى نفسه اكتر واكتر وجمع كتير من المماليك حوله لدرجه انه بقى يهاجم ايبك ويشتمه فى كل جلساته مع الامراء , وسمى نفسه ببعض الالقاب السلطانيه , وسماة اتباعه الملك الجواد !!!..

طبعا ايبك مش هيسكت فبدأ هو كمان فى تكوين طائفه من المماليك خاصه بيه وسماهم المماليك المعزيه ( نسبه اليه حيث ان اسمه الملك المعز ) وقوى قطز مملوكه واعلى من شانه وعينه نائب للسلطنه , وطرد باقى المماليك من جزيرة الروضه ..

وزاد الموضوع قوى لما اقطاى خطب احدى اميرات البيت الايوبى فى الشام ليكسب مساندة امراء الشام الايوبيين وفى نفس الوقت يطفى على نفسه شرعيه البيت الايوبى , وطلب من ايبك انه يخلى له قلعه الجبل ( اللى هى القلعه بتاعتنا ) علشان يسكن فيها هو وزوجته حيث انها بنت ملوك ولا يليق بها ان تسكن فى غيرها ) وبكدة ظهرت نوايا اقطاى لان معنى تحكمه فى القلعه هو انه يسيطر على القاهرة كلها وبالتالى مصر , ودة اللى ايبك كان مستحيل يقبله , فلم يجد ايبك امامه حل سوى التخلص من اقطاى , وبالفعل استدعاة ايبك صباح يوم الاثنين 27 سبتمبر عام 1254ميلاديه الى القلعه بحجه مشاورته فى بعض الامور , و توجه اقطاى الى القلعه بصحبه بعض مماليكه , الا انه بمجرد دخول اقطاى من باب القلعه اغلقوا الباب خلفه ومنعوا مماليكه من الدخول وانقض عليه المماليك المعزيه وقتلوة وكان من ضمنهم قطز ( يعنى قطز مكانش قاعد على السلم برة زى ما فى الفيلم ) اما المماليك اللى كانوا برة اسرعوا لابلاغ باقى مماليك اقطاى بالخبر وبالفعل راح 700 من مماليكه الى القلعه لانقاذة , حيث انهم كانوا فاكرين انه لسه مماتش , ومن ضمنهم كان بيبرس البندقدارى وقلاوون الالفى وسنقر الاشقر . وحاصروا القلعه الا ان ايبك ظهر لهم من فوق الاسوار والقى عليهم رأس اقطاى , ففهموا انه مات وعرفوا ان ايبك رجل قوى ومش سهل زى ماكانوا فاكرين , وهنا خاف المماليك اللى ناصروا اقطاى على روحهم وقرروا الفرار من مصر وراحوا احتموا بامراء الايوبيين فى الشام , ومن ضمن من فر بيبرس , ومن تبقى منهم فى مصر قبض عليه ايبك وصادر امواله .

الا ان الاجراء دة سبب مشكله كبيرة وهو ان مماليك مصر انقسموا على بعضهم لمماليك بحريه ومماليك معزيه وفضلوا يعانوا من الصراع دة كتير حتى زحف المغول على مصر , كما ان المماليك اللى فروا للشام فضلوا يزنوا ليل نهار على امراء الشام الايوبيين انهم يهجموا على مصر ويقضوا على ايبك , وكان الكلام دة عند الملك الناصر صاحب دمشق , وبالفعل اوشك الموضوع ان ينقلب لحرب لولا تدخل الخليفه العباسى حيث توسط بين الطرفين لفض النزاع , لان خطر المغول كان على الابواب , وتوصل لحل وسط وهو ان يستعيد ايبك ساحل بلاد الشام وان لايأوى الملك الناصر المماليك الفارين , وفى ساعتها مخابرات المماليك عرفت الخبر ففروا بسرعه من دمشق واحتموا بمعيث الدين عمر الايوبى ملك الكرك , وبكدة حصل هدوء نسبى فى الجبهه الخارجيه وتفرغ ايبك بقدر اكبر للمشاكل الداخليه واهمها كان شجرة الدر نفسها :

الواقع ان شجرة الدر لما تزوجت ايبك كان دة لغرض انها تحكم مصر من خلف ظهرة , يعنى كان فى دماغها انه هيكون خاتم فى صباعها , وفعلا سيطرت شجرة الدر عليه فى اول عهدة لدرجه انها منعته من زيارة زوجته الاولى ام ولدة على ( دى كانت مراته الاولانيه مش التانيه زى ما الفيلم قال ) الا ان ايبك زهق من شجرة الدر ومن سيطرتها وخاف تغدر بيه فقرر انه يخطب لنفسه بنت بدر الدين لؤلؤ صاحب الموصل , ودة طبعا لم تقبله شجرة الدر , وكانت لسه كلمتها مسموعه عند المماليك البحريه فراسلتهم فى الشام وحثتهم ان يسرعوا بالهجوم على مصر , الا ان مخابرات ايبك تمكنت من اكتشاف الرسائل دى ووصلتها لايبك واطلعته عليها ..

فايبك قال مبدهاش بقى وعزم على التخلص من شجرة الدر هى كمان , الا انها سبقته وكانت اسرع منه , فبعثت له رساله رقيقه حونينه تستعطفه وتلعب عالوتر الحساس فى صدرة وان هو حبيبها ومش عارف ايه , وطلبت منه يزورها فى القلعه فى الليله دى .
وبالفعل نخ ايبك زى الطور وانخدع بكلامها وراح القلعه يزورها ( حيث انه كان هجر القلعه وسكن فى باب اللوق ) .
واثناء ماكان عمنا ايبك بياخد الدش المتين , كانت شجرة الدر خبت فى الحمام خمسه من الغلمان الخصيان , اللى هجموا عليه وقتلوة , وطبعا كان متوقع ان مماليك ايبك ينتقموا منها فحاولت اخفاء خبر قتله واشاعت انه مات بالليل لوحدة وعرضت الزواج على اكابر امراء المماليك علشان تحتمى بيهم الى ان تهدأ العاصفه الا انهم رفضوا .

وبالفعل تسرب خبر قتل ايبك للمماليك المعزيه اللى هجموا على القلعه للانتقام من شجرة الدر , الا ان بعض من تبقى من فلول المماليك البحريه ( اللى هما مش من اتباع ايبك ) وحاولوا يحموها فحبسوها فى احد ابراج القلعه حمايه لها من انتقام المماليك المعزيه ..
وكان الموضوع هيعدى , الا ان زوجه ايبك الاولى اصرت على الانتقام وفضلت تحرض المماليك المعزيه على قتلها , وبمرور الوقت ضعف المماليك البحريه امام ضغوط المماليك المعزيه وتخلوا عن حمايه شجرة الدر ..

ها وبعدين ايه اللى حصل ؟؟؟

اتشالت شجرة الدر هيلا بيلا واترمت قدام زوجه ايبك الاولى , فامرت جواريها انهم يضربوا شجرة الدر بالقباقيب ( القباقيب زمان كانت ايه , مرزبه , وكانت بكعب طويل كمان , يعنى ضربتها مميته ) وشاركت الزوجه الجوارى فى الضرب الى ان ماتت شجرة الدر , فشالوها ورموها من فوق سور القلعه وهى بملابسها الداخليه , وفضلت كذا يوم مرميه فى تحت القلعه وهجم عليها اللصوص وسرقوا ما تبقى من هدومها ( الغاليه الثمن طبعا ) وحتى الحلى والاساور مسابوهاش , فكان يروى مثلا ان الحرامى يحاول يفك الخاتم من صباعها فميقدرش فيقوم عامل اييييه ؟ يقوم قاطع الصباع وواخدة كله على بعضه , وهكذا يعنى , وبالمرة الكلاب الجعانه تحت القلعه مش هتسيب فرصه زى دى , فهجموا هم كمان على شجرة الدر علشان ياكلوا ويتغذوا !!!!

ودى كانت النهايه الاليمه لشجرة الدر ....

الطريف بقى فى الموضوع ان زوجه ايبك الاولى احتفلت بمقتل شجرة الدر وصنعت طبق حلويات لاول مرة وسمته باسمها , مازلنا احنا بناكله وبنعمله الى الان .

عارفين اللى هو ايه ؟؟

اة

ام على
--------------------------------
- التركمانى : نسبه الى اصله والبلاد اللى اتى منها .
الصالحى : نسبه الى الصالح نجم الدين ايوب , حيث انه كان من مماليكه .
- اتابك العسكر : امير الجيوش , وهو لقب تركى قديم مكون من كلمتان , الاولى ( اتا ) بمعنى الاب , والثانيه ( بك ) بمعنى امير , فيكون معنى المصطلح هو الاب الامير , وهى تعادل وزير الدفاع حاليا ...
- الجاشنكير : هو من يتذوق طعام وشراب السلطان قبله مخافه ان يكون به سم , وقد اتسعت سلطته تدريجيا الى ان اصبح مسؤلا عن كل ما يخص القصور السلطانيه ( زى زكريا عزمى حاليا كدة ) ..
- مصر الوسطى : مصر ابتداء من جنوب القاهرة ومنطقه الفيوم وصولا الى اواسط الصعيد .
- المعزيه : نسبه الى ( عز ) الدين ايبك .
- الموصل : منطقه بالعراق .
- القباقيب : زمان كانت كعوب القباقيب الحريمى عاااااااليه جدااااا وحادة ومدببه للغايه , وكمان كان القبقاب له كعبين , واحد من قدام والتانى من ورا , يعنى سلاح قاتل , ومحدش يسالنى هما كانوا بيمشوا بيها ازاى ....

هناك 14 تعليقًا:

بزنس تعيش يقول...

مجهود علم طيب


ومعلومات قيمة


جدا


وممتعة ونافعة



لكن حاولوا تقللوا من حجم البوست شوية



عشان الناس ما تملش

-----------------------------------
----------------------
مع تحياتى / حازم ربيع

أحــوال الهـوي يقول...

ايه العظمه دي و السرد الشيق الجميل يا شباب

بسلاسة و عذوبه قرات عن حقبه تاريخيه معتقه

تسلم ايديكم

تحياتي

The illusionist يقول...

جزء جميل جدا اللى حضرتك اتكلمت عليه
انا خدته بالتفصيل فى قصه شجره الدر لما كنت فى الثانوى
وعرفت حاجات كتيره منه
الف شكر ومستنى الباقى

احمد سعيد يقول...

بزنس

الف شكر

بس موضوع انى اصغر البوست

دة مش ممكن حاليا

لانى ملتزم بوحدة سرد معينه

مينفعش مثلا ان نهايه حلقه مسلسل تيجى فى اى وقت وتقطع

بل لازم انها تكون فى جزء معين

ودة اللى بيخلينى ملزم انهى البوست فى جزئيه معينه دون غيرها

وعلى اى حال برضه هحاول الخص شويه لما اخلص المدخل واخل فى سلاطين المماليك

لان اساسا كل السلسله دى عبارة عن اختصار وتلخيص وفكرة عامه

الاسهاب لسه جاى بعدين

D:

احمد سعيد يقول...

احوال الهوى


اشكرك وميرسى جدا لذوق حضرتك

احمد سعيد يقول...

اليوشنيست

الباقى فى الطريق باذن الله

تحياتى

مهندس مصري بيحب مصر يقول...

الله ينور يا برنس
بجد بنستفيد

غير معرف يقول...

كل رمضان و اعضاء المدونة بخير

تامر علي يقول...

كل عام وانتم بصحة وسعادة

تقبل الله منا ومنكم صالح الأعمال


أحلى حاجه في البوست ده

أم علي :))

لاء بجد ربنا يباركلك على المجهود ده وان كنت افضل ان لايكون اسلوب سردي فقط لأن القايء يحب ان يتواصل مع الكاتب بمعنى انك تحسسي القاريء انك بتكلميه بشخصيتك مش بتقريله كتاب

في اتنظار المزيد

تحياتي :)

sab7al5air يقول...

سلام عليكم مررت من هنا شدني اسم المدونه في مدونه اخري ولكن لللاسف ما قريت الخط مش واضح و العتب علي النظر ياريت و يتعدل ولي عودة باذن الله حيث انه الفكره شدتني
تحياتي
علا

death waiter يقول...

very good idea to bring the history back...
hope you succeed in this great tough mission...

غير معرف يقول...

أحيي كيارا و رفاقها
و أدعوكم لقراءة هذه التدوينة لعلها تعجبكم
http://www.quranclub.net/2009/10/blog-post.html
سلام

غير معرف يقول...

اسمعوا أيها الملحدون
تقول الإحصائيات أن أعلى نسبة للانتحار على الإطلاق كانت بين الملحدين لطالما تغنى الملحدون بإلحادهم وأفكارهم وحريتهم التي يتميزون بها عن غيرهم من المؤمنين! وطالما أتحفونا بسيل من كذبهم غير المنطقية يدَّعون فيها أنهم عقلانيون ويتعاملون مع الأمور بواقعية، وأنهم أكثر سعادة من غيرهم من المؤمنين الذين حكموا على أنفسهم بالانقياد للدين، وحرموا أنفسهم من ملذات الحياة!!
ولكن يأتي الواقع والعلم ليكذب هؤلاء ويفضح كذبهم وأنهم مجرد أدوات للشيطان يستخدمها في حربه مع المؤمنين التي سيخسرها بلا شك، وأن هؤلاء الملحدين اتخذوا الشيطان ولياً لهم من دون الله، ليكونوا شركاء له في نار جهنم يوم القيامة.
ومن عظمة القرآن أنه لم يهمل الحديث عن هؤلاء بل وصفهم وصفاً يليق بهم، يقول تعالى:
(اللَّهُ وَلِيُّ الَّذِينَ آَمَنُوا يُخْرِجُهُمْ مِنَ الظُّلُمَاتِ إِلَى النُّورِ وَالَّذِينَ كَفَرُوا أَوْلِيَاؤُهُمُ الطَّاغُوتُ يُخْرِجُونَهُمْ مِنَ النُّورِ إِلَى الظُّلُمَاتِ أُولَئِكَ أَصْحَابُ النَّارِ هُمْ فِيهَا خَالِدُونَ)
فماذا نرجو من إنسان أخرجه الشيطان من النور إلى الظلمات؟ إنه مثل إنسان ميت يائس لا حياة فيه ولا استجابة لديه، وهذا ما أثبتته الدراسات العلمية الجديدة!
الأبحاث العلمية تثبت أن الملحدين أكثر الناس يأساً!
ففي دراسة حديثة تبين أن الملحدين هم أكثر الناس يأساً وإحباطاً وتفككاً وتعاسة!!! ولذلك فقد وجدوا أن أعلى نسبة للانتحار على الإطلاق كانت بين الملحدين واللادينيين، أي الذين لا ينتسبون لأي دين، بل يعيشون بلا هدف وبلا إيمان.
فقد أكدت الدراسات العلمية المتعلقة بالانتحار أن أكبر نسبة للانتحار كانت في الدول الأكثر إلحاداً وعلى رأسها السويد التي تتمتع بأعلى نسبة للإلحاد. أما الدانمرك فكانت ثالث دولة في العالم من حيث نسبة الإلحاد حيث تصل نسبة الملحدين (واللادينيين) إلى 80 %، وليس غريباً أن تصدر منها الرسوم التي تستهزئ بنبي الرحمة صلى الله عليه وسلم.
تؤكد الدراسات العلمية على أن للتعاليم الدينية دور كبير في خفض نسبة الانتحار، وأن هذه التعاليم أقوى ما يمكن في الإسلام! ربما ندرك يا إخوتي لماذا حذر نبي الرحمة صلى الله عليه وسلم من الانتحار في قوله: (من قتل نفسه بحديدة فحديدته في يده يتوجأ بها في بطنه في نار جهنم خالدًا مخلدًا فيها أبدًا، ومن شرب سمًا فقتل نفسه، فهو يتحساه في نار جهنم خالدًا مخلدًا فيها أبدًا، ومن تردى من جبل فقتل نفسه، فهو يتردى في نار جهنم خالدًا مخلدًا فيها أبداً) [رواه البخاري ومسلم]. إنه أخطر تحذير على الإطلاق عرفته البشرية!! فهل هذا النبي يدعو للقتل والإرهاب؟ أم أنه حافظ على حياة أمته وأتباعه بهذا الحديث الشريف؟ ومن إعجاز هذا الحديث أنه شمل الحالات الأساسية التي تشكل أكثر من 90 % من حالات الانتحار.
فلو تأملنا إحصائيات الأمم المتحدة نلاحظ أن معظم نسب الانتحار يكون بمسدس أو سكين، وهو ما أشار إليه الحديث بكلمة (من قتل نفسه بحديدة)، السبب الثاني هو تجرع سم أو استنشاق غاز أو أخذ حبوب مخدرة، أي طريقة كيميائية وهو ما أشار إليه الحديث بقوله: (ومن شرب سمًا)، والسبب الثالث هو القفز من على جسر أو من أعلى بناء أي أن يرمي نفسه من مكان مرتفع وهو ما أشار إليه الحديث بقوله (ومن تردى من جبل)، انظروا كيف أن النبي صلى الله عليه وسلم لم يغفل عن مثل هذه الظاهرة فوضع العلاج المناسب والقوي لها مسبقاً!!
تؤكد هذه الدراسة العلمية أن أعلى نسبة للانتحار كانت بين الملحدين، ثم البوذيين ثم المسيحيين ثم الهندوس وأخيراً المسلمين الذين كانت نسبة الانتحار بينهم تقترب من الصفر. انظروا معي إلى العمود الذي يمثل نسبة الانتحار لدى الملحدين وهو أعلى نسبة لديهم، وتأملوا معي العمود الذي يمثل نسبة الانتحار بين المسلمين وهو أقل نسبة على الإطلاق، هل توحي لك هذه الحقيقة العلمية بشيء!!
خطوات علاج الانتحار كما يراها العلماء اليوم
تؤكد الدراسة على أن نسبة الانتحار زادت كثيراً في الخمسين سنة الماضية، وأكدت دراسات أخرى على أن الدول التي تضع قوانين صارمة تعاقب فيها من يحاول أن يقتل نفسه أو من يساعده على ذلك، هذه الدول كانت نسبة الانتحار فيها أقل، أما الدول التي لا تضع قوانين صارمة تعاقب من يحاول الانتحار مثل السويد والدانمرك بحجة 'حرية التعبير' فكانت تتمتع بأعلى نسبة انتحار.
من هنا تؤكد الدراسات على أنه من الضروري لعلاج ظاهرة الانتحار لابد من التحذير منها ووضع عقوبة رادعة لها. إذاً هناك ثلاث خطوات تنصح بها الدراسة لعلاج هذه الظاهرة التي تقول فيها الأمم المتحدة أن عام 2020 سيكون عدد المنتحرين مليون ونصف، وأن 15-30 مليون شخص سيحاولون الانتحار في عام واحد فقط، أي بمعدل جريمة انتحار واحدة كل 20 ثانية، وبمعدل محاولة انتحار كل ثانية أو ثانيتين!! وهذا عدد ضخم جداً وغير مسبوق

غير معرف يقول...

ما شاء الله عليكي

معلوماتك أكثر من رائعه .. و انتي قارئه جيده يا اختي الكريمه

ربنا يكرمك و يبارك فيكي .. أول مره ازورك بس معلش هرخم و ازورك تاني

أعذريني على المرور بدون دعوه

و يا ريت تشرفيني في مدونتي المتواضعه .. لكن انا مبتدئ تدوين لسه :(

هنا

http://ahmedabdulmohsin.blogspot.com/2010/01/blog-post_25.html

نوريني