السلام عليكم ,
اولا انا اسف جدا انى اتاخرت فى السلسله دى بس دة كان لظروف خارجه عن ارادتى , وعلى اى حال انا رجعت اهو الحمد لله ,
قبل ما ابدأ احب اعرفكم على النظام اللى هشتغل بيه , انا هبدأ بتاريخ المماليك , مش من اول الفتح الاسلامى , ودة لانى شايف ان فترة حكم المماليك كانت من اعجب فترات التاريخ المصرى واكثرها اثارة , كما ان الفترة دى هتديكم مفاتيح كتير لشخصيه الانسان المصرى وهتذهلوا من التشابه الرهيب بين مصر اياميها ومصر ايامينا ..
طيب لما اتكلم عن الفترة دى هضطر اعمل كذا حاجه
التاريخ كلما كان مختصر كلما كان ممل , ودة على عكس المتعارف عليه , وانا لا اؤمن بالتاريخ المختصر او تاريخ ( النقاط والعناصر ) بتاع مناهج التربيه والتعليم دة , وكمان لا اؤمن بالتاريخ السياسى والتاريخ الاجتماعى , فالتاريخ فى وجهه نظرى وحدة واحدة لا تتجزأ باى حال من الاحوال ..
باختصار انا عايز اعيشكم فى وسط الناس دى , بحيث لما تسترجع التاريخ دة تحس انك بتفتكر زكريات قديمه من حياتك ...
طب دة هيستدعى انى اتكلم بشىء من التفصيل ودة هيكون صعب نظرا لكثافه الاحداث فى تلك الفترة وكمان نظرا لوعورة المصطلحات المتداوله فى تلك الاوقات ....
انا لا هختصر ولا هبدل المصطلحات , عايز تعيش اياميها يبقى تتكلم زى الناس ماكانت بتتكلم وتلبس زى ماكانوا بيلبسوا ..
بس عندى فكرة كويسه
بالنسبه لمشكله كثافه الاحداث فأنا هبدأ ( آسفا ) بنشر سرد مختصر واجمالى لتاريخ دولتى المماليك البحريه والبرجيه بحيث يكون فى ذهنك ترابط هيكلى للفترة دى بوجه عام , بحيث لما نخش فى التفاصيل بعد كدة محدش يتوة ..
بمعنى
كل بوست هيتكلم عن ملك او سلطان
ولما نقفل الفترة كلها هنبتدى ناخد مقتطفات من التاريخ المملوكى ونناقشها بشىء من التفصيل الممل , لان طبعا مش هيكون من الممكن اننا نلتزم بسرد تفصيلى متتابع للتاريخ فى هيئه بوستات , كدة عاوزين ولا الف سنه علشان نخلص ..
يعنى هنتكلم اجمالا وبعدين نركز على نقط معينه , ودة معناة ان الموضوع محتاج متابعه , علشان لو بوست سقط منك ممكن تدوخ بعد كدة
:D
بالنسبه لمشكله الالفاظ والاصطلاحات فانا هكتب الالفاظ الغريبه بلون مخالف وفى اخر البوست هكتب شرح وتفسير مختصر لكل مصطلح من دول .....
وطبعا قبل كل شىء لازم ابدأ ببوست الفذلكه التاريخيه المعتاد وفيه هتكلم بوجه عام عن نقاط معينه فى تاريخ ماقبل المماليك , هنكون محتاجينها فى موضوعنا ...
اهم حاااااااااجه
المتابعه
محدش يسقط بوست , انا بقول اهو ......
ايه ؟؟؟
مين ؟؟؟
انا قلت الكلام دة فى البوست اللى فات ؟؟
اة فعلا , بس هو مش بالظبط يعنى , عموما بكرة ان شاء الله هيكون بوست الفذلكه جاهز
ادعولى بقى
يلا
استعنا بالله
هناك 6 تعليقات:
طيب
أدينا متابعين
فكرة جميلة....ربنا يوفقك
انا لمنتظرون
مقدماتك و تحذيراتك كترت فهمنا ابهي بقي شوقتينا
ما هو التشابه بين ايامنا و ايام المماليك
اننا مازلنا عبيد و لن نصبح اسياد؟؟
الله يخليك بلاش اسقاطات و خللي التاريخ تاريخ بلاش نقلب المواجع و نفتح ابواب الاوجاع
عارف انه مجهود جبار و انت ثورجيه و ربنا يعينك علينا و نفهم
تحياتي
على فكرة أحنا من المهتمين جدا بالتاريخ ..ومرحلةالعصر المملوكى
مرحلة مليانة أحداث وحواديت
أبدا يا باشا وأحنا حنتابع
ومش حنفوت بوست
------------------
مع تحياتنا / هانى وحازم
ازاى احوالك يا ابو سعيد عاش مين شافك
انا فهمتك عاوز تعمل بس اختيارك لفترة المماليك ده مسئولية كبيرة لاحظ انها فترة مكعبلة و المعلومات عنها متضاربة و خلى بالك حركة التأريخ فى اواخر حكم المماليك كانت ضعيفة و مش كل حاجة تقراها ممكن تكون صح
يعنى ربنا يوفقك و يسترها معاك
و انا عاوز اقرا و امزمز و معاك و موافقك قوى فى موضوع ان بعض الاحداث التاريخية لا يمكن سردها بالجملة و انا كنت ناوى اعمل بعض الموضوعات اللى بتتناول احداث تاريخية بعينها و كنت ناوى ابدأ قريب بس جهازى البايظ منه لله
عموما البركة فيك يا ابو سعيد تدورلنا شوية عجلة التاريخ اللى بتشغل المدونة
استاذ احوال الهوى
محدش بيتعمد انه يحشر اسقاطات ملهاش لازمة فى تاريخ مصر و العالم الاسلامى لأن تاريخناالعظيم بيعيد نفسه بشكل يعلم الشطار و الطلاب متوسطى المستوى على حد سواء بس تقول ايه فى ناس مبتستوعبش بسهولة و اسمهم فى التاريخ ولاة الامور و فى ناس تانيين اسمهم اهل الامصار و الاقطار و الولايات و انا مش حطول عن كده عشان متفهمش كلامى على انه اسقاط
مع خالص تحياتى ليك
إرسال تعليق