(2) - مدخل - الجزء الثانى .

السلام عليكم ,

فى البوست اللى فات قلت ان فيه مشكله خطيرة واجهت العباسيين ,
وهى ان العلاقه سائت بينهم وبين اهل خرسان ,
ودول اللى قامت الدوله على اكتافهم واتشكل منهم عماد الجيش ,
فاصبح من الضرورى ايجاد قوات بديله تدين بالولاء للعباسيين ,
ودة معادش موجود فى اهل خرسان دلوقت ..
وكمان العرب غير موثوق فيهم لان دول اللى قامت على دعمهم دوله بنى اميه الد اعداء العباسيين ,

طب يعملوا اييييييييييييه ؟؟؟

فوجد العباسيين الحل فى استقدام الرقيق الابيض من اسيا وتشكيل قوة مسلحه ضخمه منهم تدين لهم بالولاء وتساعدهم فى صد مطامع الاخرين , من هنا بدأت ظاهرة المماليك ( وان لم تكن سميت بهذا الاسم بعد ) .

غير معروف بالظبط متى بدات تلك الظاهرة نظرا لانها ظهرت بشكل تدريجى وغير مباشر , الا انه من المعروف ان الخليفه المعتصم هو اول من اعتمد عليهم بشكل كثيف وشكلوا اقوى دعائم الخلافه , ودة اللى كتب التاريخ بتسميه النفوذ التركى فى بلاط العباسيين , طبعا دول مش الاتراك اللى احنا عارفينهم لان دوله العثمانيين مكانتش دخلت حيز الوجود لسه , ولكن احنا بنتكلم عن منطقه وسط اسيا ومنطقه شمال وشمال شرق العراق لما كانت فيها كيانات وقبائل ودويلات كثيرة , قد يكون لهم علاقه ببلاد التركمان ( تركمانستان الان ) وبعضهم من جنس السلاجقه الاتراك ودول كان مكانهم شمال العراق تقريبا ومن بينهم انبثق العثمانيون فيما بعد ....

استكثرالمعتصم منهم علشان يحد من النفوذ العربى والفارسى , بل وقلدهم اعلى المناصب فى دولته وخصهم بقيادة الجيوش , ودة طبعا خلاهم القوة الرئيسيه فى الدوله , الا انه نظرا لقوة الخلفاء حينئذ , ظل الاتراك على ولائهم وخضوعهم لشخص الخليفه ...
وبدأ نفوذ الاتراك فى الزيادة حتى انهم تحرشوا وضايقوا سكان بغداد الى ان اشتكى اهل بغداد الى المعتصم بل وهددوة بالدعاء عليه فى صلاتهم , فاضطر انه يخرجهم من بغداد وبنى لهم مدينه ( سامراء ) واسكنهم فيها ..

ولما انتهى عهد الخلفاء الاقوياء وجه عهد الضعف والانحدار المعروف بالدوله العباسيه التانيه , وكثر الخلفاء الضعاف , فكان من الطبيعى ان ينمو النفوذ التركى على حساب الخلفاء , فبقينا نلاقيهم يعزلوا خليفه ويعينوا اخر بل واحيانا وصل بهم الامر الى قتل الخليفه نفسه , واستقل بعض امرائهم بولاياتهم زى ما عمل احمد ابن طولون فى مصر , ومش هنلاقى لوصف الوضع دة ابلغ من كلام المؤرخ ( ابن طباطبا ) بقوله :
كان الخليفه فى ايديهم كالاسير , ان شاؤوا ابقوة وان شاؤوا خلعوة وان شاؤوا قتلوة !!!!!!

وبالنسبه لمصر هنلاقى ان احمد ابن طولون نفسه سار فى نفس الدرب بعد ما استقل بمصر عن الخلافه العباسيه وبدأ فى الاستكثار من الجنود الاتراك والديلم ..
وبعد كدة لما اسس ابو بكر محمد ابن طفج الاخشيد الدوله الاخشيديه فى مصر نهج نفس الاسلوب واستكثر من الاتراك والديلم حتى قيل انه كان ينام بحراسه الف مملوك !!!!

وبعد كدة استولى الفاطميون على مصر , لانهم كانوا عاملين دوله فى المغرب العربى ولما توفى كافور ( خادم الاخشيد الاسود اللى تولى حكم مصر بعدها !!!!! ) وضعفت الدوله الاخشيديه فى مصر , توجهت انظار الفاطميون عليها , فهى ذات موقع متميز فى قلب العالم الاسلامى , تقع على الكثير من الطرق والممرات , بوابه شمال افريقيا , دوله ذات ثراء فاحش وارض خصبه , يعنى من الاخر تصلح قاعدة لامبراطوريه عظيمه ..
نجح الفاطميين فى الاستيلاء على مصر , وقيل انهم كانوا اكثر الحكام ادراكا لعقليه المصريين , وكان اسلوبهم يعتمد على المقوله الشهيرة ( ذهب المعز وسيفه ) حيث يحكم بالترغيب والترهيب معا ليضمن ولاء الافراد .
فمن ناحيه حكم الفاطميون مصر بالحديد والنار ومن ناحيه اخرى اغرقوا البلاد بعادات واحتفالات وموالد كثيرة ما انزل الله بها من سلطان , بلغ من تغلغلها فى نفوس المصريين انه مازال منها ما نحتفل به الى الان باعداد ولائم ووجبات معينه على نفس النحو المتبع فى الماضى ...
وبما ان الفاطميون بالطبع معندهمش استعداد للاعتماد على ابناء البلد فى تكوين قوة عسكريه , فلجأ الفاطميون كالعادة للمماليك المجلوبين من الخارج فاعتمدوا على الترك والسودانيين والبربر ....
والعناصر دى عاثت فى مصر فسادا وسلبا ونهبا , ومن طريف مايحكى انه كان فيه احد الخلفاء الفاطميين غضب الناس منه فصنعوا له تمثال من خشب ولبسوة لبس واحدة ست وطافوا بيه فى الشوارع وضربوة وحطموة , ولما وصل الامر للخليفه , امر عسكر المغاربه فنزلوا البلد وعاثوا فيها سلبا ونهبا وتقتيلا , وطلع الخليفه دة فوق المقطم , فسمع الناس تحت بتصرخ وتستغيث , فسال اللى حواليه , مين دول ؟؟ وايه اللى بيحصل ؟ فقالوله دول عسكر المغاربه بتوعك بيقتلوا فى الناس , فقال لا حول ولا قوة الا بالله ونزل لقصرة , وبعدين طلع تانى يوم وسمع الصراخ وسال نفس السؤال وبعدين قال ايه الافترا دة ؟ حد يعمل كدة برضه ؟؟؟ الناس دول معندهمش دين ! معندهمش رحمه !!! , ونزل تانى , وهكذا لعدة ايام ...

دة نموذج , والعينه بينه , وعلى عينك ياتاجر ...

وظل الفاطميين يصنعون حاله من التوازن بين الترك والسودانيين والمغاربه بهدف تحجيم نفوذهم وتهديد كل منهم بالاخر ....

وفى عهد الحروب الصليبيه ضعف خلفاء الفاطميين واصبح الحل والعقد فى ايد وزائهم حتى تقاسم النفوذ كلا من الوزيران شاور و ضرغام , وتنازعوا على السلطه فى البلد فواحد فيهم لجأ للصليبيين يستنجد بيهم ييجوا يساعدوة والتانى بالمقابل لجأ لنور الدين محمود اللى رفع رايه الجهاد ضد الصليبيين فى الشام , فبعت لمصر اسد الدين شيركوة وصلاح الدين الايوبى , اللى نجحوا فى فى القضاء على محاولات التدخل الصليبى , وتقلد اسد الدين السلطه فى مصر وبعد منه صلاح الدين الايوبى , كل دة كان تحت سلطه الخليفه الفاطمى الضعيف , وبعد فاته حكم صلاح الدين مصر و حرر بيت المقدس واسس دوله متراميه الاطراف تشمل مصر والشام واجزاء كبيرة من شبه الجزيرة , اطلق عليها الدوله الايوبيه , وبدأ صلاح الدين فى القضاء على الفرق العسكريه التابعه للفاطميين واحل مكانها المماليك الاسديه ( نسبه لعمه اسد الدين شيركوة ) وبعض احرار الاكراد بالاضافه لمماليكه الذين اشتراهم لنفسه ..

والغى صلاح الدين دوله الفاطميين وخطب للخليفه العباسى فى الجمعه ( كان الدعاء فى خطبه الجمعه وسك العمله اهم علامتين على خضوع الدوله لسيطرة الخليفه ) ...

وبعد وفاة نور الدين محمود خشى صلاح الدين من ان تدب الفرقه ووحد مصر والشام تحت قيادته وبدأ رحله جهادة ضد جيوش الصليبيين ..
وبعد وفاة صلاح الدين حدثت الكثير من النزاعات بين المماليك لتوليه من يروق لهم من بنى ايوب , كما استغل خلفاء صلاح الدين فرق المماليك وضربوا بعضها ببعض , وتوفى الملك العادل والملك الكامل اللى تولوا السلطه بعد صلاح الدين , وجه بعدهم الملك الصالح نجم الدين ايوب حكم مصر , وكان مجىء الصالح نجم الدين للسلطه يرجع بفضل اساسى للمماليك مما دفعه للاستكثار من شراؤهم بشكل ملفت حتى اصبح اغلب جيشه منهم وجعل منهم بطانته حرسه الخاص .

وبما ان المماليك اصبحوا طوائف كتير تصارع بعضها بعضا , فخشى نجم الدين من الاقامه فى القاهرة مخافه ان ينقلب باقى المماليك عليه ( مماليك الملوك السابقين ) , فاسكن مماليكه الخاصه ( اللى اشتراهم بفلوسه ويضمن ولائهم يعنى ) فى جزيرة الروضه وبنى فيها قصر واحاطه بسور وسكن فيه , ومن هنا جائت تسميه ( المماليك البحريه ) اللى اسسوا دوله المماليك الاولى بعد اندثار دوله الايوبيين ...
المماليك البحريه سرعان ما تجلت مقدرتهم وكفائتهم العسكريه فى صد حمله لويس التاسع ونجاحهم فى أسرة , فبينوا انهم على قدر هائل من الكفاءة والشجاعه والاقدام .

طب ايه اللى حصل , اللى حصل ان وقت مجىء حمله لويس كان الملك الصالح مريض فامر وزيرة فخر الدين يوسف انه يقود الجيش بهدف منع الصليبيين من النزول فى دمياط , الا انه فشل ونجح الصليبيين فى الاستيلاء على دمياط , واشتد مرض الصالح نجم الدين ومات .
وطبعا كلنا عارفين القصه بتاع شجرة الدر لما اخفت خبر موته , نظرا للظروف الحرجه وخوفا من استغلال الصليبيين للفرصه وتقدمهم اكثر داخل البلاد , وفى نفس الوقت بعتت لتوران شاة ابنه انه ييجى علشان يخلف ابوة , الا ان الصليبيين عرفوا الخبر مع الاسف وتقدموا للمنصورة ونجحوا فى دخولها ..
الا ان توران شاة كان جه مصر وقاد مماليك والدة واعد خطه محكمه نجح من خلالها فى هزيمه الصليبيين واسر اعداد ضخمه منهم , على راسهم لويس التاسع نفسه .

وبعد النصر هنلاقى ان توران شاة اتغر ونسب النصر لنفسه فقط وتجاهل مجهودات مماليك ابيه بل انه اراد التخلص منهم واحلال مماليكه الذين اصطحبهم معه من حصن كيفا مكانهم ولما احتج المماليك البحريه بدأ فى ابعادهم عن المناصب المهمه وامر باعتقالهم , حتى روى عنه انه اثناء نوبات سكرة المتكررة كان بيسب المماليك ويشتمهم ويتوعد بالقضاء عليهم , وكان بيصاب بنوبات هياج ويقطع شموع القصر بسيفه ويقول انه هيحصد روس المماليك زى ما بيحصد الشموع دى بسيفه , مش بس كدة , لا دا كمان تنكر لشجرة الدر زوجه ابيه واتهمها باخفاء ثروة ابيه وطالبها بالمال وهددها مما دفعها للشكوى لقادة المماليك البحريه الذين يخلصون لها على اعتبار انها زوجه استاذهم .

وبالطبع غضب منه المماليك وعزموا على التخلص منه قبل ما يتخلص هو منهم , وقرروا قتله , وادى اللى حصل بالتفصيل :
اللى تزعم المؤامرة دى ايبك واقطاى وبيبرس وقلاوون , فلما كان توران شاة فى فارسكور بيحتفل بنصرة على الصليبيين , هجم عليه بيبرس فى خيمته وضربه بالسيف فتلقى توران شاة الضربه بيدة فقطعت اصابعه , وخرج يجرى من الخيمه وهو مجروح , وكان امامه برج خشبى عالى على النيل , كان اقامه ليجلس فيه , يستمتع بالمنظر يعنى وكدة , فجرى ناحيه البرج وتسلقه واحتمى فيه , فحاصرة بيبرس واقطاى وباقى زعماء المماليك وولعوا فى البرج الخشب , ولما وجد توران شاة نفسه بيتحرق فنط فى النيل وظل يسبح طلبا للنجاة , فضربوة بالنشاب من على الشط , وهو يستغيث ويتوسل اليهم وعرض عليهم التنازل عن العرش مقابل انهم يتركوة يرجع لاقليمه السابق , فمحدش عبرة , وساعتها نط بيبرس وراة فى النيل ودبحه بسيفه !!!!!
ومات توران شاة جريح محروق غرقان مطعون مذبوح , وظلت جثته فى النيل 3 ايام بدون ان يجرؤ احد ان يدفنها , الى ان تشفع فيه الخليفه العباسى , فحملوة الى الشاطىء ودفنوة ...

ها

ايه رايكم فى الموته دى ؟؟؟

وبكدة انتهى حكم الايوبيين فى مصر ...

__________________________

ملحق :

- الصورة تمثل حدود دوله صلاح الدين الايوبى ...

- سامراء : سر من رأى , تقع على بعد 125 كيلومتر شمال بغداد ..

- احمد ابن طولون : واحد من ضمن الاتراك فى البلاط العباسى , زوج امه كان قد ولاة الخليفه العباسى على مصر , وآلت بعد ذلك الى ابن طولون وتولاها ليحكمها من قبل العباسيين , الا انه استقل بها عنهم واسس دوله منفصله حكمها من عام 868 - 884 ميلاديه , انشأ مدينه القطائع واقام بها مسجدة الشهير , واقام بمصر المدارس والمستشفيات , واقام قصر ضخم له اربعين باب , كان موجود مكان ميدان القلعه حاليا , الا انه اندثر تماما من زماااااااان ...
وتقع مدينه القطائع مكان احياء القلعه والسيدة زينب .

- الديلم : سكان اقليم جبلى يدعى جيلان , يقع شرق اذربيجان والعراق , وكانوا وثنيين الا ان الاسلام انتشر فيهم وشكلوا موردا خصب للجنود المرتزقه .

- ابو بكر محمد ابن طغج الاخشيد : برضه تولى ولايه مصر وبعدين استقل بيها واسس دوله منفصله , والراجل دة اصله من مكان يدعى ( فرغانه ) اللى هى طاجيكستان الان , حكم مصر فى 935 ميلاديه

- البربر : لقب كان يطلق قديما عل سكان منطقه المغرب العربى والشمال الغربى الافريقى ..

- اسد الدين شيركوة : عم صلاح الدين الايوبى , من اصل كردى , وتعنى كلمه ( شيركوة ) اسد الجبل , كان اسد الدين هو واخوة شغالين عند قائد شرطه بغداد وكان ولاهم على قلعه تكريت , الا انهم ساعدوا عماد الدين زنكى اثناء مرورة منهزما فى اراضيهم بعد دخوله فى بعض المعارك , فساعدوة واعطوة سفن يعبر بيها نهر دجله علشان يوصل لمدينته ( الموصل ) , الا ان قائد الشرطه كان فى عداء مع زنكى فغضب على شيركوة واخوة وقرر التخلص منهم , فذهب احد جنودة وتحرش بفتاة من عائله شيركوة , وهى اشتكت لشيركوة اللى نزل بدورة واتخانق مع الجندى , فالجندى رفع عليه السلاح فقتله شيركوة , ودى كانت التلكيكه اللى هيقضى بيها صاحب الشرطه عليهم , ففر شيركوة واخوة وراحو لزنكى فى نفس الليله اللى اتولد فيها صلاح الدين , واكرمهم زنكى وضمهم الى قوادة , وبعد وفاته عمل شيركوة بدورة فى خدمه نور الدين محمود ابن زنكى بعد ان ساعدة فى السيطرة على قوات ابيه , يعنى من الاخر شيركوة دة كان راجل شجاع وبطل , وقائد عسكرى دكر , وانسان مخلص وامين , يكفيه انه تصدى لجيوش الفاطميين والصليبيين لمدة 3 اشهر ونجح فى فتح مصر وجيشه كان لا يزيد عن الف رجل !!! . ..

- احرار الاكراد : زى ماقلت قبل كدة , ان صلاح الدين اصله كردى ...

- الملك العادل : احد سلاطين الايوبيين , حكم من عام 1200 - 1218م

- الملك الكامل : احد سلاطين الايوبيين , حكم من عام 1218 - 1238م

- الملك الصالح نجم الدين ايوب : احد سلاطين الايوبيين , حكم من عام 1240 - 1249م

- منهم : تم تسميتهم بالمماليك البحريه الصالحيه , البحريه نسبه لسكنهم فى وسط النيل , والصالحيه نسبه الى زعيمهم الملك الصالح نجم الدين ايوب ....

- جزيرة الروضه : جزيرة فى النيل بين القاهرة والجيزة , يقع فيها الان حى المنيل ...

- النشاب : مصطلح قديم كان يطلق فى عهد المماليك على السهام ....

( 1) - مدخل , الجزء الاول ..

كان لظهور الديانه الاسلاميه فى شبه جزيرة العرب ابلغ الاثر فى مجريات الاحداث بعد ذلك , فقد كان الدين الاسلامى هو المحور الاساسى لانشاء امبراطوريه عظيمه متراميه الاطراف , وكلمه امبراطوريه غير كلمه دوله , يعنى ياجماعه علشان مجموعه من البشر تتحد وتشكل دوله , فلابد من اهداف ومصالح مشتركه , او حتى سمات مشتركه , زى الارض مثلا او العرق او المصالح , انما علشان تشكل امبراطوريه فالموضوع بيكون اصعب بكتير جدا , لانك فى الحاله دة بتشكل كيان ضخم من عدة دول واعراق وجنسيات ولغات مختلفه تمام الاختلاف بالاضافه لصعوبه السيطرة على ارض متراميه الاطراف ومتباينه الطبيعه الجغرافيه ....
ولذلك فتكوين امبراطوريه بحاجه لفكرة , فكرة على درجه من القوة بحيث تتمكن من التغطيه على كل هذة الاختلافات والتباينات , فكرة يلتف ويتحد حولها الجميع ولا يعلو عليها صوت اخر ..

فى حالتنا كانت الفكرة دى هى العقيدة الاسلاميه اللى كانت البذرة والمحور والقاعدة للامبراطوريه العظيمه دى , اللى بدأت فى مجتمع المدينه المنورة واللى شكل النواة لهذة الامبراطوريه , وفى عهد الرسول عليه الصلاة والسلام اتسع نطاق الدوله دى ليشمل مساحات ضخمه من شبه جزيرة العرب .

الا انه كان فيه شىء ضرورى ناقص الا وهو ان كل المجتمعات دى عبارة عن مجتمعات قبليه لا تشكل حضارة او كيان اقتصادى , لان علشان تعمل امبراطوريه ضخمه لابد من موارد وثروات كبيرة بالاضافه لموارد بشريه كثيفه ودول مكانوش موجودين اياميها , الا ان الدوله نجحت واستمرت نظرا للمثاليه والعداله اللى كان بيتمتع بيها المجتمع الاسلامى حينها .

وفى عهد الخلفاء الراشدين كان فتح مصر والشام هو بشير الخير والضوء الاخضر للاتساع السريع والمذهل لهذة الامبراطوريه , فالشام ومصر وفروا لها موارد ضخمه , موارد من كل الانواع سواء زراعيه او صناعيه او ماليه او بشريه , وعلشان كدة هنلاقى ان معدل الاتساع بدأ يزداد بشكل مطرد ابتداء من عهد سيدنا عمر بن الخطاب .
كما ان القضاء على دوله الفرس وكسر شوكه الروم اخلى الساحه للامبراطوريه الوليدة ومنحها مساحات ضخمه من الارض ...

طيب , انا شخصيا شايف ان الدوله دى مكانتش ماشيه بشكل سليم ونموذجى ميه فى الميه وماكانتش دوله اسلاميه صرفه تخضع سياساتها للدين الحق , الا فى عهد ابى بكر وعمر ..
واستثنائى لحكم عثمان وعلى بن ابى طالب , ليس طعنا فيهما لاسمح الله , وانما لان فترات حكمهما شهدت العديد من الفتن والقلاقل , وكانت بدايه تحكم السياسه فى الدين , وتمثل دة فى ظهور العديد من الطوائف التيارات السياسيه اللى كانت بتاخد من الدين ستار لها بل ومبرر لسلوكياتها ..

بوفاة سيدنا على انحرفت دفه الحكم تماما بسيطرة بنى اميه عليها , فبعد ان كانت دوله دينيه يحكمها الاصلح , اصبحت مملكه تحكمها عائله معينه وتتوارثها جيلا بعد جيل , اينعم خط الفتوحات والجهاد كان مستمر والايجابيات كانت كتير بس انا بتكلم فى النظام نفسه , المبدأ اللى قامت عليه الدوله ..
- يعنى بعد ما شفنا عمر قال للناس فى المسجد وطلب منهم يقوموة ان اخطأ , فقام شخص وقال انه لن يقومه الا بهذا واشار لسيفه ..
دى كانت دوله الخلافه .
- وبعدين ايام معاويه ابن ابى سفيان داهيه العرب , قام واحد من الناس وقاله ( بسخريه وتهكم ) انه كثير اللحم والشحم , مررب يعنى , زى الست والدته , فرد معاويه ببرود وقال يرحمها الله !
دى كانت مرحله انتقاليه .
- بعدها لما بدأ النظام الواراثى بتنصيب يزيد ابن معاويه , نجد ان هناك من هدد الناس بان يبايعوا هذا ( اشارة الى يزيد ) فمن ابى فهذا ( اشارة الى سيفه ) ....

يعنى الدوله كانت نموذجيه فى عهد الرسول عليه الصلاة والسلام ومن بعدة ابا بكر وعمر رضى الله عنهما ..
وبعدين دخلت فى مرحله فتن وتيارات سياسيه فى عهد عثمان وعلى ..
وبعدين دخلت فى فترة انتقاليه فى عهد معاويه ..
ثم تخلت الدوله عن اهم ثوابتها ابتداء من عهد يزيد , واصبح الدين العوبه ووسيله فى ايدى الحكام , وان كانت الخطوط الرئيسيه كالجهاد والفتوحات استمرت كما هى زى ماقلت , الا ان النخبه السياسيه كانت فاسدة بنسبه كبيرة ....

ولذلك ولتعدد التيارات السياسيه وتمسك بنى اميه بالسلطه واستئثارهم بها , كان لابد من ايجاد قوة عسكريه تحميهم , ودى الفكرة او المعضله اللى هنلاقيها فى كل عصر بعد كدة ..

ايام الامويون ولان الدوله كانت واحدة فكان كافى جدا اتخاذ اجرائين , الاول هو ايجاد ولاة موثوق فى ولائهم وطاعتهم لبنى اميه , وايضا مشهورين بالدهاء والعنف والقسوة , ينفذوا العمليات القذرة ويقمعوا الاقاليم الغير مستقرة ويشكلوا تهديد لكل من تسول له نفسه الخروج عن سلطه بنى اميه , ودول كقادة كان اشهر نموذج لهم هو الحجاج ابن يوسف الثقفى , وكقوة عسكريه كان النموذج هو جيش الشام ......
دة كان كافى , مؤقتا , لان استئثارهم بالسلطه والنزعه القبليه العربيه اللى كانت عندهم قلبت ضدهم العديد من اهل البلدان المفتوحه وخصوصا بلاد فارس , ولما ضعفت قبضه بنى اميه وضعف حكامها , بدأ بنى العباس فى جمع العديد من الاقاليم تحت زعامتهم , وزعموا كالعادة انهم عاوزين يقيموا الحق والعداله , وبالفعل نجحوا فى انتزاع سلطه بنى اميه , وقامت دوله بنى العباس ..

والطبيعى اللى بيحصل فى الظروف اللى زى دى :

اولا - لابد من التخلص الكامل من كل بنى اميه ومن يمت لهم بصله , وبالفعل بدأت حمله تطهير واسعه للقضاء على بنى اميه , ومن كان يعاونهم ايضا , حتى انهم قتلوا والى مصر الاموى حينئذ ووضعوة داخل بطن حمار واشعلوا فيه النيران ...
الا ان فيه طفل صغير هرب منهم هو واخوة وفضلوا يطاردوة الى ان حاصروهم على ضفه نهر الفرات وهنا قرر الطفل انه يقفز فى النهر بينما رفض اخوة وخاف , وبالفعل نط الطفل دة فى النهر وسبح للضفه التانيه من النهر وشاهد بعينه اخوة وهو يذبح على الضفه الاخرى .
الطفل دة هرب وقطع الشام كله وشمال افريقيا بالكامل بدون ان يتمكن العباسيين من القبض عليه والتجأ لبعض قبائل المغرب العربى , وبعدها عبر مضيق جبل طارق ووصل للاندلس ( مكانش اسمها الاندلس لسه , ومكانتش حضارة , بل عدد من القبائل والتجمعات البشريه ) ونجح فى انه يوحد الارض دى تحت قيادته وشكل واحدة من اعظم الحضارات الاسلاميه واللى استمرت بعدة اكتر من 700 عام .
الشخص دة اسمه عبد الرحمان الداخل , واطلق عليه اعدائه العباسيين انفسهم لقب ( صقر قريش ) اجلالا واحتراما لشجاعته وموهبته الفذة ...

ثانيا - من المعروف ان اى ثورة عندما تثبت اقدامها تبدأ فى التهام اولادها , وبما ان حكم بنى اميه نشأ على اقليه ارستقراطيه , فحكم بنى العباس نشأ على دعم الاغلبيه الشعبيه , خصوصا فى بلاد فارس , وكان اول ضحيه هو ابو مسلم الخُرسانى القائد العسكرى الفذ الذى قاد جيش بنى العباس لانتزاع السلطه من الامويين !!!!!
وبدأ العباسيون فى التخلى تدريجيا عن حلفاؤهم الذين ساعدوهم فى بدايه امرهم , وانتقل الخليفه المأمون من ( مرو ) الى بغداد , وسائت العلاقه بين اهل خرسان وبين العباسيين , ولما كان اهل خرسان يشكلون عماد القوة العسكريه للعباسيين , فقد وجد خلفاء بنى العباس فى ذلك خطورة بالغه على سلطتهم ...

طب يروحوا فين ؟؟؟

العرب ؟؟؟
مينفعش لان النفوذ العربى فى اروقه السلطه ضعف وتضائل للغايه بعد القضاء على دوله بنى اميه , كما ان العباسيين لايثقوا فى ولائهم ..

طب ايه الحل ؟؟؟

يعملوا ايه العباسيين ؟؟

الاجابه فى البوست القادم ان شاء الله ...

ملحق :

1- خرسان ( بضم الخاء ) , اراضى دوله فارس فى اسيا , وانتقلت الى المسلمين لاحقا بعد فتحها , وتقع مكان دوله ايران حاليا وشمالها ايضا , وكانت تشكل اضخم الاقاليم الاسلاميه ...

2- الصورة تمثل احد رايات العباسيين , والتى اشتهرت باللون الاسود .

استفتاح تااااانى

السلام عليكم ,

اولا انا اسف جدا انى اتاخرت فى السلسله دى بس دة كان لظروف خارجه عن ارادتى , وعلى اى حال انا رجعت اهو الحمد لله ,

قبل ما ابدأ احب اعرفكم على النظام اللى هشتغل بيه , انا هبدأ بتاريخ المماليك , مش من اول الفتح الاسلامى , ودة لانى شايف ان فترة حكم المماليك كانت من اعجب فترات التاريخ المصرى واكثرها اثارة , كما ان الفترة دى هتديكم مفاتيح كتير لشخصيه الانسان المصرى وهتذهلوا من التشابه الرهيب بين مصر اياميها ومصر ايامينا ..

طيب لما اتكلم عن الفترة دى هضطر اعمل كذا حاجه

التاريخ كلما كان مختصر كلما كان ممل , ودة على عكس المتعارف عليه , وانا لا اؤمن بالتاريخ المختصر او تاريخ ( النقاط والعناصر ) بتاع مناهج التربيه والتعليم دة , وكمان لا اؤمن بالتاريخ السياسى والتاريخ الاجتماعى , فالتاريخ فى وجهه نظرى وحدة واحدة لا تتجزأ باى حال من الاحوال ..

باختصار انا عايز اعيشكم فى وسط الناس دى , بحيث لما تسترجع التاريخ دة تحس انك بتفتكر زكريات قديمه من حياتك ...

طب دة هيستدعى انى اتكلم بشىء من التفصيل ودة هيكون صعب نظرا لكثافه الاحداث فى تلك الفترة وكمان نظرا لوعورة المصطلحات المتداوله فى تلك الاوقات ....

انا لا هختصر ولا هبدل المصطلحات , عايز تعيش اياميها يبقى تتكلم زى الناس ماكانت بتتكلم وتلبس زى ماكانوا بيلبسوا ..

بس عندى فكرة كويسه
بالنسبه لمشكله كثافه الاحداث فأنا هبدأ ( آسفا ) بنشر سرد مختصر واجمالى لتاريخ دولتى المماليك البحريه والبرجيه بحيث يكون فى ذهنك ترابط هيكلى للفترة دى بوجه عام , بحيث لما نخش فى التفاصيل بعد كدة محدش يتوة ..

بمعنى

كل بوست هيتكلم عن ملك او سلطان
ولما نقفل الفترة كلها هنبتدى ناخد مقتطفات من التاريخ المملوكى ونناقشها بشىء من التفصيل الممل , لان طبعا مش هيكون من الممكن اننا نلتزم بسرد تفصيلى متتابع للتاريخ فى هيئه بوستات , كدة عاوزين ولا الف سنه علشان نخلص ..

يعنى هنتكلم اجمالا وبعدين نركز على نقط معينه , ودة معناة ان الموضوع محتاج متابعه , علشان لو بوست سقط منك ممكن تدوخ بعد كدة
:D

بالنسبه لمشكله الالفاظ والاصطلاحات فانا هكتب الالفاظ الغريبه بلون مخالف وفى اخر البوست هكتب شرح وتفسير مختصر لكل مصطلح من دول .....

وطبعا قبل كل شىء لازم ابدأ ببوست الفذلكه التاريخيه المعتاد وفيه هتكلم بوجه عام عن نقاط معينه فى تاريخ ماقبل المماليك , هنكون محتاجينها فى موضوعنا ...

اهم حاااااااااجه
المتابعه
محدش يسقط بوست , انا بقول اهو ......

ايه ؟؟؟
مين ؟؟؟
انا قلت الكلام دة فى البوست اللى فات ؟؟
اة فعلا , بس هو مش بالظبط يعنى , عموما بكرة ان شاء الله هيكون بوست الفذلكه جاهز

ادعولى بقى
يلا
استعنا بالله