الأربعاء، 13 مايو 2009

استفتاح



بسم الله الرحمن الرحيم
انا بقالى اكتر من شهر فى المدونه دى ولحد دلوقت مكتبتش ولا بوست
بصراحه متردد
مش فى المواضيع , لأن المواضيع مافيش اكتر منها
انا متردد فى المنهج
المنهج اللى همشى عليه
طب ايه رايكم نغير التاريخ ؟؟؟
لا
مش نغيرة يعنى نحرفه
قصدى نغير من نظرتنا ليه
اغلب الناس بتشوف ان التاريخ دة مادة سخيفه وممله جدااااااا
مع انه مش كدة خااااالص
بس هما معاهم حق فى وجهه نظرهم دى
لان اغلبيه المعالجات التاريخيه المطروحه فعلا بتعرض نفس المنهج الممل
ولاسيما المناهج الدراسيه
وما ادراك ما المناهج الدراسيه
بتاع اذكر وعلل وبما تفسر..
افتكر كان بيجيلى سؤال فى امتحان اخر السنه بيقول فيه :
ماذا تقول لنابليون عندما اقدم على اقتحام الازهر بالخيول ؟؟!!!
طب بالذمه دة سؤال يحطه انسان محترم ؟؟؟
____

عندى سؤال
ليه الاحداث التاريخيه مش بتلاقى اى متابع بينما لما بتتعمل فيلم عالمى مثلا بتكسر الدنيا والكل بيتفرج عليها ؟؟؟؟
اذن العيب مش فى الحدث نفسه
يعنى هو مش ممل , بل على العكس دة ممتع بشكل كافى لجذب متابعين
العيب فى اسلوب المعالجه
اسلوب معالجه سطحي جدا جدا بشكل مستفز يهتم بالجانب السياسى فقط ويتجاهل الشخصيات ذاتها لينصب فى اطار ضيق جدا من الاحداث
مش كدة وبس
لا دة كمان بيعالج النطاق الضيق دة باسلوب فى منتهى العقم
حد يابشر يعمل التاريخ فى نقط ؟؟؟!!!!
واحد اتنين تلاته والف به جيم ؟؟؟؟
__________

طب ياعم الامور انت عايز ايه بالظبط ؟؟؟
حاضر , هجاوب
انا انسان بعشق التاريخ
وشايف ان سبب دة مش انى كائن مريخى فضائى يحتوى على جينات غير بشريه
كل ما هنالك انى شوفته بعين تانيه غير العين اللى الاغلبيه بتشوفه بيها
ودة فتح لى قدر من المتعه والمعرفه لا تتخيلوة ...
كل ما هنالك انى عايزكم تشاركونى المتعه دى ( على الاقل )
يعنى اوريكم الاحداث بعينى
مش بعينى يعنى بوجهه نظرى
لا انا قصدى من الجانب الشيق اللى انا شايفه
تبقى المشكله الاخيرة
ودى فيا انا
هى انى اقدر اوصل اللى فى دماغى لدماغكم عن طريق الكتابه
ودى طبعا مشكله
لانى معنديش الملكه اللى تخلينى اوصل الاحساس بالكلام
فما بالك بالكتابه
دة سبب ترددى
بس هبدأ وامرى لله
ومعلش استحملونى شويتين تلاته
وكان قرارى انى ابدأ بتاريخ المماليك
لانى شايف انه اكتر فترات التاريخ المصرى ثراء وغرابه ومتعه فى نفس الوقت
وايضا لان دى اكتر فترة انا متمكن منها وعندى تسلسل كامل لاحداثها
بعكس التاريخ الاوروبى مثلا
وعلشان كدة هبدأ بيها
تاريخ المماليك صعب ومعقد وملىء بالمصطلحات المبهمه , واللى لا يمكن ايجاد مرادف معاصر مطابق لها
يعنى حتى تعريف المصطلحات دى مش دقيق
علشان كدة انا مش هينفع امسك حدث معين وافصصه بدون ما يكون عندك علم بالخلفيه السابقه ليه
وعلشان كدة كان لازم انى اشرح تاريخ المماليك شرح مجمل الاول , علشان لما نمسك نقطه معينه تكون الناس ( عايشه الجو صح )
اول حاجه لازم تنسوا الثقافه بتاع المسلسلات الفاكسه بتاعنا وتمسحوها من دماغكم لانها فى منتهى التخريف والتحريف وعدم احترام عقليه المشاهد
ابسط حاجتين انها كانت بالفصحى , مع ان العصور دى مكانش المماليك بيتكلموا بالفصحى ...
ثانيا الازياء كانت سخيفه , يعنى يكفى انك بتتكلم عن اى تاريخ علشان يجيبولك الزى الموحد بتاع المسلسلات اللى هو العمه والعبايه اللى بقصب وترتر
متفرقش اموى عباسى مملوكى
كله واحد
ودة اكبر غلط
لان الازياء ايام المماليك كانت اغرب مما تتخيلوا واروع بكتير
دول ابسط حاجتين ....
تانى حاجه
مافيش فى التاريخ شخصيات ابيض او اسود
يعنى متحاولش تصنف الناس الى طيب وشرير
لان اللون الرمادى كتير
والشخصيات المكلكعه فى التاريخ اكتر
وخصوصا فى عصر المماليك
لانهم فعلا كانوا شخصيات متناقضه للغايه وصعب تحليلها
فشغل التصنيف بتاع فلان كويس وعلان وحش مش هينفع هنا ....
تالت حاجه
ان المبادىء نسبيه
يعنى الحاجه اللى المجتمع دلوقتى بيعتبرها شىء مشين وعيب
ممكن تكون فى وقت ما شىء عادى بل واحيانا تقاليد متعارف عليها ....
اعتقد ان وجهه نظرى وصلت كدا ...

اوكيه ؟؟؟

اتفقنا

استعنا على الشقا بالله

انتظروا البوست الجاى

هناك 12 تعليقًا:

مهندس مصري بيحب مصر يقول...

هو انت جيت هنا

أستر يارب
:)

احمد سعيد يقول...

نعم ياعم المهندز

ايوة جيت هنا

مستر اكس فى كل مكان

خير

D:

Unknown يقول...

حلاوتك يا ابو سعيد
بداية موفقة و حلوة قوى
انت قلت كلام كتير ان كان نفسي فيه
لو مشوفتش مدونة كيارا و سلاسة اسلوبها فى عرض التاريخ مكونتش اتحمست ابدا و انت عارف انى اكسل مدون عرفه التاريخ و دى ممكن نعمل عنها بوست لوحده
احنا لازم نحط تعريف صح للتاريخ و نفهمه و نبطل النظرة التقليدية اياها
و كويس انك فتحت موضوع المماليك ده
عشان انا حتجنن و عندك شخصيات زى قطز انا حاسس اننا كلنا مش فاهمين حقيقته لأنه وصل للعرش بطريقة غريبة و تتنافى مع كونه صاحب مبادئ حسب ما قرأت
وانا قريب حرجع للكتابة عن التتار لكن قدامى احدث مملة جدا و كلها معارك و انا مش عارف اتعامل معاها
هموما انا مستنيك فى البوست الجاى

صوت من مصر يقول...

فى امتحانات

Kiara يقول...

ايوه ايوه هو دا الشغل

يا مراكبي يقول...

Good choice

Go on

حكاية لا تنتهي يقول...

ن قال ا التاريخ ممل ليس كذلك علي الاطلاق
فقط نحن بطابعنا نكره ما يجب علينا حفظه ليس الا
والدليل علي ذلك ان موسوعة وصف مصر الصادره عن مشروع مكتبة الاسره حققت الاعلي ارادات بكل المقاييس رغم انها عمليه جدا في اسلوبها وذلك لانها تثقيفيه وليست اجباريه علي الاطلاق
ننتظر هذا الجديد الذي تعدنا به لاني اشعر انه سيكو افضل ولكن كعادتي ساطلب منك المصدر مع كل موضوع تكتبه

احمد سعيد يقول...

حكايه لا تنتهى

____________________

وغير كدة كمان فيه اسلوب العرض الرخم والخنيق اللى احنا برعنا فيه فى مناهجنا الدراسيه واعلامنا المبجل

انا واثق ان شخص مثلا زى ميل جيبسون لو عمل فيلم عن شخصيه مثل محمد بك الالفى او غيرة , فى فيلم عالمى راقى

انا واثق انه هيحقق ايرادات عاليه فى مصر

مش علشان القصه مصريه , او الشخصيه مصريه , ولكن علشان اسلوب العرض الشيق واحترام عقليه المشاهد

عنك فيلم زى 300 مثلا

شوف عمل ايه فى مصر

على الرغم من انه بيكلم عن حضارة غريبه عننا وعصور قديمه جدا

بس اسلوبه شيق

طبعا بغض النظر عن المغزى السياسى والمغالطات التاريخيه


موضوع المصادر دة هو اللى معطلنى

لانه هيضطرنى اخد من كذا مصدر

مع انى كل المصادر اللى بعرضها بأذن الله هتكون مؤكدة وموثوق فيها

بس برضه

لضمان الحياد

ودة هيضطرنى اطلع تاريخ ابن كثير والمقريزى وابن اياس الحنفى
وبعض المستشرقين

وعينك ما تشوف الا النور بقى

اصلا علشان اطلعهم من الدولاب قصه وفيلم


انا لسه مطلعتش كتب اصلا

ولذلك بقول لعماد وكيارا

لو حد مجهز بوست

فياريت ينشرة

وميستنانيش

علشان شكلى كدة لسه قدامى كام يوم

تحياتى

Adam يقول...

احييكي علي اختيارك علي الموضوع الجميل

تحياتي

اتمني زياره مدونتي

ادم

لاسع افندى يقول...

مافيش فى التاريخ شخصيات ابيض او اسود
يعنى متحاولش تصنف الناس الى طيب وشرير
لان اللون الرمادى كتير
والشخصيات المكلكعه فى التاريخ اكتر


هو ده اللى انا مستنيه ولو كان ده منهجك اكيد هيكون بحثك محايد وواقعى اكتر واقرب للصوره الحقيقيه لا ن طو عمر الانسان متناقض وافظع الشخصيات ليها حسنات واطيب الشخصيات ليها عيوب لانهم ببساطه بشر


تحياتى

القمر الساهر يقول...

انا بحب التاريخ مع اني كنت علمي

بس كنت بستمتع بقراءته

بس قاطعته بعد الثانوية العامة

وشكلي هارجع اتابع معاك ان شاء الله

فى انتظااااار التوبيك ان شااء الله

احترامي

ياسر مدني ...دينامو الإخوان يقول...

انتظروا عوده ياسر مدتي للتدوين
القاكم بعد الامتحانات
وقصه ترك التدوين والعودة ليه

ياسر مدني
دينامو الاخوان