ايـــــــام زمـــــــان ... تاريخ

النحت

2010-10-14T06:09:00.001-07:00

الفن اللي تربع علي عرش الفنون حتي الان هو النحت (دا من وجهه نظري طبعا )بس فعلا انا بعشق المنحوتات لما الوحد بيبص للقطعه الفنية المنحوتة ياااااااه فن راقي جدا ودقيق جدا

هدف الفنان المصري من فن النحت :-

طيب ماتيجو نشوف الفنان المصري القديم كان ايه هدفه في فن النحت وقواعده زي ماشفنا في الرسم والنقوش

اول حاجه كان الهدف الاساسي له ان تنقلب هذه التماثيل والصور والنقوش الي اشكال حقيقة عند البعث " طبعا دا كان اعتقاده زمان " بس عارفين رغم انهم مش امنو بالله سبحانه وتعالى وكان عندهم الهه كتير لكن كان عندهم يقين بوجود بعث زي ماهتكلم باذن الله عن الحياه الدينية

(طيب طبيعي ان لما اقول انه كان معتقد ان التماثيل دي هتتحول انه هيصنع التمثال بالظبط تيبكال زي الشخص بالضبط وبنفس التفاصيل وهيكون واضح الملامح مش مبهم )

فقام بتوضيح عيون التماثيل والرسوم المنقوشة بحيث تحاكى الطبيعة فبياض العين كان من حجر ابيض " المرمر " والقرنية من البللور الشفاف وفي وسطه تحفر بؤورة صغيرة تملأ بمادة سوداء لتمثيل انسان العين .

كما انه نفذ الفنان القواعد السابقة والاتجاهات المستقيمة بحيث افتقرت التماثيل الحركة علي العكس التماثيل اليونانية .

فالتماثيل اليونانية كأنها صور اخذت من فيلم سينمائى بينما يستشعر المتأمل للفن المصري بالعظمة والوقار والخلود .

نجد ان المشاهد للفن اليوناني يستشعر نبض الحياه وحيويتها والسبب في هذا ان المصري اراد تمثيل الحياه كما ينبغى ان تكون بينما كان الفنان اليونانى يريد تمثيل الحياه كما هى في الواقع .

تطور صناعة التماثيل :-

لم يصل الفنان المصري الى غايته دفعة واحده ( لا كان واحده واحده لان مش في حد بيطلع السلم مره واحده ) فصناعة التماثيل لم تكتمل منذ بداية العصور فلم يصور الفنان انسانا معينا بل كان يصور مجرد انسان يمكن تمييزه عن الكائنات الاخري .

وفي عصر الاسرة الثانية تقدمت صناعة التماثيل ولكن اذا نظرنا الي اي تمثال نجد ان المادة المصنوع منها التمثال تسترعى انتباهنا اكثر من الانسان صاحب التمثال اي ان المادة التى صنع منها التمثال كانت تتغلب علي الفكرة وفي اخر عصر هذه الاسرة قربت الفكرة اكثر من ذي قبل بدأ التمثال يسترعي انتباهنا كممثل لشخص معين ومنذ ذلك الحين ارتقت صناعة التماثيل واكتملت الاصول الفنية ولكن كان لكل عصر مميزاته الخاصه .

مميزات الدولة القديمه : نجد انها تتميز بالوقار والعظمة وتشعر الرائى بأنه امام قطعة تمثل شخصية لها مجدها .

مميزات الدولة الوسطى : تتبين منها دلائل الصرامة والقوة ومضاء العزيمة إلا ان الجزء السفلي منها كان لايعتني به عناية تامة خاصة في اوائل ذلك العهد.

مميزات الدولة الحديثة : فتمتاز بالرشاقة وابراز تقاطيع الجسم في شئ من الليونة كما تمتاز باستطالة الوجه .

البوست الجاي باذن الله عن العمارة :)

وحشتني المدونة

2010-10-13T11:59:00.001-07:00

طبعا انا بعتذر ليكم اولاد

وللمدونة ثانيا

هجرتها للاسف ودي غلطة انا مش ممكن اغفرها ليا

بس الشغل والحياه خدونى

راجعو البوست دا عشان هكمل عليه قريبا جدا باذن الله

مقدمة

2010-03-15T17:05:00.000-07:00

بسم الله الرحمن الرحيم

الحقيقة مش هلاقى كلام ممكن أتفق معاه أكتر من الكلمة إللى كتبها أحمد سعيد فى إستفتاح

إحنا فعلا محتاجين نقرا التاريخ بشكل جديد

بل قبل كدا ...

محتاجين أصلا نقرا تاريخ

و إتهيألى برضه ممكن نتفق مع بعض لو قولنا إننا محتاجين نقرا

أول كلمة نزلت فى القرءان على الإطلاق كانت ( إقرأ )

أكيد دا ليله دلالات غير معدودة

بس إحنا أمة لا تجيد القراءة

علشان كدا مش عارفين نجيد الأوامر التالية عليها

مش مرتبين أولوياتنا كويس

و الدليل إن معظم الناس دلوقتى بتعتبر القراية هواية !!!!!!!

المفروض إن القراءة دى من الأساسيات مش الكماليات

و من بين كل الفروع إللى ممكن يتقرا فيها بيجى التاريخ بأهميته

المفروض ميبقاش التاريخ مجرد منهج دراسى محدود إمتحنت فيه و خلص

التاريخ دا درس خصوصى ببلاش للى عايز يعرف يتصرف إزاى فى الحاضر و يخطط للمستقبل

و درس ممتع وشيق كمان للى عايز يتمتع

و متعته أكبر لما نحكيه إحنا لبعض بعيدا عن القوالب المنمطة و التحيزات الإيدولوجية المعلبة

و أكيد شيء لطيف أما يبقى محور حديثنا هو حاجة مفيدة و مهمة

******

المعلومات إللى هتبقى فى البوستات .....الواحد قبل ما يكتبها إجتهد كتير فى إنها تبقى مظبوطة

فأى حاجة تبقى غير كذلك فهو تقصير غير مقصود و لو الإنسان إنتظر الكمال لأى عمل مش هيعمله

و الله من وراء القصد .......

إنهيار الخلافة الأموية

2010-03-15T16:22:00.000-07:00

كلنا عارفين إن الخلافة الأموية تم القضاء عليها على يد بنى العباس و إللى تولوا الخلافة سنة 132 هـ ، 750 م
و علشان نحكى قصة إنهيار الدولة الأموية صاحبة أكبر إتساع للخلافة الإسلامية يبقى ضرورى نذكر نبذة عن سلسلة حكامها :

1 ) معاوية بن أبى سفيان 662-680:

مؤسس الدولة الأموية كان والى دمشق و هو إللى طالب بدم عثمان بن عفان ( رضى الله عنه ) و حربه الشهيرة مع على بن أبى طالب معروفة للجميع ( رضى الله عنهما )

إستقرت ليه الخلافة بعد تنازل الحسن بن على عن حقه فى الخلافة سنة 41 هـ

*************

2 ) يزيد بن معاوية 680- 683 :

دا إللى حدثت فى عهده إحدى أكبر المآسى فى تاريخ دولة الإسلام ( موقعة كربلاء ) و إللى قتل فيها الحسين بن على و كثير من أهل بيت النبى
و من بعدها ثار عبد الله بن الزبير بن العوام و بايعه أهل الحجاز و اليمن و العراق و إنقسمت الدولة فترة طويلة

************

3 ) معاوية بن يزيد 683__ 684 :

تولى الخلافة 6 شهور فقط بعد كدا ترك الخلافة لأمر شورى المسلمين لحبه للعلم و الأدب و الشعر

**********

4 ) مروان بن الحكم 684-685:

كان حكمه قصير لكن من نسله جاء معظم خلفاء بنى أمية

*********

5 ) عبد الملك بن مروان 685-705

10 سنين ثبت فيهم الدولة الأموية و قواها و فى عهده تم القضاءعلى ثورة عبد الله بن الزبير على قائده المشهور بعنفه و جبروته ( الحجاج بن يوسف الثقفى )
و عرب الدواوين و صك العملة الإسلامية

*********

6 ) الوليد بن عبد الملك 705-715:

وصلت الدولة الأموية فى عهده لأقصى حدود إتساعها و بنى المسجد الأموى بدمشق

**********

7 ) سليمان بن عبد الملك 715-717:

لم يحكم كثيرا و مات

**********

8 ) عمر بن عبد العزيز 717-720:

خامس الخلفاء الراشدين

*********

9 ) يزيد بن عبد الملك 720-724

حاول يتبع خطى سلفه و لكنه لم ينجح

*********

10 ) هشام بن عبد الملك 724-743:

حكم 20 سنة إزدهرت فيهم العلوم و الفنون فى الدولة

*********

و من بعد هشام بن عبد الملك حكم أربع خلفاء أمويين مثلوا أخر أيام هذه الدولة

11 ) الوليد بن يزيد 743-744:

كان خليفة مجاهر بالفسق و التجديف و إجتمع عليه أعيان بنى أمية و قتلوه لعدم جواز صدور تلك الأفعال عن خليفة المسلمين

12 ) يزيد بن الوليد 744:

حكم فترة قصيرة حاول يصلح ما أفسده سلفه لكن كانت بدأت الثورات تدب فى جسد الدولة و العصبية القبلية بتاعة الجاهلية بدأت تنشب بين شعوب الدولة الموحدة

13 ) إبراهيم بن الوليد 744:

تولى الخلافة 6 شهور بعد أخوه و عندها خرج عليه مروان بن محمد و قتله و إستولى على الحكم

14 ) مروان بن محمد 744-750:

لقب أيضا مروان الجعدى و لقب كمان بمروان الحمار لإنه حكم 6 سنين كلهم ثورات و فتن و صبر فيها صبر الحمار ، كان يخرج من ثورة يدخل التانية ، ثورات من الخوارج و الشيعة و ثورات من أهل بيت أمية نفسهم

و لكن الثورة الأخطر إللى قضت عليه كانت ثورة بنى العباس

*******************

الثورة العباسية :

يرجع أصل العباسيين إلى سيدنا العباس بن عبد المطلب ، و علشان نفهم أبعاد الصراع فهو كان صراع بين قبيلتين كبار قوى فى الجنس و الشجرة العربية حتى من قبل الإسلام ، بنى هاشم و بنى أمية

لسا بنى هاشم ــ ممثلين فى العباسيين ــ لم ينسوا ما حل بأهل بيت النبى من أبناء على و فاطمة على يد بنى أمية ، و بنى أمية مستندين على شرعية الإجماع و أخمدوا بذلك كل الثورات ضدهم بمنتهى العنف

علشان كدا نقدر نقول إن الصراع بينهم كان بوجه من الأوجه صراع قبلى

كان رؤوس العباسيين عايشين فى العراق بينما بدأت دعوتهم أول ما بدأت فى خراسان فى إيرن على يد ــ أبو مسلم الخراسانى ــ

و فى الوقت إللى كان فيه مروان الحمار بيعانى فى إخماد الثورات المتعاقبة من الخواج و بنى أمية ظهرت دعوة أو مسلم سنة (129هـ = 746م

و بدأت قوات أبو مسلم تحارب قوات والى بنى أمية على خراسان و إللى بعت يستنجد بالخليفة فى الشام ، لكنه مقدرش يمدله يد العون ، بعت تانى يستنجد بوالى بنى أمية على العراق لكنه كان بيكافح الثورات و الفتن فى العراق

و العجيب إن الحرب فى خراسان كانت بتنادى بخلافة ( إبراهيم الإمام بن محمد بن على بن عبد الله بن العباس ) و كان ساعتها ساكن فى الحجاز و مشغول بالعلم و العبادة و ميعرفش حاجة عن القوات إللى بتحارب بإسمه
و لما مروان عرف إسم من تنادى به الثورة أمر بحبسه و سمه فى الحبس

و هكذا تجرى تصاريف القدر بإنهيار عجيب و غريب لدولة الأمويين
فبعد إنتصار أبو مسلم على والى خراسان بدأت جيوشة تتحرك نحو العراق
بسرعة شديدة و وصل الكوفة سنة 132 هـ و كان فيها أبو العباس السفاح و أبو جعفر المنصور و أعلنت البيعة و الخلافة على المسلمين لأبو العباس من الكوفة

و بعد إستتباب الأمر لأبوالعباس فى الكوفة أوفد عمه ( عبد الله بن على ) قائد للجيش إللى هيحارب مروان الحمار

و إلتقى الجيشين على ضفاف نهر الزاب و دا أحد روافد دجلة

و كان جيش مروان 120 ألف مقاتل بينما جيش عبد الله بن على أقل من ذلك ــ يقال عشرين ألف فقط ــ و لكن كان الأمويين فى حالة خذلان رهيبة و كانت دولة حان فعلا وقت زوالها

مروان قال لجنوده ( إن غابت شمس هذا النهار و لم يقاتلوا فالخلافة لنا و نحن نسلمها فى أخر الأزمان إلى المسيح عليه السلام ) و كان رأيه الإحجام عن القتال بينما قائد المسدوة ( و دا إسم العباسيين لإن راياتهم كانت سوداء ) كان مصر على القتال

و هنا حصل موقف عجيب

صهر مروان تقدم للقتال هو و من معه فرده مروان و شتمه ، لكن دا كان بدأ المناوشات و هنا كان لا مفر من القتال ، لكن كل ما الخليفة الأموى يؤمر طائفة من جنود جيشه غير المتجانس و المكون من طوائف عدة تحارب بلا قضية يقولوله قول للطائفة الأخرى تحارب و هكذا ...

لدرجة إنه رمى قدامهم كمية كبيرة من الدهب علشان يتقدموا للحرب ، مدوا إديهم خدوا الدهب و محدش حارب و هنا وصله إن ناس من إللى خدوا الدهب ممكن يسيبوا الحرب لإن غرض الحرب عندهم كان فقط غنيمة فأمر إبنه إنه يرجع لمؤخرة الجيش علشان يرد أى واحد يفكر يهرب من المعركة

يقوم يحصل إيه ......

إبنه رجع و هو حامل الراية على حصانه و زمان الراية دى كانت هى علامة الجيش فى الحرب ــ و دا طبيعى لإن دى جيوش تزيد عن مئة ألف و من غير وسيلة إتصال تغطى المساحة الواسعة إللى بتنتشر فيها ــ و لما الجنود من على بعد شافوا الراية بترجع لأخر الجيش إفتكروا إن الجيش بينهزم و بينسحب ...فأسرعوا بالهروب !!!!!

موقف فى منتهى الغرابة !!!!! و واقعة مضحكة و محزنة

و هنا خسر الأمويين الموقعة بدون حرب تذكر رغم إن جيشهم كان أكبر و الخلافة و مواردها كلها كانت لسا فى إيديهم و أسرعوا بعبور النهر بدون نظام و العباسيين فى أعقابهم و غرق من الجنود أكثر ممن قتله العباسيين

بعد الهزيمة العجيبة دى هرب مروان بمن تبقى معه من الجيش العظيم المنهزم إلى الموصل و لما وقف ببابها رفض أهلها السماح له بالدخول فهرب بعدها للأردن ثم إلى ( حران ) و دى كان إتخذها عاصمة له فى الشام بدلا من دمشق و أخذ أهل بيته و أمواله و هرب على فلسطين و بعدها على مصر
و كان رأيه إنه يهرب على مصر علشان يستعين بوالى مصر إللى هو يعتبر ولى نعمته و بجندها الكثيف و تبقى الشام أمامه لو حب يرجع تانى و تبقى شمال إفريقيا و الأندلس كمان خلفه لو هزم تانى و أهى كلها أملاكه !!

و بالفعل هرب و وصل لمصر .....

و كل دا و عبد الله بن على بيتبعه بقوات العباسيين لحد ما وصل دمشق و حاصرها ، و هناك ــ تخيلوا ــ كان فى دمشق لوحدها خمسين ألف جندى تانيين غير الجيش الأول و كانوا بقيادة أمير أموى تانى إسمه ( الوليد بن معاوية بن عبد الملك ) و فى وسط الحصار على دمشق ثارت فتنة بين جنود الأمويين فى فضل اليمينة على النزارية ودى حاجة قديمة برضه كدا من أيام الجاهلية و تفضل قبائل الجزيرة على بعضها البعض و الصراحة مكانش وقتها خالص لإن دا سبب إن العباسيين دخلوا دمشق و قتلوا أميرها الأموى .

و كدا وقف ( عبد الله بن على ) مطاردة مروان و تركها لقائد تانى هو ( صالح بن على ) و دا دخل ورا مروان لأعماق مصر و كان مروان لما هرب لمصر إستنجد بالوالى بتاعها لكنه خانه و لم ينصره بما معه من جند و قرر يترك أمره للعباسيين يخلصوا فى بعض

هرب مروان بجنوده الباقين لحد ما وصل قرية أبو صير فى الصعيد و واضح إن كل شوية كان مجموعة من جنوده بيتخلوا عنه لإن فى الأخبار إن جيش العباسيين كان بيلاقى منهم مجموعات و يحاربها و يقتلها على مسافات متباعد من أول دخوله مصر

المهم ....

وصل العباسيين لأبو صير و كان مروان مختبيء بأهل بيته فى كنيستها

و هنا مفارقة تانية عجيبة

عدد القوات إللى بقت مع مروان كان أكثر من عدد القوات إللى مع العباسيين رغم كل التشتت و الضياع دا

و لكن برضه كالعادة التخاذل هو ما أسقط هذه الدولة

العباسيين دخلوا أبوصير بالليل و لما شافواإنهم أقل عدد ....من قوات الأمويين قالوا لنفسهم إن النهار لو طلع عليهم و شافوا قلة عددهم هيفنوهم و بالتالى لجأوا لخدعة وهى إنهم ضربوا طبول الحرب بقوة و كبروا و نادوا بأعلى صوتهم ( يالثارات إبراهيم الإمام ) ــ إللى مروان حبسه و سمه ــ

و لما الأمويين سمعوا الضجة دى خافوا و إفتكروا إن العباسين معاهم جيش ضخم فبدأوا يهربوا تباعا و يسيبوا الخليفة لوحده و بلغ من جبنهم إن أولاده الإتنين هربوا و معاهم أربعة ألاف جندى لوحدهم و دول ليهم قصة تانية عحيبة بعد كدا من هروبهم لملك النوبة

نرجع تانى لمروان إللى كتب عليه القدر إنه يكون صاحب همة و نشاط لكن من حوله دائما يخذلوه حتى أقرب الناس ليه ، خرج مروان مع قلة يسيرة من جنده للقاء العباسيين و إللى أجهزوا عليهم و قتلوا الخليفة و قطع واحد من أهل العراق كان شغال بائع رمان رأسه و قطع لسانه و رماه على الأرض

و هنا جت قطة أكلت اللسان المقطوع و يمكن من هنا جات الكلمة المصرية المشهورة ( هى القطة أكلت لسانك ؟ )

و مع لحظة مقتل مروان بن محمد الحمار تم إنتهاء أجل دولة بنى أمية و محوها من خريطة الزمان بشكل عجيب و مثير للدهشة .

بكدا إنتهت دولة بنى أمية ...لكن زى ما قولت الموضوع مش بس صراع على الخلافة دى عملية ثأر كبيرة قوى و ضخمة بين العيلتين ، لسا العباسيين لم يرتضوا بثأرهم و لم يرووا غضبهم ممن رأوا فيهم مجموعة من القتلة و الظالمين .

و يمكن بيت الشعر إللى قاله أبو العباس السفاح لما وصلته رأس مروان بن محمد يعبر عن ذلك بقوة :

( لو يشربوا دمى لم يرو شاربهم ... ولا دماؤهم للغيظ تروينى )

قبل ما نكمل إنتقام العباسيين من بنى أمية نرجع تانى لأولاد مروان بن محمد إللى تركوه ليلا بأبو صير فى أربعة ألاف جندى

دول هربوا من الصعيد لبلاد النوبة و قعدوا فى حماية ملكها و إللى نصحهم بإنهم يفضلوا عنده علطول لكنهم قرروا يسيبوه و يروحوا السودان و هناك تعرضوا لهجمات قطاع الطرق و تفرق جيشهم الصغير و تشتت و بحماقة رأيهم لما قابلوا جبل كبير فى وسط الطريق قرروا إنهم ينقسموا نصين و يلفوا حوالين الجبل و يلتقوا فى أخره كل واحد فيهم على رأس نص الجيش ـ رأى عجيب فعلا ــ و لكن الفريقين لم يلتقوا بعدها أبدا إلا عند باب المندب فى الصومال و كان أحد الولدين ساعتها مات و التانى فضل على رأس 45 رجل هما كل من تبقى من الجيش الأول إللى كان مع مروان بن محمد و إللى كان عدده 120 ألف مقاتل !!!!!!

ومن المندب عبروا فى سفن التجار لليمن و من اليمن رأف بحالهم بعض التجار و حملوهم معهم لمكة علشان يحجوا و بعدها قبض على إبن مروان الوحيد الباقى و أرسل للمهدى ثالث خلفاء بنى العباس فى العراق و هناك حبسه و لم يعرف إذا كان قتله و لا مات فى حبسه

نرجع تانى نكمل الإنتقام الرهيب لبنى العباس .....

بعد مقتل الخليفة الأموى الأخير بدأ العباسيين يطولوا بإنتقامهم أبناء أمية من إللى مكانوش فى عيلة الحكم أى حد كان ينسب لأمية ــ و نقصد هنا أبناء البيت المروانى من بنى أمية و دا بيمثل فرع من فرع من الأمويين ــ أو يناصرهم كان مصيره التنكيل و بدأوا أتباع العباسيين يطاردوا الأمويين إللى بعد ما كانوا فى سدة الحكم أصبحوا بيهربوا و يتواروا فى البادية و الريف

و لكن تتبع الأمويين و قتلهم مكفاش ( عبد الله بن على )
و من ذلك إنه دعا أمراء و أعيان بنى أمية ممكن تبقوا على قيد الحياة لوليمة كبيرة بغرض التصالح معاهم و عطائهم الأمان و بالفعل عمل وليمة كبيرة على ضفاف نهر ( أبى فطرس بفلسطين ) حضرها 83 شخص من بنى أمية كانوا بيمثلوا أغلب القلة الباقية من رؤوس بنى أمية

و خطب فيهم (( مرحبا بأبناء الأعمام ، ما كنت أريدها فينا نارا أكلة ، إلا أن الشهوات دفعت جهالنا ، سامحهم الله ، إلى تحطيم الحمة بيننا و إنكم لأبرياء من الفعلة و قد لبستم ما خيط لكم فأرتعوا فى أمنى و عفوى ، يشهد الله أن مكانكم منى لفى الصميم ))

و رغم دهشتهم من تغير المعاملة بدأ الأمويين المأدبة و هما مستغربين لكن إندهاشهم دا مطالش كتير لإن فى وسط الأكل حاوطهم جنود العباسيين و السيوف فى إيديهم و لما سألوا عبد الله بن على فى رعب عن عهده

ضحك و قالهم (( و ماذا ترتجون يا بنى أمى ممن طوى السنوات على السنوات يرقب أن يمتعه الله بيوم يبيدكم فيه عن بكرة أبيكم ؟ ألا ودعوا دنياكم و توبوا إلى ربكم و أذكروا فاجعة كربلاء فينا ، فتاكم يزيد بن معاوية بطش منا بالحسين بن على و برهطه الأخيار حتى أناف منا على المائة و الخمسين . و هذه أخت كربلاء إن كنتم تذكرون ، فالهاشميون ذوى صبر طويل الأمد يا أبناء أعمامى ، إلا إنهم يتحينون الفرصة للإنتقام ))

و أمر ببدء المذبحة فأعملت فيهم السيوف و قتلوا جميعا و ذبحوا و أمر ببسط الفرش على جثثهم و قعد ياكل طعامه و بين الحين و الأخر يقوم يرقص فوق الجثث التى لم تغادرها الحياة بعد وهو يقول ( هذه أخت كربلاء ، إنتقم الهاشميون )

!!!!!!!!!!!

و بكدا تم القضاء على أغلبية الفرع المروانى من بنى أمية ــ نسبة إلى مروان بن معاوية ــ رابع الخلفاء الأمويين و تبقى منهم عدد قليل بعضهم من قضى حياته فى الخباء و بعضهم هرب للأندلس زى ما هنشوف بعدين مع صقر قريش عبد الرحمن الداخل

*********

كان إنتقام هذا الرجل ( عبد الله عبد على ) من الفحش بحيث إنه لم يكتفى بأحياء الأمويين بل توجه لموتاهم فكان أن أخرج عظام ورفات الخلفاء الأمويين وصولا إلى يزيد بن معاوية بن أبى سفيان و جلد عظامهم و أحرقها .

و أعتقد إن دا بقى أصل كلمة ( هطلع ميتينك ) يمكن يكون جه من هنا كناية عن التنكيل الشديد بالعدو لدرجة تطليع ميتينه !!!!

و يمكن يكون يوسف غالى كان متأثر بالقصة دى لما حب يعبر عن رغبته فى التنكيل الشديد بالشعب المصرى !!!!

**********

مدخل ( الجزء الثالث ) 3 -

2009-08-03T13:23:00.000-07:00

حقد الايوبيين فى الشام على مماليك مصر لقتلهم توران شاة وطمع كل واحد منهم فى مصر , دا غير ان امراء المماليك فى مصر كل واحد منهم برضه طمعان فى الملك , وكحل وسط اتفق الجميع على تعيين شجرة الدر فى العرش , حيث انها فى الاساس كانت جاريه تركيه اشتراها نجم الدين ايوب وبعد كدة اعتقها واتجوزها , فهى كانت اقرب للماليك بحكم نشأتها , دة بالاضافه لذكائها وفطنتها ومعرفتها بكل الامور الهامه فى الدوله , وتولى عز الدين ايبك التركمانى الصالحى اتابكيه العسكر , حيث قام بدور الشريك لشجرة الدر فى الملك...

اول حاجه عملتها شجرة الدر انها انعمت على الامراء والجنود واغدقت عليهم الاموال فأرضت الكبير والصغير , وبالتالى استكانت الامور وهدأت الجبهه الداخليه .
كانت دمياط لسه تحت يد الصليبيين مما يشكل خطر فى حال ارسال حمله صليبيه جديدة , فنجحت شجرة الدر فى الوصول لاتفاق معهم ينص على ما يلى :
- اعادة دمياط للمصريين
- الافراج عن الاسرى المسلمين
- التعهد بعدم مهاجمه السواحل الاسلاميه مرة اخرى
- دفع خمسمائه الف دينار لاطلاق سراح الملك الفرنسى وكتعويض عن الخسائر الناتجه عن الحرب
- يتعهد المسلمين برعايه مرضى الصليببين
- تحدد مدة المعاهدة بعشر سنوات

اللى حصل ان فيه فريق من المماليك كان مع تنفيذ باقى بنود المعاهدة حتى بعد استعادة دمياط ودول كان يتزعمهم شجرة الدر وايبك بينما راى فريق اخر ضرورة نكث المعاهدة وعدم اطلاق سراح لويس , اولا لكونه اطلع على عوراتهم وشاهد المماليك يقتلون سلطانهم !!!!!!
- وثانيا لمركزة الدينى الهام فى اوروبا ( الملك لويس كان قديس على فكرة ) لان دمياط اصبحت بالفعل فى ايدى المسلمين , والفريق دة كان يتزعمه اقطاى وبعض الامراء , الا ان فريق شجرة الدر هو الذى تغلب برايه فى النهايه .

بعد انتهاء الفيلم دة ابتدت شجرة الدر تحاول تثبيت مركزها فى مصر والتقرب بشتى الوسائل للعامه والخاصه والعسكريين والمدنيين على حد سواء , الا انها فشلت لان اهل مصر والمسلمين عموما لم يتقبلوا وجود امراة فى السلطنه , وتحرجت شجرة الدر وحرصت على عدم ظهور اسمها فى المنشورات والاوامر الرسميه او فى الدعاء على المنابر حيث كان يكتب ويقال : ملكه المسلمين والدة خليل امير المؤمنين , وصاحبه الملك الصالح , والمستعصميه ( نسبه للخليفه العباسى , من باب مسح الجوخ يعنى )
وقامت اضطرابات فى مصر وتظاهر الناس واتهمواها بالتساهل مع الصليبيين ( شعب محترم والله طول عمرة , يعنى لو كان حاكم مفترى وجبار مكنش حد فتح بقه ) وخرجت عليها بلاد الشام ورفض امراء الايوبيين هناك الدخول تحت سلطتها , وفى نفس الوقت لجأ اتباع شجرة الدر للخليفه العباسى فرفض مساعدتهم وقال لهم ان كانت الرجال عدمت عندكم فاخبرونا حتى نسير لكم رجلا ..

واستعد امراء الشام للزحف على مصر , ونظرا لخطورة الوضع كان مافيش غير حل واحد , انها تتجوز ايبك وتتنازل له عن العرش ودة بالفعل اللى عملته شجرة الدر وبكدة تولى ايبك ملك مصر واصبح اسمه السلطان الملك المعز عز الدين ايبك الجاشنكير التركمانى الصالحى ..

ايبك مكانش من اقوى الامراء ولا اشهرهم بل كان من الامراء المتوسطين وكان فيه من هم اقوى نفوذا منه زى اقطاى وبيبرس وقلاوون ( يعنى بيبرس مكانش امير درجه تانيه زى ما فى الفيلم ) الا ان ايبك كان صاحب دين ومروءة ورجاحه عقل , بالاضافه لان كل الامراء كانوا خايفين من بعضهم فاتفقوا على تعيين ايبك كحل وسط وآمن لجميع الاطراف , بحيث انهم يقدروا يعزلوة وقت ما يحبوا .

ايبك لما تولى السلطنه وجد امامه اربع اخطار تهددة وهى كالاتى :
- حصلت انتفاضه شعبيه ضد الحكم المملوكى بوجه عام
- مؤامرات باقى امراء المماليك ضدة وسعيهم للسيطرة عليه
- شجرة الدر
- اصرار الايوبيين فى الشام على الزحف لمصر والاستيلاء عليها من المماليك

ايه ياعم الكلام دة ؟ واحدة واحدة كدة ثورة ايه وبتاع ايه ؟؟

اقولكم
اول خطر كان متمثل فى قبائل عربيه كتير استوطنت مصر بعد الفتح الاسلامى واقامت فى مساحات كبيرة من الصعيد والشرقيه , واستقروا وعملوا بالزراعه , دول بقى احتقروا المماليك ورفضوا يخضعوا لحكمهم لانهم مماليك ومكانوش احرار , وشافوا انهم احق بملك مصر منهم , وبالفعل عملوا ثورة مسلحه تزعمها رجل اسمه حصن الدين ابن ثعلب , وكان فيه سبب كمان عجّل بالثورة دى , ان المماليك تعسفوا فى تحديد اسعار المنتجات الزراعيه وتلاعبوا باسعارها ( زى يوسف والى واباظه كدة ) وكانت النتيجه ان فلاحين كتير هجروا القرى ونزحوا الى المدن مما جعلهم وجها لوجه مع المماليك .
وبسرعه التف حولهم كثير من المصريين وشاركوهم فى الثورة لانهم لم يقبلوا ان يحكمهم سلطان جرى عليه رق , حتى انهم كانوا كل ما يشوفوا ايبك ينتقدوة ويشتموة ويسمعوة ما يكرة , وبالفعل اقام حصن الدين دوله مستقله فى مصر الوسطى والشرقيه لا تخضع لحكم المماليك , فبعت ايبك جيش بقيادة اقطاى للقضاء على الثورة وبالفعل عامل اقطاى الثورة بمنتهى الشدة والقمع ونجح فى هزيمه الثوار فى بلبيس , الا ان حصن الدين ظل مسيطرا على مصر الوسطى وفضل يحكمها الى ان تولى بيبرس الحكم فقبض عليه وشنقه .

طبعا رد الفعل الطبيعى لانتصار اقطاى هو ان نفوذ اقطاى زاد اكتر واكتر واصبح اقوى من الاول لدرجه انه طلب من ايبك يديله الاسكندريه وايبك مقدرش يقول لأ !!
وبدأ اقطاى يقوى نفسه اكتر واكتر وجمع كتير من المماليك حوله لدرجه انه بقى يهاجم ايبك ويشتمه فى كل جلساته مع الامراء , وسمى نفسه ببعض الالقاب السلطانيه , وسماة اتباعه الملك الجواد !!!..

طبعا ايبك مش هيسكت فبدأ هو كمان فى تكوين طائفه من المماليك خاصه بيه وسماهم المماليك المعزيه ( نسبه اليه حيث ان اسمه الملك المعز ) وقوى قطز مملوكه واعلى من شانه وعينه نائب للسلطنه , وطرد باقى المماليك من جزيرة الروضه ..

وزاد الموضوع قوى لما اقطاى خطب احدى اميرات البيت الايوبى فى الشام ليكسب مساندة امراء الشام الايوبيين وفى نفس الوقت يطفى على نفسه شرعيه البيت الايوبى , وطلب من ايبك انه يخلى له قلعه الجبل ( اللى هى القلعه بتاعتنا ) علشان يسكن فيها هو وزوجته حيث انها بنت ملوك ولا يليق بها ان تسكن فى غيرها ) وبكدة ظهرت نوايا اقطاى لان معنى تحكمه فى القلعه هو انه يسيطر على القاهرة كلها وبالتالى مصر , ودة اللى ايبك كان مستحيل يقبله , فلم يجد ايبك امامه حل سوى التخلص من اقطاى , وبالفعل استدعاة ايبك صباح يوم الاثنين 27 سبتمبر عام 1254ميلاديه الى القلعه بحجه مشاورته فى بعض الامور , و توجه اقطاى الى القلعه بصحبه بعض مماليكه , الا انه بمجرد دخول اقطاى من باب القلعه اغلقوا الباب خلفه ومنعوا مماليكه من الدخول وانقض عليه المماليك المعزيه وقتلوة وكان من ضمنهم قطز ( يعنى قطز مكانش قاعد على السلم برة زى ما فى الفيلم ) اما المماليك اللى كانوا برة اسرعوا لابلاغ باقى مماليك اقطاى بالخبر وبالفعل راح 700 من مماليكه الى القلعه لانقاذة , حيث انهم كانوا فاكرين انه لسه مماتش , ومن ضمنهم كان بيبرس البندقدارى وقلاوون الالفى وسنقر الاشقر . وحاصروا القلعه الا ان ايبك ظهر لهم من فوق الاسوار والقى عليهم رأس اقطاى , ففهموا انه مات وعرفوا ان ايبك رجل قوى ومش سهل زى ماكانوا فاكرين , وهنا خاف المماليك اللى ناصروا اقطاى على روحهم وقرروا الفرار من مصر وراحوا احتموا بامراء الايوبيين فى الشام , ومن ضمن من فر بيبرس , ومن تبقى منهم فى مصر قبض عليه ايبك وصادر امواله .

الا ان الاجراء دة سبب مشكله كبيرة وهو ان مماليك مصر انقسموا على بعضهم لمماليك بحريه ومماليك معزيه وفضلوا يعانوا من الصراع دة كتير حتى زحف المغول على مصر , كما ان المماليك اللى فروا للشام فضلوا يزنوا ليل نهار على امراء الشام الايوبيين انهم يهجموا على مصر ويقضوا على ايبك , وكان الكلام دة عند الملك الناصر صاحب دمشق , وبالفعل اوشك الموضوع ان ينقلب لحرب لولا تدخل الخليفه العباسى حيث توسط بين الطرفين لفض النزاع , لان خطر المغول كان على الابواب , وتوصل لحل وسط وهو ان يستعيد ايبك ساحل بلاد الشام وان لايأوى الملك الناصر المماليك الفارين , وفى ساعتها مخابرات المماليك عرفت الخبر ففروا بسرعه من دمشق واحتموا بمعيث الدين عمر الايوبى ملك الكرك , وبكدة حصل هدوء نسبى فى الجبهه الخارجيه وتفرغ ايبك بقدر اكبر للمشاكل الداخليه واهمها كان شجرة الدر نفسها :

الواقع ان شجرة الدر لما تزوجت ايبك كان دة لغرض انها تحكم مصر من خلف ظهرة , يعنى كان فى دماغها انه هيكون خاتم فى صباعها , وفعلا سيطرت شجرة الدر عليه فى اول عهدة لدرجه انها منعته من زيارة زوجته الاولى ام ولدة على ( دى كانت مراته الاولانيه مش التانيه زى ما الفيلم قال ) الا ان ايبك زهق من شجرة الدر ومن سيطرتها وخاف تغدر بيه فقرر انه يخطب لنفسه بنت بدر الدين لؤلؤ صاحب الموصل , ودة طبعا لم تقبله شجرة الدر , وكانت لسه كلمتها مسموعه عند المماليك البحريه فراسلتهم فى الشام وحثتهم ان يسرعوا بالهجوم على مصر , الا ان مخابرات ايبك تمكنت من اكتشاف الرسائل دى ووصلتها لايبك واطلعته عليها ..

فايبك قال مبدهاش بقى وعزم على التخلص من شجرة الدر هى كمان , الا انها سبقته وكانت اسرع منه , فبعثت له رساله رقيقه حونينه تستعطفه وتلعب عالوتر الحساس فى صدرة وان هو حبيبها ومش عارف ايه , وطلبت منه يزورها فى القلعه فى الليله دى .
وبالفعل نخ ايبك زى الطور وانخدع بكلامها وراح القلعه يزورها ( حيث انه كان هجر القلعه وسكن فى باب اللوق ) .
واثناء ماكان عمنا ايبك بياخد الدش المتين , كانت شجرة الدر خبت فى الحمام خمسه من الغلمان الخصيان , اللى هجموا عليه وقتلوة , وطبعا كان متوقع ان مماليك ايبك ينتقموا منها فحاولت اخفاء خبر قتله واشاعت انه مات بالليل لوحدة وعرضت الزواج على اكابر امراء المماليك علشان تحتمى بيهم الى ان تهدأ العاصفه الا انهم رفضوا .

وبالفعل تسرب خبر قتل ايبك للمماليك المعزيه اللى هجموا على القلعه للانتقام من شجرة الدر , الا ان بعض من تبقى من فلول المماليك البحريه ( اللى هما مش من اتباع ايبك ) وحاولوا يحموها فحبسوها فى احد ابراج القلعه حمايه لها من انتقام المماليك المعزيه ..
وكان الموضوع هيعدى , الا ان زوجه ايبك الاولى اصرت على الانتقام وفضلت تحرض المماليك المعزيه على قتلها , وبمرور الوقت ضعف المماليك البحريه امام ضغوط المماليك المعزيه وتخلوا عن حمايه شجرة الدر ..

ها وبعدين ايه اللى حصل ؟؟؟

اتشالت شجرة الدر هيلا بيلا واترمت قدام زوجه ايبك الاولى , فامرت جواريها انهم يضربوا شجرة الدر بالقباقيب ( القباقيب زمان كانت ايه , مرزبه , وكانت بكعب طويل كمان , يعنى ضربتها مميته ) وشاركت الزوجه الجوارى فى الضرب الى ان ماتت شجرة الدر , فشالوها ورموها من فوق سور القلعه وهى بملابسها الداخليه , وفضلت كذا يوم مرميه فى تحت القلعه وهجم عليها اللصوص وسرقوا ما تبقى من هدومها ( الغاليه الثمن طبعا ) وحتى الحلى والاساور مسابوهاش , فكان يروى مثلا ان الحرامى يحاول يفك الخاتم من صباعها فميقدرش فيقوم عامل اييييه ؟ يقوم قاطع الصباع وواخدة كله على بعضه , وهكذا يعنى , وبالمرة الكلاب الجعانه تحت القلعه مش هتسيب فرصه زى دى , فهجموا هم كمان على شجرة الدر علشان ياكلوا ويتغذوا !!!!

ودى كانت النهايه الاليمه لشجرة الدر ....

الطريف بقى فى الموضوع ان زوجه ايبك الاولى احتفلت بمقتل شجرة الدر وصنعت طبق حلويات لاول مرة وسمته باسمها , مازلنا احنا بناكله وبنعمله الى الان .

عارفين اللى هو ايه ؟؟

اة

ام على

--------------------------------

- التركمانى : نسبه الى اصله والبلاد اللى اتى منها .

الصالحى : نسبه الى الصالح نجم الدين ايوب , حيث انه كان من مماليكه .

- اتابك العسكر : امير الجيوش , وهو لقب تركى قديم مكون من كلمتان , الاولى ( اتا ) بمعنى الاب , والثانيه ( بك ) بمعنى امير , فيكون معنى المصطلح هو الاب الامير , وهى تعادل وزير الدفاع حاليا ...

- الجاشنكير : هو من يتذوق طعام وشراب السلطان قبله مخافه ان يكون به سم , وقد اتسعت سلطته تدريجيا الى ان اصبح مسؤلا عن كل ما يخص القصور السلطانيه ( زى زكريا عزمى حاليا كدة ) ..

- مصر الوسطى : مصر ابتداء من جنوب القاهرة ومنطقه الفيوم وصولا الى اواسط الصعيد .

- المعزيه : نسبه الى ( عز ) الدين ايبك .

- الموصل : منطقه بالعراق .

- القباقيب : زمان كانت كعوب القباقيب الحريمى عاااااااليه جدااااا وحادة ومدببه للغايه , وكمان كان القبقاب له كعبين , واحد من قدام والتانى من ورا , يعنى سلاح قاتل , ومحدش يسالنى هما كانوا بيمشوا بيها ازاى ....

(2) - مدخل - الجزء الثانى .

2009-07-18T10:56:00.000-07:00

السلام عليكم ,

فى البوست اللى فات قلت ان فيه مشكله خطيرة واجهت العباسيين ,
وهى ان العلاقه سائت بينهم وبين اهل خرسان ,
ودول اللى قامت الدوله على اكتافهم واتشكل منهم عماد الجيش ,
فاصبح من الضرورى ايجاد قوات بديله تدين بالولاء للعباسيين ,
ودة معادش موجود فى اهل خرسان دلوقت ..
وكمان العرب غير موثوق فيهم لان دول اللى قامت على دعمهم دوله بنى اميه الد اعداء العباسيين ,

طب يعملوا اييييييييييييه ؟؟؟

فوجد العباسيين الحل فى استقدام الرقيق الابيض من اسيا وتشكيل قوة مسلحه ضخمه منهم تدين لهم بالولاء وتساعدهم فى صد مطامع الاخرين , من هنا بدأت ظاهرة المماليك ( وان لم تكن سميت بهذا الاسم بعد ) .

غير معروف بالظبط متى بدات تلك الظاهرة نظرا لانها ظهرت بشكل تدريجى وغير مباشر , الا انه من المعروف ان الخليفه المعتصم هو اول من اعتمد عليهم بشكل كثيف وشكلوا اقوى دعائم الخلافه , ودة اللى كتب التاريخ بتسميه النفوذ التركى فى بلاط العباسيين , طبعا دول مش الاتراك اللى احنا عارفينهم لان دوله العثمانيين مكانتش دخلت حيز الوجود لسه , ولكن احنا بنتكلم عن منطقه وسط اسيا ومنطقه شمال وشمال شرق العراق لما كانت فيها كيانات وقبائل ودويلات كثيرة , قد يكون لهم علاقه ببلاد التركمان ( تركمانستان الان ) وبعضهم من جنس السلاجقه الاتراك ودول كان مكانهم شمال العراق تقريبا ومن بينهم انبثق العثمانيون فيما بعد ....

استكثرالمعتصم منهم علشان يحد من النفوذ العربى والفارسى , بل وقلدهم اعلى المناصب فى دولته وخصهم بقيادة الجيوش , ودة طبعا خلاهم القوة الرئيسيه فى الدوله , الا انه نظرا لقوة الخلفاء حينئذ , ظل الاتراك على ولائهم وخضوعهم لشخص الخليفه ...
وبدأ نفوذ الاتراك فى الزيادة حتى انهم تحرشوا وضايقوا سكان بغداد الى ان اشتكى اهل بغداد الى المعتصم بل وهددوة بالدعاء عليه فى صلاتهم , فاضطر انه يخرجهم من بغداد وبنى لهم مدينه ( سامراء ) واسكنهم فيها ..

ولما انتهى عهد الخلفاء الاقوياء وجه عهد الضعف والانحدار المعروف بالدوله العباسيه التانيه , وكثر الخلفاء الضعاف , فكان من الطبيعى ان ينمو النفوذ التركى على حساب الخلفاء , فبقينا نلاقيهم يعزلوا خليفه ويعينوا اخر بل واحيانا وصل بهم الامر الى قتل الخليفه نفسه , واستقل بعض امرائهم بولاياتهم زى ما عمل احمد ابن طولون فى مصر , ومش هنلاقى لوصف الوضع دة ابلغ من كلام المؤرخ ( ابن طباطبا ) بقوله :
كان الخليفه فى ايديهم كالاسير , ان شاؤوا ابقوة وان شاؤوا خلعوة وان شاؤوا قتلوة !!!!!!

وبالنسبه لمصر هنلاقى ان احمد ابن طولون نفسه سار فى نفس الدرب بعد ما استقل بمصر عن الخلافه العباسيه وبدأ فى الاستكثار من الجنود الاتراك والديلم ..
وبعد كدة لما اسس ابو بكر محمد ابن طفج الاخشيد الدوله الاخشيديه فى مصر نهج نفس الاسلوب واستكثر من الاتراك والديلم حتى قيل انه كان ينام بحراسه الف مملوك !!!!

وبعد كدة استولى الفاطميون على مصر , لانهم كانوا عاملين دوله فى المغرب العربى ولما توفى كافور ( خادم الاخشيد الاسود اللى تولى حكم مصر بعدها !!!!! ) وضعفت الدوله الاخشيديه فى مصر , توجهت انظار الفاطميون عليها , فهى ذات موقع متميز فى قلب العالم الاسلامى , تقع على الكثير من الطرق والممرات , بوابه شمال افريقيا , دوله ذات ثراء فاحش وارض خصبه , يعنى من الاخر تصلح قاعدة لامبراطوريه عظيمه ..
نجح الفاطميين فى الاستيلاء على مصر , وقيل انهم كانوا اكثر الحكام ادراكا لعقليه المصريين , وكان اسلوبهم يعتمد على المقوله الشهيرة ( ذهب المعز وسيفه ) حيث يحكم بالترغيب والترهيب معا ليضمن ولاء الافراد .
فمن ناحيه حكم الفاطميون مصر بالحديد والنار ومن ناحيه اخرى اغرقوا البلاد بعادات واحتفالات وموالد كثيرة ما انزل الله بها من سلطان , بلغ من تغلغلها فى نفوس المصريين انه مازال منها ما نحتفل به الى الان باعداد ولائم ووجبات معينه على نفس النحو المتبع فى الماضى ...
وبما ان الفاطميون بالطبع معندهمش استعداد للاعتماد على ابناء البلد فى تكوين قوة عسكريه , فلجأ الفاطميون كالعادة للمماليك المجلوبين من الخارج فاعتمدوا على الترك والسودانيين والبربر ....
والعناصر دى عاثت فى مصر فسادا وسلبا ونهبا , ومن طريف مايحكى انه كان فيه احد الخلفاء الفاطميين غضب الناس منه فصنعوا له تمثال من خشب ولبسوة لبس واحدة ست وطافوا بيه فى الشوارع وضربوة وحطموة , ولما وصل الامر للخليفه , امر عسكر المغاربه فنزلوا البلد وعاثوا فيها سلبا ونهبا وتقتيلا , وطلع الخليفه دة فوق المقطم , فسمع الناس تحت بتصرخ وتستغيث , فسال اللى حواليه , مين دول ؟؟ وايه اللى بيحصل ؟ فقالوله دول عسكر المغاربه بتوعك بيقتلوا فى الناس , فقال لا حول ولا قوة الا بالله ونزل لقصرة , وبعدين طلع تانى يوم وسمع الصراخ وسال نفس السؤال وبعدين قال ايه الافترا دة ؟ حد يعمل كدة برضه ؟؟؟ الناس دول معندهمش دين ! معندهمش رحمه !!! , ونزل تانى , وهكذا لعدة ايام ...

دة نموذج , والعينه بينه , وعلى عينك ياتاجر ...

وظل الفاطميين يصنعون حاله من التوازن بين الترك والسودانيين والمغاربه بهدف تحجيم نفوذهم وتهديد كل منهم بالاخر ....

وفى عهد الحروب الصليبيه ضعف خلفاء الفاطميين واصبح الحل والعقد فى ايد وزائهم حتى تقاسم النفوذ كلا من الوزيران شاور و ضرغام , وتنازعوا على السلطه فى البلد فواحد فيهم لجأ للصليبيين يستنجد بيهم ييجوا يساعدوة والتانى بالمقابل لجأ لنور الدين محمود اللى رفع رايه الجهاد ضد الصليبيين فى الشام , فبعت لمصر اسد الدين شيركوة وصلاح الدين الايوبى , اللى نجحوا فى فى القضاء على محاولات التدخل الصليبى , وتقلد اسد الدين السلطه فى مصر وبعد منه صلاح الدين الايوبى , كل دة كان تحت سلطه الخليفه الفاطمى الضعيف , وبعد فاته حكم صلاح الدين مصر و حرر بيت المقدس واسس دوله متراميه الاطراف تشمل مصر والشام واجزاء كبيرة من شبه الجزيرة , اطلق عليها الدوله الايوبيه , وبدأ صلاح الدين فى القضاء على الفرق العسكريه التابعه للفاطميين واحل مكانها المماليك الاسديه ( نسبه لعمه اسد الدين شيركوة ) وبعض احرار الاكراد بالاضافه لمماليكه الذين اشتراهم لنفسه ..

والغى صلاح الدين دوله الفاطميين وخطب للخليفه العباسى فى الجمعه ( كان الدعاء فى خطبه الجمعه وسك العمله اهم علامتين على خضوع الدوله لسيطرة الخليفه ) ...

وبعد وفاة نور الدين محمود خشى صلاح الدين من ان تدب الفرقه ووحد مصر والشام تحت قيادته وبدأ رحله جهادة ضد جيوش الصليبيين ..
وبعد وفاة صلاح الدين حدثت الكثير من النزاعات بين المماليك لتوليه من يروق لهم من بنى ايوب , كما استغل خلفاء صلاح الدين فرق المماليك وضربوا بعضها ببعض , وتوفى الملك العادل والملك الكامل اللى تولوا السلطه بعد صلاح الدين , وجه بعدهم الملك الصالح نجم الدين ايوب حكم مصر , وكان مجىء الصالح نجم الدين للسلطه يرجع بفضل اساسى للمماليك مما دفعه للاستكثار من شراؤهم بشكل ملفت حتى اصبح اغلب جيشه منهم وجعل منهم بطانته حرسه الخاص .

وبما ان المماليك اصبحوا طوائف كتير تصارع بعضها بعضا , فخشى نجم الدين من الاقامه فى القاهرة مخافه ان ينقلب باقى المماليك عليه ( مماليك الملوك السابقين ) , فاسكن مماليكه الخاصه ( اللى اشتراهم بفلوسه ويضمن ولائهم يعنى ) فى جزيرة الروضه وبنى فيها قصر واحاطه بسور وسكن فيه , ومن هنا جائت تسميه ( المماليك البحريه ) اللى اسسوا دوله المماليك الاولى بعد اندثار دوله الايوبيين ...
المماليك البحريه سرعان ما تجلت مقدرتهم وكفائتهم العسكريه فى صد حمله لويس التاسع ونجاحهم فى أسرة , فبينوا انهم على قدر هائل من الكفاءة والشجاعه والاقدام .

طب ايه اللى حصل , اللى حصل ان وقت مجىء حمله لويس كان الملك الصالح مريض فامر وزيرة فخر الدين يوسف انه يقود الجيش بهدف منع الصليبيين من النزول فى دمياط , الا انه فشل ونجح الصليبيين فى الاستيلاء على دمياط , واشتد مرض الصالح نجم الدين ومات .
وطبعا كلنا عارفين القصه بتاع شجرة الدر لما اخفت خبر موته , نظرا للظروف الحرجه وخوفا من استغلال الصليبيين للفرصه وتقدمهم اكثر داخل البلاد , وفى نفس الوقت بعتت لتوران شاة ابنه انه ييجى علشان يخلف ابوة , الا ان الصليبيين عرفوا الخبر مع الاسف وتقدموا للمنصورة ونجحوا فى دخولها ..
الا ان توران شاة كان جه مصر وقاد مماليك والدة واعد خطه محكمه نجح من خلالها فى هزيمه الصليبيين واسر اعداد ضخمه منهم , على راسهم لويس التاسع نفسه .

وبعد النصر هنلاقى ان توران شاة اتغر ونسب النصر لنفسه فقط وتجاهل مجهودات مماليك ابيه بل انه اراد التخلص منهم واحلال مماليكه الذين اصطحبهم معه من حصن كيفا مكانهم ولما احتج المماليك البحريه بدأ فى ابعادهم عن المناصب المهمه وامر باعتقالهم , حتى روى عنه انه اثناء نوبات سكرة المتكررة كان بيسب المماليك ويشتمهم ويتوعد بالقضاء عليهم , وكان بيصاب بنوبات هياج ويقطع شموع القصر بسيفه ويقول انه هيحصد روس المماليك زى ما بيحصد الشموع دى بسيفه , مش بس كدة , لا دا كمان تنكر لشجرة الدر زوجه ابيه واتهمها باخفاء ثروة ابيه وطالبها بالمال وهددها مما دفعها للشكوى لقادة المماليك البحريه الذين يخلصون لها على اعتبار انها زوجه استاذهم .

وبالطبع غضب منه المماليك وعزموا على التخلص منه قبل ما يتخلص هو منهم , وقرروا قتله , وادى اللى حصل بالتفصيل :
اللى تزعم المؤامرة دى ايبك واقطاى وبيبرس وقلاوون , فلما كان توران شاة فى فارسكور بيحتفل بنصرة على الصليبيين , هجم عليه بيبرس فى خيمته وضربه بالسيف فتلقى توران شاة الضربه بيدة فقطعت اصابعه , وخرج يجرى من الخيمه وهو مجروح , وكان امامه برج خشبى عالى على النيل , كان اقامه ليجلس فيه , يستمتع بالمنظر يعنى وكدة , فجرى ناحيه البرج وتسلقه واحتمى فيه , فحاصرة بيبرس واقطاى وباقى زعماء المماليك وولعوا فى البرج الخشب , ولما وجد توران شاة نفسه بيتحرق فنط فى النيل وظل يسبح طلبا للنجاة , فضربوة بالنشاب من على الشط , وهو يستغيث ويتوسل اليهم وعرض عليهم التنازل عن العرش مقابل انهم يتركوة يرجع لاقليمه السابق , فمحدش عبرة , وساعتها نط بيبرس وراة فى النيل ودبحه بسيفه !!!!!
ومات توران شاة جريح محروق غرقان مطعون مذبوح , وظلت جثته فى النيل 3 ايام بدون ان يجرؤ احد ان يدفنها , الى ان تشفع فيه الخليفه العباسى , فحملوة الى الشاطىء ودفنوة ...

ها

ايه رايكم فى الموته دى ؟؟؟

وبكدة انتهى حكم الايوبيين فى مصر ...

__________________________

ملحق :

- الصورة تمثل حدود دوله صلاح الدين الايوبى ...

- سامراء : سر من رأى , تقع على بعد 125 كيلومتر شمال بغداد ..

- احمد ابن طولون : واحد من ضمن الاتراك فى البلاط العباسى , زوج امه كان قد ولاة الخليفه العباسى على مصر , وآلت بعد ذلك الى ابن طولون وتولاها ليحكمها من قبل العباسيين , الا انه استقل بها عنهم واسس دوله منفصله حكمها من عام 868 - 884 ميلاديه , انشأ مدينه القطائع واقام بها مسجدة الشهير , واقام بمصر المدارس والمستشفيات , واقام قصر ضخم له اربعين باب , كان موجود مكان ميدان القلعه حاليا , الا انه اندثر تماما من زماااااااان ...
وتقع مدينه القطائع مكان احياء القلعه والسيدة زينب .

- الديلم : سكان اقليم جبلى يدعى جيلان , يقع شرق اذربيجان والعراق , وكانوا وثنيين الا ان الاسلام انتشر فيهم وشكلوا موردا خصب للجنود المرتزقه .

- ابو بكر محمد ابن طغج الاخشيد : برضه تولى ولايه مصر وبعدين استقل بيها واسس دوله منفصله , والراجل دة اصله من مكان يدعى ( فرغانه ) اللى هى طاجيكستان الان , حكم مصر فى 935 ميلاديه

- البربر : لقب كان يطلق قديما عل سكان منطقه المغرب العربى والشمال الغربى الافريقى ..

- اسد الدين شيركوة : عم صلاح الدين الايوبى , من اصل كردى , وتعنى كلمه ( شيركوة ) اسد الجبل , كان اسد الدين هو واخوة شغالين عند قائد شرطه بغداد وكان ولاهم على قلعه تكريت , الا انهم ساعدوا عماد الدين زنكى اثناء مرورة منهزما فى اراضيهم بعد دخوله فى بعض المعارك , فساعدوة واعطوة سفن يعبر بيها نهر دجله علشان يوصل لمدينته ( الموصل ) , الا ان قائد الشرطه كان فى عداء مع زنكى فغضب على شيركوة واخوة وقرر التخلص منهم , فذهب احد جنودة وتحرش بفتاة من عائله شيركوة , وهى اشتكت لشيركوة اللى نزل بدورة واتخانق مع الجندى , فالجندى رفع عليه السلاح فقتله شيركوة , ودى كانت التلكيكه اللى هيقضى بيها صاحب الشرطه عليهم , ففر شيركوة واخوة وراحو لزنكى فى نفس الليله اللى اتولد فيها صلاح الدين , واكرمهم زنكى وضمهم الى قوادة , وبعد وفاته عمل شيركوة بدورة فى خدمه نور الدين محمود ابن زنكى بعد ان ساعدة فى السيطرة على قوات ابيه , يعنى من الاخر شيركوة دة كان راجل شجاع وبطل , وقائد عسكرى دكر , وانسان مخلص وامين , يكفيه انه تصدى لجيوش الفاطميين والصليبيين لمدة 3 اشهر ونجح فى فتح مصر وجيشه كان لا يزيد عن الف رجل !!! . ..

- احرار الاكراد : زى ماقلت قبل كدة , ان صلاح الدين اصله كردى ...

- الملك العادل : احد سلاطين الايوبيين , حكم من عام 1200 - 1218م

- الملك الكامل : احد سلاطين الايوبيين , حكم من عام 1218 - 1238م

- الملك الصالح نجم الدين ايوب : احد سلاطين الايوبيين , حكم من عام 1240 - 1249م

- منهم : تم تسميتهم بالمماليك البحريه الصالحيه , البحريه نسبه لسكنهم فى وسط النيل , والصالحيه نسبه الى زعيمهم الملك الصالح نجم الدين ايوب ....

- جزيرة الروضه : جزيرة فى النيل بين القاهرة والجيزة , يقع فيها الان حى المنيل ...

- النشاب : مصطلح قديم كان يطلق فى عهد المماليك على السهام ....

( 1) - مدخل , الجزء الاول ..

2009-07-16T12:56:00.000-07:00

كان لظهور الديانه الاسلاميه فى شبه جزيرة العرب ابلغ الاثر فى مجريات الاحداث بعد ذلك , فقد كان الدين الاسلامى هو المحور الاساسى لانشاء امبراطوريه عظيمه متراميه الاطراف , وكلمه امبراطوريه غير كلمه دوله , يعنى ياجماعه علشان مجموعه من البشر تتحد وتشكل دوله , فلابد من اهداف ومصالح مشتركه , او حتى سمات مشتركه , زى الارض مثلا او العرق او المصالح , انما علشان تشكل امبراطوريه فالموضوع بيكون اصعب بكتير جدا , لانك فى الحاله دة بتشكل كيان ضخم من عدة دول واعراق وجنسيات ولغات مختلفه تمام الاختلاف بالاضافه لصعوبه السيطرة على ارض متراميه الاطراف ومتباينه الطبيعه الجغرافيه ....
ولذلك فتكوين امبراطوريه بحاجه لفكرة , فكرة على درجه من القوة بحيث تتمكن من التغطيه على كل هذة الاختلافات والتباينات , فكرة يلتف ويتحد حولها الجميع ولا يعلو عليها صوت اخر ..

فى حالتنا كانت الفكرة دى هى العقيدة الاسلاميه اللى كانت البذرة والمحور والقاعدة للامبراطوريه العظيمه دى , اللى بدأت فى مجتمع المدينه المنورة واللى شكل النواة لهذة الامبراطوريه , وفى عهد الرسول عليه الصلاة والسلام اتسع نطاق الدوله دى ليشمل مساحات ضخمه من شبه جزيرة العرب .

الا انه كان فيه شىء ضرورى ناقص الا وهو ان كل المجتمعات دى عبارة عن مجتمعات قبليه لا تشكل حضارة او كيان اقتصادى , لان علشان تعمل امبراطوريه ضخمه لابد من موارد وثروات كبيرة بالاضافه لموارد بشريه كثيفه ودول مكانوش موجودين اياميها , الا ان الدوله نجحت واستمرت نظرا للمثاليه والعداله اللى كان بيتمتع بيها المجتمع الاسلامى حينها .

وفى عهد الخلفاء الراشدين كان فتح مصر والشام هو بشير الخير والضوء الاخضر للاتساع السريع والمذهل لهذة الامبراطوريه , فالشام ومصر وفروا لها موارد ضخمه , موارد من كل الانواع سواء زراعيه او صناعيه او ماليه او بشريه , وعلشان كدة هنلاقى ان معدل الاتساع بدأ يزداد بشكل مطرد ابتداء من عهد سيدنا عمر بن الخطاب .
كما ان القضاء على دوله الفرس وكسر شوكه الروم اخلى الساحه للامبراطوريه الوليدة ومنحها مساحات ضخمه من الارض ...

طيب , انا شخصيا شايف ان الدوله دى مكانتش ماشيه بشكل سليم ونموذجى ميه فى الميه وماكانتش دوله اسلاميه صرفه تخضع سياساتها للدين الحق , الا فى عهد ابى بكر وعمر ..
واستثنائى لحكم عثمان وعلى بن ابى طالب , ليس طعنا فيهما لاسمح الله , وانما لان فترات حكمهما شهدت العديد من الفتن والقلاقل , وكانت بدايه تحكم السياسه فى الدين , وتمثل دة فى ظهور العديد من الطوائف التيارات السياسيه اللى كانت بتاخد من الدين ستار لها بل ومبرر لسلوكياتها ..

بوفاة سيدنا على انحرفت دفه الحكم تماما بسيطرة بنى اميه عليها , فبعد ان كانت دوله دينيه يحكمها الاصلح , اصبحت مملكه تحكمها عائله معينه وتتوارثها جيلا بعد جيل , اينعم خط الفتوحات والجهاد كان مستمر والايجابيات كانت كتير بس انا بتكلم فى النظام نفسه , المبدأ اللى قامت عليه الدوله ..
- يعنى بعد ما شفنا عمر قال للناس فى المسجد وطلب منهم يقوموة ان اخطأ , فقام شخص وقال انه لن يقومه الا بهذا واشار لسيفه ..
دى كانت دوله الخلافه .
- وبعدين ايام معاويه ابن ابى سفيان داهيه العرب , قام واحد من الناس وقاله ( بسخريه وتهكم ) انه كثير اللحم والشحم , مررب يعنى , زى الست والدته , فرد معاويه ببرود وقال يرحمها الله !
دى كانت مرحله انتقاليه .
- بعدها لما بدأ النظام الواراثى بتنصيب يزيد ابن معاويه , نجد ان هناك من هدد الناس بان يبايعوا هذا ( اشارة الى يزيد ) فمن ابى فهذا ( اشارة الى سيفه ) ....

يعنى الدوله كانت نموذجيه فى عهد الرسول عليه الصلاة والسلام ومن بعدة ابا بكر وعمر رضى الله عنهما ..
وبعدين دخلت فى مرحله فتن وتيارات سياسيه فى عهد عثمان وعلى ..
وبعدين دخلت فى فترة انتقاليه فى عهد معاويه ..
ثم تخلت الدوله عن اهم ثوابتها ابتداء من عهد يزيد , واصبح الدين العوبه ووسيله فى ايدى الحكام , وان كانت الخطوط الرئيسيه كالجهاد والفتوحات استمرت كما هى زى ماقلت , الا ان النخبه السياسيه كانت فاسدة بنسبه كبيرة ....

ولذلك ولتعدد التيارات السياسيه وتمسك بنى اميه بالسلطه واستئثارهم بها , كان لابد من ايجاد قوة عسكريه تحميهم , ودى الفكرة او المعضله اللى هنلاقيها فى كل عصر بعد كدة ..

ايام الامويون ولان الدوله كانت واحدة فكان كافى جدا اتخاذ اجرائين , الاول هو ايجاد ولاة موثوق فى ولائهم وطاعتهم لبنى اميه , وايضا مشهورين بالدهاء والعنف والقسوة , ينفذوا العمليات القذرة ويقمعوا الاقاليم الغير مستقرة ويشكلوا تهديد لكل من تسول له نفسه الخروج عن سلطه بنى اميه , ودول كقادة كان اشهر نموذج لهم هو الحجاج ابن يوسف الثقفى , وكقوة عسكريه كان النموذج هو جيش الشام ......
دة كان كافى , مؤقتا , لان استئثارهم بالسلطه والنزعه القبليه العربيه اللى كانت عندهم قلبت ضدهم العديد من اهل البلدان المفتوحه وخصوصا بلاد فارس , ولما ضعفت قبضه بنى اميه وضعف حكامها , بدأ بنى العباس فى جمع العديد من الاقاليم تحت زعامتهم , وزعموا كالعادة انهم عاوزين يقيموا الحق والعداله , وبالفعل نجحوا فى انتزاع سلطه بنى اميه , وقامت دوله بنى العباس ..

والطبيعى اللى بيحصل فى الظروف اللى زى دى :

اولا - لابد من التخلص الكامل من كل بنى اميه ومن يمت لهم بصله , وبالفعل بدأت حمله تطهير واسعه للقضاء على بنى اميه , ومن كان يعاونهم ايضا , حتى انهم قتلوا والى مصر الاموى حينئذ ووضعوة داخل بطن حمار واشعلوا فيه النيران ...
الا ان فيه طفل صغير هرب منهم هو واخوة وفضلوا يطاردوة الى ان حاصروهم على ضفه نهر الفرات وهنا قرر الطفل انه يقفز فى النهر بينما رفض اخوة وخاف , وبالفعل نط الطفل دة فى النهر وسبح للضفه التانيه من النهر وشاهد بعينه اخوة وهو يذبح على الضفه الاخرى .
الطفل دة هرب وقطع الشام كله وشمال افريقيا بالكامل بدون ان يتمكن العباسيين من القبض عليه والتجأ لبعض قبائل المغرب العربى , وبعدها عبر مضيق جبل طارق ووصل للاندلس ( مكانش اسمها الاندلس لسه , ومكانتش حضارة , بل عدد من القبائل والتجمعات البشريه ) ونجح فى انه يوحد الارض دى تحت قيادته وشكل واحدة من اعظم الحضارات الاسلاميه واللى استمرت بعدة اكتر من 700 عام .
الشخص دة اسمه عبد الرحمان الداخل , واطلق عليه اعدائه العباسيين انفسهم لقب ( صقر قريش ) اجلالا واحتراما لشجاعته وموهبته الفذة ...

ثانيا - من المعروف ان اى ثورة عندما تثبت اقدامها تبدأ فى التهام اولادها , وبما ان حكم بنى اميه نشأ على اقليه ارستقراطيه , فحكم بنى العباس نشأ على دعم الاغلبيه الشعبيه , خصوصا فى بلاد فارس , وكان اول ضحيه هو ابو مسلم الخُرسانى القائد العسكرى الفذ الذى قاد جيش بنى العباس لانتزاع السلطه من الامويين !!!!!
وبدأ العباسيون فى التخلى تدريجيا عن حلفاؤهم الذين ساعدوهم فى بدايه امرهم , وانتقل الخليفه المأمون من ( مرو ) الى بغداد , وسائت العلاقه بين اهل خرسان وبين العباسيين , ولما كان اهل خرسان يشكلون عماد القوة العسكريه للعباسيين , فقد وجد خلفاء بنى العباس فى ذلك خطورة بالغه على سلطتهم ...

طب يروحوا فين ؟؟؟

العرب ؟؟؟
مينفعش لان النفوذ العربى فى اروقه السلطه ضعف وتضائل للغايه بعد القضاء على دوله بنى اميه , كما ان العباسيين لايثقوا فى ولائهم ..

طب ايه الحل ؟؟؟

يعملوا ايه العباسيين ؟؟

الاجابه فى البوست القادم ان شاء الله ...

ملحق :

1- خرسان ( بضم الخاء ) , اراضى دوله فارس فى اسيا , وانتقلت الى المسلمين لاحقا بعد فتحها , وتقع مكان دوله ايران حاليا وشمالها ايضا , وكانت تشكل اضخم الاقاليم الاسلاميه ...

2- الصورة تمثل احد رايات العباسيين , والتى اشتهرت باللون الاسود .

استفتاح تااااانى

2009-07-15T06:01:00.000-07:00

السلام عليكم ,

اولا انا اسف جدا انى اتاخرت فى السلسله دى بس دة كان لظروف خارجه عن ارادتى , وعلى اى حال انا رجعت اهو الحمد لله ,

قبل ما ابدأ احب اعرفكم على النظام اللى هشتغل بيه , انا هبدأ بتاريخ المماليك , مش من اول الفتح الاسلامى , ودة لانى شايف ان فترة حكم المماليك كانت من اعجب فترات التاريخ المصرى واكثرها اثارة , كما ان الفترة دى هتديكم مفاتيح كتير لشخصيه الانسان المصرى وهتذهلوا من التشابه الرهيب بين مصر اياميها ومصر ايامينا ..

طيب لما اتكلم عن الفترة دى هضطر اعمل كذا حاجه

التاريخ كلما كان مختصر كلما كان ممل , ودة على عكس المتعارف عليه , وانا لا اؤمن بالتاريخ المختصر او تاريخ ( النقاط والعناصر ) بتاع مناهج التربيه والتعليم دة , وكمان لا اؤمن بالتاريخ السياسى والتاريخ الاجتماعى , فالتاريخ فى وجهه نظرى وحدة واحدة لا تتجزأ باى حال من الاحوال ..

باختصار انا عايز اعيشكم فى وسط الناس دى , بحيث لما تسترجع التاريخ دة تحس انك بتفتكر زكريات قديمه من حياتك ...

طب دة هيستدعى انى اتكلم بشىء من التفصيل ودة هيكون صعب نظرا لكثافه الاحداث فى تلك الفترة وكمان نظرا لوعورة المصطلحات المتداوله فى تلك الاوقات ....

انا لا هختصر ولا هبدل المصطلحات , عايز تعيش اياميها يبقى تتكلم زى الناس ماكانت بتتكلم وتلبس زى ماكانوا بيلبسوا ..

بس عندى فكرة كويسه
بالنسبه لمشكله كثافه الاحداث فأنا هبدأ ( آسفا ) بنشر سرد مختصر واجمالى لتاريخ دولتى المماليك البحريه والبرجيه بحيث يكون فى ذهنك ترابط هيكلى للفترة دى بوجه عام , بحيث لما نخش فى التفاصيل بعد كدة محدش يتوة ..

بمعنى

كل بوست هيتكلم عن ملك او سلطان
ولما نقفل الفترة كلها هنبتدى ناخد مقتطفات من التاريخ المملوكى ونناقشها بشىء من التفصيل الممل , لان طبعا مش هيكون من الممكن اننا نلتزم بسرد تفصيلى متتابع للتاريخ فى هيئه بوستات , كدة عاوزين ولا الف سنه علشان نخلص ..

يعنى هنتكلم اجمالا وبعدين نركز على نقط معينه , ودة معناة ان الموضوع محتاج متابعه , علشان لو بوست سقط منك ممكن تدوخ بعد كدة
:D

بالنسبه لمشكله الالفاظ والاصطلاحات فانا هكتب الالفاظ الغريبه بلون مخالف وفى اخر البوست هكتب شرح وتفسير مختصر لكل مصطلح من دول .....

وطبعا قبل كل شىء لازم ابدأ ببوست الفذلكه التاريخيه المعتاد وفيه هتكلم بوجه عام عن نقاط معينه فى تاريخ ماقبل المماليك , هنكون محتاجينها فى موضوعنا ...

اهم حاااااااااجه
المتابعه
محدش يسقط بوست , انا بقول اهو ......

ايه ؟؟؟
مين ؟؟؟
انا قلت الكلام دة فى البوست اللى فات ؟؟
اة فعلا , بس هو مش بالظبط يعنى , عموما بكرة ان شاء الله هيكون بوست الفذلكه جاهز

ادعولى بقى
يلا
استعنا بالله

الفن في العصر الفرعوني الجزء الثاني

2009-06-18T15:22:00.000-07:00

طبعا نسيتو انا قلت ايه الجزء الاول

اللي نسي يدخل هنا انا بقول اهوووووووو

قلنا ان الجزء دا هيكون عن القواعد العامة للرسم والنقش في الفن المصري

يلا بينا كفايه رغي بقي

الفنان المصري زمان كان حريص اوي علي تصوير الشخص بحجم كبير

اكبر من مرافقيه وكمان بيتفق مع الوقار المحيط به والمركز الاجتماعي

( بلد بتاعت شهادات صحيح)

يعني كان بيبقي في فرق بين فلان وفلان حسب المركز والهاله اللي حواليه

يعني نلاقي واحد ماسك عصايه طويله او صولجان

تاني حاجه المصري خلي باله منها انه كان بيصور الششكل من الناحيه الواضحه

اللي هتبين اهم معالمها وتحافظ علي خصائصها

يعني مثلا رسم الانسان من الجنب بوجه عام بس نلاقيه رسم العين والكتفين

والصدر من الامام وهنلاقي انه اتبع نفس الطريقه مع الحيوانات والطيور

( الثور - البومه )

هنلاقيه انه مش اكتفي بس بالنظره الجانبيه لا دا كملها كمان بنظره اخري مخالف

لكل قواعد المنظور مطبق للصوره اللي رسمها خياله

كمان الفنان المصري حاول بقدر الامكان انه مش يخفي جزء من الجسم جزء اخر

يعني مفيش حاجه تغطي علي حاجه

كان حريص كمان علي تنظيم المناظر في صفوف وترتيب مفرداتها وتمثيلها

جنب الي جنب

( كان بيرتب الحاجه يعني بينفذ بدون عقل فنان بئه ) كمان عشان كل الاشكال تظهر

مش في شكل يخبي شكل

كان حريص اوي علي اتقان دا

اكيد حد هيسالني ان اتسالت يعني وهيقولي طيب ليه مش كان ماشي مع قواعد المنظور؟

هقولكم اهو ان صبر القاتل علي المقتول :)

اول حاجه

اول حاجه ايه يابت كيتي

اه افتكرت

بس قبل اما اقول ليه مكنش بيمشي بيها هقول ان قواعد المنظور كان بينفذها

الاغريق في فنهم وكان الفنان المصري عارفها

بس زي الموضه دلوقت خد اللي يناسبك ومتلبسش اللي يناسب غيرك :)

ان مفردات المنظر تبدو بالقدر الذي تراه العين

الاشياء البعيده تبدو اقل حجم بالنسبه للناظر

وان الاشياء اللي بتقع علي خط النظر كانت بتخفي بعضها البعض

كانت القواعد دي مش بتحقق اغراضه واهدافه

كان هدفه توضيح ملامح الشي ككل وتثبيت حقيقته ومش كان حابب انه

ياخد منظر جزئي

زي ماقلت كان بياخد الشكل بصفه عامه وبيوضح التفاصيل زي العين والكتفين والصدر

يبقي ليه مش نفذ القواعد

1- لم تكن ملائمه له

2- هدفه توضيح ملامح الشئ

تالت حاجه بقي

ان الصورة بتعبر عن صاحبهاو حقيقته والعقيده طبعا الزمته باتباع دا

كان للدولة القديمة عامة طابع معين واظب عليها الفنان المصري

وحرص علي اتباعها طوال هذه الفتره

كان له اسلوب خاص يعني مثلا

مثل انتصار الملك علي اعدائه فمثل الملك يخطو خطوه واسعه لياخذ بناصيه

اسير راكع ويهم بضربه بدبوس القتال

بس مش معني دا انه قيد نفسه بهذه القواعد

فصور جوانب الحياه اليوميه الخاصة اللي بنشوفها علي جدران المقابر

صور الزراعه باعمالها المختلفة

بالمناسبه

انا شفت صوره تحفه في المتحف المصري

متدرجه ازاي

فيها ناس بتعزف

وتدرجات زراعه المحصور

اولا حرث الارض

وبذر البذور

وحصد النباتات

ومتصوره بشكل رائع بجد

وشفتهم مصورين حجر النرد بتاع الطوله

والتحطيب اللي بيلعبوه في الصعيد

والطوق اللي زي الهيلاهوب كدا :))

واعمال النجاره

وبناء السفن

ولعبه جمال الملح وهيا زي اللي بنلعبها لاطفانا دلوقت الاب او الام بينحني

ويحط البيبي علي ظهره ويمشي بيه :)

مش سابو تفصيله في الحياه الا وصورها ببراعه متناهيه وبساطه مريحه لاي حد

كان بيبدا برسم الشكل وبعدها بيلونه بالالوان المختلفه

وكان فيه نوعين للنقش

نقش بارز : تبرز الاشكال عن السطح الخلفي بضعه ملليمترات

نقش غائر : يكتفي فيه بحفر السطح الداخلي ونحته بتفاصيله

وكدا ابقي خلصت الجزء دا علي خيرررررررررررررررررررررر

اشوفكم في الجزء الجاي

وهكلم عن النحت

كل سنة وانا طيبة

2009-06-07T06:24:00.000-07:00

كل سنة وانا موجوده

كل سنه وانا في الذاكره

كل سنه وايامي لسه محفوره في قلوبكم

كل سنة وانا طيبه

ومن القلب قريبه

ومن العقل ماثره

كل سنه وانا بقربكم اكتر من الحقيقه

كل سنه وانتم فاهمني وعارفني

كل سنه وانا طيبه

طبعا دا موش كلامي دا كلام ايام زمان لكل زوارها

النهارده عيد ميلاد انشاءها

مر عليها سنه كامله

كل موضوع نزل فيها بجد كان متعوب فيه

المدونة الوحيده اللي في المي وتعبي عمري مافكرت اني اقفلها اطلاقا

رغم اني كنت بقفل المدونه لشخصية بتاعتي الا ان دي عمري مافكرت اقفلها

ويوم هاك ضي القمر كنت هموت عليها واطمن انها بخير والحمد لله تمام موش لمسوها ودا اللي مستغرباله

بس الحمد لله انها موجوده وبخير

كل سنه وانتي طيبة ياجمل ايام زمان في الدنيا

اسمك جالي في لحظه

النهارده يوم عيد ميلادك يوم اما عملتك برغم ان اول بوست انا كنت منزلاه

حذفته وابتيتي فعليا بعد تظبيط الاستايل وخلافه يوم 16/6 لكن انشئتك النهارده

يارب تكوني فعلا بتوصلي الرساله اللي نفسي توصل للناس من يوم اما عملتك

موش هرغي كتير كل سنه وانتي بخير يااحلي مدونه في حياتي

تحياتي

كيـــــــــــــارا

استفتاح

2009-05-13T07:10:00.000-07:00

بسم الله الرحمن الرحيم
انا بقالى اكتر من شهر فى المدونه دى ولحد دلوقت مكتبتش ولا بوست
بصراحه متردد
مش فى المواضيع , لأن المواضيع مافيش اكتر منها
انا متردد فى المنهج
المنهج اللى همشى عليه
طب ايه رايكم نغير التاريخ ؟؟؟
لا
مش نغيرة يعنى نحرفه
قصدى نغير من نظرتنا ليه
اغلب الناس بتشوف ان التاريخ دة مادة سخيفه وممله جدااااااا
مع انه مش كدة خااااالص
بس هما معاهم حق فى وجهه نظرهم دى
لان اغلبيه المعالجات التاريخيه المطروحه فعلا بتعرض نفس المنهج الممل
ولاسيما المناهج الدراسيه
وما ادراك ما المناهج الدراسيه
بتاع اذكر وعلل وبما تفسر..
افتكر كان بيجيلى سؤال فى امتحان اخر السنه بيقول فيه :
ماذا تقول لنابليون عندما اقدم على اقتحام الازهر بالخيول ؟؟!!!
طب بالذمه دة سؤال يحطه انسان محترم ؟؟؟
____

عندى سؤال
ليه الاحداث التاريخيه مش بتلاقى اى متابع بينما لما بتتعمل فيلم عالمى مثلا بتكسر الدنيا والكل بيتفرج عليها ؟؟؟؟
اذن العيب مش فى الحدث نفسه
يعنى هو مش ممل , بل على العكس دة ممتع بشكل كافى لجذب متابعين
العيب فى اسلوب المعالجه
اسلوب معالجه سطحي جدا جدا بشكل مستفز يهتم بالجانب السياسى فقط ويتجاهل الشخصيات ذاتها لينصب فى اطار ضيق جدا من الاحداث
مش كدة وبس
لا دة كمان بيعالج النطاق الضيق دة باسلوب فى منتهى العقم
حد يابشر يعمل التاريخ فى نقط ؟؟؟!!!!
واحد اتنين تلاته والف به جيم ؟؟؟؟
__________

طب ياعم الامور انت عايز ايه بالظبط ؟؟؟
حاضر , هجاوب
انا انسان بعشق التاريخ
وشايف ان سبب دة مش انى كائن مريخى فضائى يحتوى على جينات غير بشريه
كل ما هنالك انى شوفته بعين تانيه غير العين اللى الاغلبيه بتشوفه بيها
ودة فتح لى قدر من المتعه والمعرفه لا تتخيلوة ...
كل ما هنالك انى عايزكم تشاركونى المتعه دى ( على الاقل )
يعنى اوريكم الاحداث بعينى
مش بعينى يعنى بوجهه نظرى
لا انا قصدى من الجانب الشيق اللى انا شايفه
تبقى المشكله الاخيرة
ودى فيا انا
هى انى اقدر اوصل اللى فى دماغى لدماغكم عن طريق الكتابه
ودى طبعا مشكله
لانى معنديش الملكه اللى تخلينى اوصل الاحساس بالكلام
فما بالك بالكتابه
دة سبب ترددى
بس هبدأ وامرى لله
ومعلش استحملونى شويتين تلاته
وكان قرارى انى ابدأ بتاريخ المماليك
لانى شايف انه اكتر فترات التاريخ المصرى ثراء وغرابه ومتعه فى نفس الوقت
وايضا لان دى اكتر فترة انا متمكن منها وعندى تسلسل كامل لاحداثها
بعكس التاريخ الاوروبى مثلا
وعلشان كدة هبدأ بيها
تاريخ المماليك صعب ومعقد وملىء بالمصطلحات المبهمه , واللى لا يمكن ايجاد مرادف معاصر مطابق لها
يعنى حتى تعريف المصطلحات دى مش دقيق
علشان كدة انا مش هينفع امسك حدث معين وافصصه بدون ما يكون عندك علم بالخلفيه السابقه ليه
وعلشان كدة كان لازم انى اشرح تاريخ المماليك شرح مجمل الاول , علشان لما نمسك نقطه معينه تكون الناس ( عايشه الجو صح )
اول حاجه لازم تنسوا الثقافه بتاع المسلسلات الفاكسه بتاعنا وتمسحوها من دماغكم لانها فى منتهى التخريف والتحريف وعدم احترام عقليه المشاهد
ابسط حاجتين انها كانت بالفصحى , مع ان العصور دى مكانش المماليك بيتكلموا بالفصحى ...
ثانيا الازياء كانت سخيفه , يعنى يكفى انك بتتكلم عن اى تاريخ علشان يجيبولك الزى الموحد بتاع المسلسلات اللى هو العمه والعبايه اللى بقصب وترتر
متفرقش اموى عباسى مملوكى
كله واحد
ودة اكبر غلط
لان الازياء ايام المماليك كانت اغرب مما تتخيلوا واروع بكتير
دول ابسط حاجتين ....

تانى حاجه

مافيش فى التاريخ شخصيات ابيض او اسود

يعنى متحاولش تصنف الناس الى طيب وشرير

لان اللون الرمادى كتير

والشخصيات المكلكعه فى التاريخ اكتر

وخصوصا فى عصر المماليك

لانهم فعلا كانوا شخصيات متناقضه للغايه وصعب تحليلها

فشغل التصنيف بتاع فلان كويس وعلان وحش مش هينفع هنا ....

تالت حاجه

ان المبادىء نسبيه

يعنى الحاجه اللى المجتمع دلوقتى بيعتبرها شىء مشين وعيب

ممكن تكون فى وقت ما شىء عادى بل واحيانا تقاليد متعارف عليها ....

اعتقد ان وجهه نظرى وصلت كدا ...

اوكيه ؟؟؟

اتفقنا

استعنا على الشقا بالله

انتظروا البوست الجاى

التتار من ظلام الهمجية الى نور الاسلام ( سامحك الله يا بن خوارزم شاه )

2009-04-12T11:49:00.000-07:00

احنا دلوقتى فى مدينة سمرقند عام 618 هـ / 1221 م ، لو كان للخوف ريحة يبقى ممكن تشمها فى كل مكان هنا ، المدينة شكلها غير طبيعى بالمرة ده لو صح انك تطلق عليها لفظ مدينة و اكيد انت بتستغرب ازاى الناس عايشين وسط الاطلال و الخرابات دى ، و لو حاولت تسأل حد عن سبب المنظر الغريب ده حتلمح الذعر الشديد فى عينيه و حيبصلك بصة غريبة و لو عنده شجاعة حيشاورلك تقربه و يقولك بصوت هامس عن الحكاية
حيحكيلك عن النكبة اللى ابتلوا بيها لما دخل جنكيز خان بجيشه المدينة و عمل فيها زى ما عمل فى بخارى و مدن تانية غيرها ، نفس البصمة التترية القذرة بتلطخ ثوب المدينة بالدم ، و بعد ما انتهى جنوده من المدينة قرر انه يتخذ منها قاعدة ينطلق منها لغزو العالم الاسلامى و بدأ بمطاردة محمد بن خوارزم شاه و جرد فى اثره كتيبة صغيرة عدتها 20 الف جندى ، من وجهة نظر جنكيز خان كان محمد بن خوارزم شاه هو القوة الوحيدة اللى ممكن تقف زى الشوكة فى حلقه لكن لحسن حظه كان ملك يشبه بعض حكامنا فى اليومين دول بيحب الحياة اكتر من الحرية

يا ريت محمد بن خوارزم شاه كان وقف للتتار و حارب كان اشرفله من مصيره اللى انتهى اليه ، ملكنا استمر فى فراره للتتار لحد ما وصل جزيرة فى وسط بحر قزوين و هناك احتى بقلعة صغيرة و عاش فى فقر شديد و حياة فى منتهى الصعوبة بالنسبة لملك عاش فى عز و ملك واسع و ضخم ، و بعدها بكام يوم كانت نهايته مات الملك من الذل و القهر والفقر لدرجة انهم ملقيوش حاجة يكفنوه فيها قكفنوه فى فرشته عشان يبقى عبرة لأى ملك و حاكم يوهبه ربنا الملك و السلطان على الرعية و يخون الامانة خوف على روحه و ملكه الزائل

أما اهل خوارزم شاه اللى فكر انه حيحميهم بهروبهم كان مصيرهم اشد بؤسا ، على الاقل هو مات و مشافش الذل على ايد التتار اما اهله فوقعوا فى ايد التتاراللى كانوا فى طريقهم من مدينة مازندران الى مدينة الرى و هى مدينة كبيرة فى ايران و كانت غنيمة عظيمة للتتار ميحلموش بيها ، كنوز و اموال ملهاش حصر و كمان نساء قصر خوارزم شاه ، كل ده تم ارساله لجنكيز خان فى مقر قيادته بمدينة سمرقند

التتار من ظلام الهمجية الى نور الاسلام ( و بدأ الزحف)

2009-04-03T14:35:00.000-07:00

اهلا بيكم من جديد فى رحلتنا مع التتار الشعب اللى روع العالم و اقض مجضع الملوك فى ذلك العصر
تفاعل الاصدقاء معايا خلانى متحمس جدا لاكمال الحديث عنهم

و انا بكتب افتكرت قصة الكاتب الكبير على احمد باكثير واإسلاماه اللى درسناها فى الثانوى لما كان التتار بيجتاحوا المدن و يستخدم تعبير و اعملوا فى اهلها السيف ، بحس لما اقراه قد ايه كان تصرفاتهم الهمجية امر روتينى بيقوموا بيه زى اى جزار محترف

و طريقة التتار بتفكرنى ببعض الاحداث اللى بتدور حوالينا فى المسرح السياسي الدولى و رغم عدم ايمانى التام بمقولة ان التاريخ بيعيد نفسه لكن لما السياسة بتتبنى على القوة و تكون فى ايد ظالم مبيكونش ليها غير توجه واحد مهما اختلفت المسميات التتار - امريكا و مين بعدهم مش عارفين

احنا دلوقتى واقفين مع جنكيز خان فى خيمته بيبص لحدود دولته وصلت لفين من الشرق و الجنوب بيحاوطه المحيط و الشمال مفيهوش غير خطر مجهول مدفون فى قلب ثلوج سيبيريا فكان الحل الوحيد قدام طموحه اللامحدود انه يبص للغرب ، للدولة الخوارزمية الباب اللى حيمهدله اجتياح قلب الخلافة الاسلامية ، الدولة الخوارزمية وقتها كانت اشبه بإمبراطورية صغيرة بتضم العديد من دول آسيا اشهرها باكستان و افغانستان و بتمتد حتى داخل ايران وده بالنسبة لجنكيز خان اشبه بالوليمة الشهية اللى ريحتها بتخلى اى مقاومة قدامها تنهار فكان من السهل عليه تجاهل اى شئ يتعلق بالمعاهدات اللى ابرمها مع الملك ( محمد بن خوارزم شاه ) بشأن احترام الحدود و الجوار و عدم الاعتداء على السيادة و انتم عارفين الباقى

و بدأ زحف الجراد التتارى على الدولة الخوارزمية و كانت اولى المعارك فى عام 616هـ/ 1219م عند نهر اسمه سيحون و استمرت اربع ايام و اسفرت عن 20 الف شهيد و و اكتر من 40 الف جرادة - اقصد تتارى - و لما لقى محمد بن خوارزم الكفتين غير متساويتين و انه مش حيقدر يواجه الاعداد الهايلة اللى بتواجهه انتهز اول فرصة تهدى فيها المعركة و انسحب بالجيش عشان يأمن العاصمة اورجندة و المدن الكبرى و اعداد الجيش من جديد لكنه فى انشغاله بتأمين عائلته و المقربين له اهمل فى تأمين الجزء الشرقى من مملكته بالإضافة لشعبه اللى ضحى بيه عشان ينقذ كنوز اهل قصره و محدش يقوللى التاريخ بيعيد نفسه

فى الوقت ده جنكيز خان كان جهز جيشه و انتهى من اقليم كازاخستان و حاصر مدينة بخارى اللى استسلم اهلها و طلبوا منه الامان و اعطاه ليهم لكن دخوله كان نكبة على مدينة بخارى و مطمنش فيها و لا ارتاح غير بعد ما قتل كل المحاربين و دمرها و نكل بأهلها و اغتصب نسائها امام اعين ذويهم و اهاليهم فى مشهد يبعث القشعريرة فى الاجساد و دى كانت بداية زحف التتار على العالم الاسلامى

فى الجزء القادم حنستكمل بقية المواجهة بين جنكيز خان و الملك الهارب محمد بن خوارزم شاه

التتار من ظلام الهمجية الى نور الاسلام ( مقدمة )

2009-04-02T18:25:00.000-07:00

التتار اسم لشعب زرع الرعب فى قلوب العالم , قصة مأسوية تخلى اقسي قلب يتأثر لكن مش دى كل الحقيقة ، الشعب ده له قصة عجيبة تكاد لا تصدق حنتعرف فيها على جنكيز خان اللى دبح اجدادنا زماااااان و احفاده اللى بقى ملوك مسلمين و اصحاب امبراطورية عظيمة موحدة بالله فى يوم من الايام

التتار هما اقوام نشأوا فى شمال الصين و بيندرج تحتهم قبائل كتير اشهرها المغول والسلاجقة و الترك
حياتهم كانت بدائية بتعتمد على الرعى و الصيد و عمرهم ما عرفوا وحدة مركزية و لا معنى دولة لحد ما ظهر بينهم ( تيموجين ) الاى اشتهر باسم جنكيز خان و معناها قاهر العالم و هو اللى قدر يوحد التتار بفضل المميزات اللى بيتمتع بيها كقائد عسكرى و زعيم قدر يجمع كلمة الناس عليه و ده سنة 603هـ/ 1206م تقريبًا
من ملامح تنظيم جنكيز خان للتتار هى الديانة اللى اخترعها و هى كوكتيل اديان اسلام على مسيحية على بوذية و عملهم كتياب مقدس اسمه الياسة

طموح جنكيز خان و ميله للعنف و سفك الدماء خلاه يتوسع فى غارات و حروب همجية وحشية تميزت بالتنظيم الهائل و استخدامه لعدد رهيب من الجنود ذوى القلوب الميتة تحت قيادته البارعة فى جيش يتحمل اقسى الظروف الطبيعية و قدر يوسع رقعة دولته لحد ما بقت حدودهها ممتدة من كوريا فى الشرق و الدولة الخوارزمية فى الغرب و من سهول سيبيريا فى الشمال الى بحر الصين فى الجنوب

و كان من الطبيعى مع البربرية اللى تمت بيها الهجمات التترية اننا نسمع قصة واحدة بتتكرر فى كل مدينة دخلوها تخريب و تدمير و سفك دماء الابرياء و نقض للعهود و ده حال اى شعب غير متحضر عمره ما يعرف يقدر حضارة غيره او يحترمها بالعكس بيحاول انه يمحيها كأنها بلا قيمة

المرة الجاية حنتابع رحلتنا مع اول هجمات التتار اشوفكم بعدين فى ارض المعركة

الفن في العصر الفرعوني الجزء الاول

2009-02-12T11:15:00.000-08:00

احم احم طبعا وعشان مش اكسل انا كنت مجهزه بوست عن الفن فقلت ابقي شطوره واكتبه وانزله

طبعا المصريين القدماء سابولنا ارشيف بنفتخر بيه لحد الان

طب ايه كان هدفهم من الفن زمان

حد يقولي

ياكماحه حد يقول

عاااااااااااا هو لازمن يحني انا اقول كول حاكه كدا

طوووويب هقول وامري لله

قبل اما اقول الهدف هقول حاجه الفن المصري بيعتبر سجل حضاري بنعرف منه

الوسط الفكري اللي عاشه الانسان زمان وكمان بنعرف مدي تقدم الفتره دي

نرجع بقي للهدف

هنستشف ايه هنستشف دي لا هنلاحظ يعني من صور الالهه في المعابد والنقوش في المقابر

والتماثيل والتوابيت والاثاث الجنزي والقرابين والهبات ان كل دا كان لهدف واحد

وهو دينـــــــــــــــــى وفى مؤرخين بيقولوا انه ديني وجنزى

*********
عصر ماقبل الاسرات

في العصر دا كان المصري بيهتم جدا بالرسم علي الفخار وكانت رسومهم غايه في البساطه والرقه

ودا بيظهر اوي في حضارة نقاده الاولي والثانيه

لكن وجد ايضا بعض النقوش علي الجدران والصلايات وايادي السكاكين بتعبر عن عنف وقسوة

بسبب الحروب اللي حدثت قبل توحيد شطري البلاد ( يحني الحرب برده كانت بتاثر في نفسهم

وبيظهر دا في نقوشهم ( زي دلوقتي لما بنلاقي الحزن في الرسم من اثر الحروب اللي بنشوفها علي الهوا اون لاين )

*********

الاسرة الاولى

مش كان في نظام مقديدين بيه احرار يحني

بس مثلا هنلاحظ ان في صلاية الملك نعرمر اللي هو اسس الاسره الاولي

هنلاقي اختلاف مثلا في احجام الناس والملك بحجم كبير اكبر من مرافقيه من رجال البلاط

يعني الفنان زمان كان بيعمل كل مركز بحجمه ( بلد بتاعت شهادات صحيح )

وهنلاحظ في ان الفن في الوقت دا بيتميز بالوقار والهدوء ويميل الي الزخارف المبسطة

ويبتعد عن الزخارف المعقدة وبيفضل الخطوط المستقيمة وبيبعد عن الخطوط المنحنية

وعلي فكرا كان في حاجه المصري زمان كان دقيق فيها

وهي انكم لو بصيتو لاي حاجه منقوشه كنتو هتلاقوا حاجا شديدة البروز او شديده العمق او قليله البروز او قليله العمق

كان سبب دا هو تاكده من كفايه الضوء يعني كان بيحسبها قبل اما يعمل حاجه

ودا اللي خلا الحضاره المصريه الفرعونيه اللي عمرها اكتر من 7000 سنه موجوده لحد الان

الجزء الجاى هكتب القواعد العامة للرسم والنقش هو جاهز بس عشان مش تزهقوا مني :)

وهحاول احط صور توضيحية

اوروبا في العصور الوسطى الجزء الاول

2009-02-08T10:23:00.000-08:00

اولا بعتذر عن انقطاع التدوين في التاريخ الفرعوني

ببوست عن العصور الوسطى بس البوست هيكون اهداء لروح محمد الفرس الملثم

وياريت اي حد هيقرا كلمه عن العصور الوسطى يدعي بيها لروح محمد الطيبه

************

اه ياجماعه ملحوظه صغيره مش اني بكتب عن اوربا في الفتره دي يبقي مصر مش كان عندها حضاره بالعكس

انا بس عندي مبدا

اني ادرس اي حضاره مهما كانت

لان اكيد اللي بناها مش جاهل بالعكس له منظور وعشان كدا قدر يوصل انه يبني حضاره تتدون في كتب التاريخ

بعد اما يموت واكيد دا هيفيد للي بيقدر واللي عاوز يفهم وجهه نظري هيعرفها من المثل اللي قلته هنا

كانت كلمة العصور الوسطى بتتقال علي اخر 10 قرون بين سقوط الامبراطورية الرومانية وظهور حركة النهضة الايطاليه

يعني بين منتصف القرن الخامس والقرن الخامس عشر

بس بعد بقي اما الوقت عدي وازداد التقدم التكنولوبيا في القرن 11

فاعتبروا ان الفتره بين القرنين الخامس والحادي مرحله انتقاله من العصور القديمة الى العصور الوسطى .

وفي مؤرخين بصراحوا اجتهدوا في تحديد بدايه العصور الوسطى وحددوها من 476 م ودي السنه اللي سقطت فيها الامبراطورية في الغرب واختتموها بسنة 1453 م ( السطروقع مني وانا بكتبه ياجماعه )

يعني نفس السنة اللي سقطت فيها القسطنطينة

بس بصراحة يعني ومن الاخر مش في حد يقدر يقول السنه دي عصر قديم والسنة دي عصر جديد ورايي في ده

يعني انا النهارده عصر معاصر وبكرا بقي احداث جاريه مش ينفع

لكن اللي بيقول اننا في في عصر وسيط وعصر معاصر وخلافه مجموعه احداث حصلت وكونت عصر بصفاته ومميزاته

وعيوبه لان اي حضاره في الدنيا بتكون هرم يفضل يطلع يطلع يطلع وعند القمة لازم يبدا ينزل ويسقط

************
ماحلينا نيجي لام هند

حضارة اوروبا في العصور كانت كوكتيل كدا بين الرومان من ناحية وبين العناصر البربريه

وكانت الامبراطورية الرومانيه اعظم وحدة حضاريه وسياسية عرفا التاريخ ووصل اقصي اتساع ليه في عصر تراجان 98-117 م

كانت تمتد من المحيط الاطلسي غربا حتى الفرات شرقا.

شايفه سوال في عيون اللي بيقرا الكلام دا ليه انا قلت انها اعظم وحدة حضاريه سياسية

هقوووووووولكم

كذا حاجه اولها قوة السلطة المركزية وبيها قدرت تسيطر بيد حديدية علي كوووووول المساحات اللي في الامبراطوريه

وعلي الشعوب رغم تباين حضارتها زي المصريين واليونانين والغاليين والجرمان

تاني حاجه بقي البحر المتوسط ساعدها بشكل رهيب في ربط كوول اجزاء الامبراطورية

كمان الانهار الداخليه ربطت اطراف الولايات وكمان الطرق المعبدة اشتهرت بيها حضارة الرومان

وووووووووووووووووو اشوفكم بقي في الجزء الجاي عشان نكمل بقيت الحوكاية :)

العلوم الرياضية والهندسية

2008-12-29T10:27:00.001-08:00

العلوم الرياضية والهندسية

كانت للعلوم الرياضية والهندسية اهمية علمية

وقد وصلت لايدي الباحثين بعض البرديات الرياضية من اهمها بردية ريند الرياضية

التي ترجع الي عهد احمس مؤسس الاسرة ال 18

وقد اشار كاتبها الي انه نقلها ع اصل اقدم

يعود الي الدولة الوسطى مما يعني ان اصول النهضة في العلوم الرياضية

والهندسية ترجع الي زمن اقدم

********

طب ايه هي اهمية الرياضة بالنسبة للحياه في مصر القديمة

من البرديات التي تم اكتشافها وجد انه كان يستهدف من هذه العلوم

غرض عملي من اغراض الحياه اليوميه مثل

تقسيم الأجور علي فرق العمال او تحديد مساحة ارض زراعية

او سعة شونة غلال وغير ذلك

ويبدو ان تدريس العلوم الرياضية والهندسية كان يتبع طرقاُ نظرية

وعملية اذ يذكر افلاطون ان المصريين اتخذوا وسائل الايضاح

في تدريس هذه العلوم ولكن بدون أن يقدم الدليل علي ذلك .

********

العمليات الحسابية

قد عرف المصري في الحساب عمليات الجمع والطرح والضرب والقسمه

وليس مابين ماعثر عليه من تمارين مايشير الي تناول كل نوع علي حدة

ولقد اتبع في ذلك طرقا مطولة وبطيئة وساذجة ،

كثيرا ماتكشف عن عقلية مادية ( راي بعض الباحثين)

علي ذلك فلكي يعبر عن المسألة " ماهو حاصل ضرب 8*5 "

كان يربط العدد ثمانية بشئ محسوس فيقول ثمان اقداح تتكرر خمس مرات

فيصل الي النتيجة باحتساب تكرار العدد ثمانية من مرة واحدة الي خمس مرات

اما في حالة القسمة فانه يتسال عن مقدار الذي اذا ضرب في المقسوم

عليه ينتج العدد المقسوم

اي انه كان يصل الي خارج القسمة بضرب المقسوم علية في اعداد صغيرة

محاولا الوصول الي خارج القسمة من جمع الارقام الصغيرة التي تقابل في المجموع

العدد المقسوم وعقب ذلك عرف المصري الكسور وضربها وقسمتها وقد ثبت وجود

جداول ذلك عرف المصري الكسور وضربها وقسمتها وقد ثبت وجود جداول لتيسير

الدراسة مستهدفة تبسيط الكسور الي كسور بسطها الواحد الصحيح عند اجراء

عمليات الجمع او الضرب او القسمة وهو مايتضح من بردية ريند الرياضية

(كراسة احمس)

المسائل الرياضية التي لا تحتوي علي افكار مادية

يري بعض الباحثين ان يوجد بعض المسائل كساها الخيال وجعلها مسائل نظرية

تعليمية بل ان هناك امثلة لمسائل خلت تماما من التعبيرات المادية واعتمدت علي

الارقام وحدها ونستشهد هنا بتمرين اتصف بطرافه الموضوع ويشهد بجهد المعلم

في الصياغة وان كانت قد صبغت بصبغة علمية يقول التمرين

حدث ان اتي الراعي بسبعين ثورا الي عداد الماشية الذي قال له ما اقل

الثيران التي جلبتها ؟ اين اذن بقية ثيرانك العديد فقال له الراعي ان ما احضرته لك

هو ثلثين من ثلث الماشية التي عهدت الي بها فاذا حسبت لي وجدتني كاملا

التمرين يقوم علي صور واقعية تتمثل في التعداد وعملية المحاسبة

اما ائتمان العداد للراعي علي 315 ثورا ( وهي نتيجة التمرين )

واجابته الملتوية فكلاهما موضوع خيالي من غير شك .

تقدير مساحات الاشكال الهندسية المختلفة :

وقد توصل المصري الي تقدير مساحات الاشكال الهندسية المختلفة

وهو مايتضح من كراسات التلاميذ التي اشتملت علي تمارين لايجاد مساحات

المستطيل والمثلث الناقص وسطح نصف الدائرة واستخراج الابعاد

بالنسبة لمساحة المثلث الناقص

فكانت تحسب علي اساس نفس النظرية الحالية

أي : القاعدة السفلي + القاعدة العليا * الارتفاع ثم قسمة الناتج علي 2

ويتضح هذا في المسألة الاتية : لو قيل لك (مثلث) ناقص من الارض ارتفاعه 20 خت

وقاعدتة 6 خت والجزء المقطوع ( اي القاعدة العليا ) 4 خت فما مساحته ؟ بالنسبة

لمساحه المثلث نستشهد بمسألة يقول راسها ما مساحة مثلث ارتفاعه العمودي

10 خت وقاعدته 4 خت ؟ الحل هو ان نأخذ نصف الابعة ( اي 2 ) لايجاد مستطيلة ثم

نضرب 10*2 وهذه هي مساحته اي ان مساحه المثلث

تساوي القاعده في الارتفاع علي 2

معرفة المصري بالمكاييل والموازيين

قد عرف المصري وحدات مختلفة للقياس وللوزن وللكيل

كما عرف اجزاء ومضاعفات هذه الوحدات

فمثلا كان من وحدات القياس الذراع ويساوي حوالي 60 سنتيمترا

( حوالي 523 ملليمترا ) وكان يقسم 7 قبضات اما القبضه فتساوي 4 اصابع اما

مضاعفات الذراع فهي الخت اي القبضه وتساوي عشرة اذرع اما الاطوال

فوحدتها إترو ويبلغ حوالي كيلو مترين

وفي المساحات هناك ال سثات ( الارورا)

ويبلغ ضلعها حوالي مائة زراع اي حوالي 2/3 فدان واجزاؤها ال

رمن نص سثات ومضاعفتها ال خا وتعادل 10 سثات وهناك كذلك ال مح

وهي مساحة يبلغ طولها مائه ذراع وعرضها ذراع واحد

اما الموازين فكانت من الحجر او المعادن ووحدتها ال دبن

وزنته 91 جراما وجزؤه 1/10 دبن ويسمي قدت

اما وحده الكيل فهي ال حقات حوالي 4.785 لتر

ولها اجزاؤها 1/2 ، 1/4 ، 1/8 ,1/16 , 1/32 ، 1/64 ولها

مضاعفتها 25 ، 50 ، 100 ، 200

اما وحدة كيل السوائل فهي ال هنو ويعادل 1/20 من الحقات ( او 0.46 من اللتر )

يوووووووووووووووووه شكلي دوشتكم سلام بقي ونلتقي المره القادمه

في الفن والنقوش والنحت والعماااارة

الطب في مصر القديمه

2008-12-08T12:35:00.000-08:00

اولا اسفه علي التاخير اعتذارتي كترت انا عارفه

ثانيا المفروض كنت انزل بوست الرياضه الاول بس انا بدور علي الورق كل ده ومش لاقياه

هستني لما الدنيا تروق عشان اعرف ادور براحتي ندخل في البوست

**********

طبعا ومن غير مااقول الطب ايه مكانته

فهو كان له اهميه كبيره اوي في مصر القديمه

لدرجه ان ذكر في الاوديسا ان مصر بلد الاطباء احكم اهل العالم

**********
ارتبط الطب بالعديد من الالهه الحامية ....

فقد عرف ايزيس براعتها في السحر والطب

فقد عالجت حورس من جراحه وشفت رع من الم بالرأس

كما ان تحوت اله الاطباء والكتبه نسب الية اليونان اختراع الطب والصيدله

وسخمت كانت راعيه للاطباء والجراحين

*******

اشهر مدارس الطب في مصر

كان للطب مدارس خاصه ملحقة بالمعابد

اشهرهم هما مدرسة عين شمس وصا الحجر ومنف

وكان الاطباء يترددون علي مدرسة منف حتي ايام الطبيب جالينوس في القرن الثاني الميلادي

ومن الاطباء اثوثيس كان طبيبا ووضع كتبا في الطب ظلت موجوده حتي ايام مانيتون اي بعد تاليفها بحوالي 2800 سنه

**********

طيب دلوقتي عرفنا المدارس والاله الخاصه بالطب طيب نيجي بقي نشوف التخصصات اللي كانت عندهم

هي بالتاكيد مش ذي دلوقتي بس تعالوا نشوف

وصل لايدي الباحثين برديات طبيه توضح ان مصر عرفت عده فئات

من الاطباء كما تدلل علي وجود تخصصات دقيقه بين هؤلاء الاطباء

كان يوجد الطبيب البشري والطبيب البيطري والطبيب الكاهن او الساحر ( وده كان بيستخدم السحر كنوع من انواع الايحاء النفسي للشفاء )

والطبيب العالم ومع ذلك كان فيه اطباء بتجمع بين البشري والبيطري والكاهن والعالم في ان واحد

**********

وكان طريقه العلاج زمان زي دلوقتي الطبيب بيشخص المرض وبيعرف الداء وبيصف الدواء للمريض

اللي احيانا بيكون جراحه كانت بتعتمد علي المهاره اللي هي ثمره التجربه والخبره ودراسه وظائف الاعضاء

واحيانا بيكون رقي وتعاويذ سحريه

واحيانا بيكون عقاقير مختلفه اغلبها من مواد نباتيه والقليل من اصول حيوانيه ومعدنيه

وتم التعرف علي بعض هذه العقاقير ولم يتم اكتشاف البعض الاخر

العقاقير النباتيه ( الجميز والخروع والخس والخشخاش والرمان والحلبة )

القاقير الحيوانيه ( الكبد والمراره والدهون )

وكان الاطباء يعدون العقاقير بانفسهم ونادرا ماكانوا يسجلون وصفاتهم الطبيه في تذاكر طبيه يقدمونها للمرضي

***************

تم العثور علي برديه ايبرس الطبيه وورد بها وصفه لعلاج دودة الاسكارس التي اسموها "شعد حفات"

كان الدواء عباره عن نبات ايسو يخلط بنسبه 1/64 مع نبات شامس بنسبه 1/4 ويعجن الخليط بعسل النحل

ثم يؤكل مع ترتيل التعويذه الاتيه "فكت الاثقال وذهب التعب "

وتكشف هذه البرديه وغيرها من البرديات الطبيه بالاضافه الي الفحوص التي اجريت علي المومياوات

عن ان المصري قد شخص وعالج الكثير من الامراض

* الباطنية والنسائيه والجلدية

*واحاط علما بامراض الاسنان والعيون وامراض العظام

* وبعض العمليات الجراحية

*وكان لديه خبرة بوظائف الاعضاء والتشريح

تلك الخبرة التي اكتسبها بفضل معرفته للتحنيط

كمان لما كنت بزور المتحف كنت شفت لوحه مرسوم عليها احدي العمليات الجراحيه لاحد السيدات

انا عارفه ان البوست دسم شويه بس والله حاولت ابسط معلوماته علي قد ماقدرت

الادب

2008-10-24T22:57:00.000-07:00

اولا بعتذر عن تاخري في البوست ده

ثانيا اديني هنزل الادب اهوووو

زي ما انتوا طلبتوا مني في البوست الاخير

عشان محدش يقول انهم مش كانو مؤدبين

بس الاول احب اقول ان مهما توصلنا من نتاج ادبي للقدماء المصرين

فهو يعتبر قليل جدا رغم انه اللي اكتشف كثير

كاي نتاج ادبي في اي عصر لازم نلاقي فيه القيم واللي مش له قيمه

وده مبدا اكيد متفقين عليه

يالهووووووي عليا رغايه

انا هدخل في الموضوع اهو

الاول كاي ادب لازم عشان افهمه اكون اعرف لغته ومش مجرد معرفه

وبس لا

لازم اكون جيده جدا فيها

اولا عشان اقدر اترجم صح

ثانيا ودي الاهم عشان احس بروح الكاتب وباللي كاتبه

مش يبقي الكلام بارد وهش ومن غير احساس

وده نفسي اوصله بس انا متوقفه عن مذاكره الهيروغليفي بقالي فتره

*******

سمات الادب المصري القديم

- يتميز بضخامه تاثيره الديني شانه شان كل الاداب القديمة

- تكرار في الاهداف بهدف ترسيخ المعني الذي كان يهدف اليه اصحابه

عدم وجود التخصص في غرض القطعه الادبيه الواحده

- الكثير من ادبنا الشعبي الحديث يرجع في اصله الي الادب المصري القديم

وكثيرا مانجد ان التشابه شديد بين قصصنا الشعبي الحديث وبين القصص في الدوله الوسطي

يعني مثلا قصة الملاح الغريق تشبه احدي قصص السندباد البحري

******

قصة الملاح الغريق

كان في ملاح راحل في بعثه تجاريه فكسر قاربه وتعلق بقطعه من الخشب ووصل الي جزيره خاليه من السكان فيما عدا حية ضخمه حملته الي المكان الذي كانت تعيش فيه وقد جاء في القصه ان هذه الحيه كانت الهه الجزيره وقد اخبرته بانها هي الاخري قد نجت وحدها من شهاب سقط علي الجزيره فاحرق كل اقاربها واخواتها ويسترسل في قصته فيذكر انه عاش لفتره علي هذه الجزيره الي ان جاء قارب حمله الي مصر وهو محمل بهدايا كثيره من الجزيره وبعد ان صعد الي القارب الذي اخذه الي مصر فؤجي باختفاء الجزيره

********

وبرده في قصص بتعبر عن سؤ الحاله السياسيه او حدوث بعض الاحداث التاريخيه الهامه مثل قصه الفلاح الفصيح ودي كانت بتقول ان بعض الحكام مستبدين وطغاه

بس الملاحظ ان الامراء والملك كانو بيحبو اوي الادب الجيد وتعمدوا اهمال هذا الفلاح كي يكثر من شكواه ويستمعوا الي كلامه الجيد لكن في الاخر الملك رد له حقه

********

وعندنا مثلا قصه سنوهي اللي بتوضح انه فر من مصر بس مش وضحت القصه السبب ومن السياق اللي في القصه نلاحظ انه كان عنصر مناؤي لسنوسرت الاول حينما كان وليا للعهد فلما تولي الحكم خشي سنوهي علي نفسه وفر الي فلسطين ويبين ذلك مقدار ماكان يحدث في البلاط من مؤمرات ودسائس

وكمان نستشف من كرم بدو فلسطين لسنوهي بيدل علي ان البدو كانوا يكنون الاحترام للمصرين ولحضارتهم

*******

مثلا قصة خوفو الساحر ظهر فيها الخيال بشكل واضح الا انها تعكس صورة من احداث التاريخ في العصور القديمة

فهي تشير الي ان ملوكا من سلاله رع سيعتلون العرش بعد ان يحكم خوفو وولده وحفيده وهذه القصه تدل علي ان الملك قد انتقل من الاسرة الرابعه الي ملوك الاسرة الخامسه الذين كانو ينتمون الي اصل غير ملكي

******

مثلا قصه الامير ذو المصير المحتوم

تحكي ان ملكا لا ينجب ابناء فطلب من الالهه ان تمنحه ولدا فاستجاب لدعائه ولكن كان مقدرا لهذا الامير ان يموت بلدغة ثعبان او يفترسه تمساح او كلب وتوضح كيف نجا الامير من التمساح

وعااااااااااااااااااااااااااااا

القصه هنا مش اكتملت عشان البرديه كانت تالفه وكان نفسي اعرف الباقي بقي

عاااااااااااااااااا

*******

ولم يتناول الادب المصري القصص والاساطير بس لا احنا كمان هنلاقيه متنوع

هنلاقي النقد مثل تاملات ايبوور وفيه الحكم مثل نصائح بتاح وحوتب وكاجمني وآني وامنموبي وفيه الاغاني والاناشيد الدينيه وغير الدينيه واناشيد النصر والملاحم لتحوتمس التالت وسنوسرت التالت ورمسيس التاني ومرنبتاح

واغاني الشراب والغزل وغير ذلك .

********

بعتذر عن ان اسلوبي مش زي اما اتعودتو ويمكن ده لاني نفسيا مش مظبوطه

حاولت ادخل روح خفيفه عشان الكلام يتقبل بس انا عارفه اني فشلت

البوست الجاي هتكلم عن العلوم الرياضيه والهندسيه

تنويه هام

2008-09-23T12:17:00.000-07:00

في البدايه.. التنويه ده انا مش كنت ناويه اكتبه اواني اكتب مصادري الا في اخر بوست في الحضارة الفرعونية

لكن في كذا كومنت جالي في بوستات سابقه هي اللي خلتني اكتب التنويه ده

في البدايه يوم اما فكرت اني اعمل المدونة دي هو كذا هدف

اولا: عشقي للتاريخ

ثانيا : عشان اخلي الناس تحب التاريخ

وعشان فعلا احببهم فيهم عمري ما أكتب المعلومة وش كده بدون ادخال الهزل والاسلوب اللي بكتب فيه

كثير قال ان لو كان كتب التاريخ كده كان الطلاب نجحوا وجابو درجات عاليه

وانا في يوم كنت بزاكر لحد التاريخ بتاع الثانوية العامه قلتله في الاول

فايده التاريخ ايه قالي دش ووجع دماغ وهروب من الحاضر ليه

قلتله ايه الفرق بينا احنا كانسان وبين الحيوان قالي العقل

قلتله تمام دلوقتي انت تخيل انك مزارع وعندك حمار حفظته طريق انه يروح غيطك وبعدها البيت بتاعك لوحدك

قالي اه

قلتله الحمار ده مات واشتريت واحد جديد

هل هيتعلم جديد عن اللي قبله بمعني (هيبقي عارف الطريق من غير ماتقولهوله ويكمل بقي حفظ مكان المطحن ولا تبدا تعلمه من اول وجديد)

قالي بعلمه من اول وجديد لانه مش هيكون عارف اللي اتعلمه الحمار اللي قبله وبعدها سكت للحظات

قلتله وصل هدفي

قالي انتي تقصدي ان الانسان الذكي لازم مش يكون زي الحمار يبدا من اول وجديد

ياخد اللي قبله وصله ويزود عليه تطور جديد عشان يتقدم صح

قلتله بالضبط ناخد اللي وصله قبلنا والا هنفضل طول حياتنا منعرفش الا حاجات بسيطه جدا ومفيش اي تطور

نرجع لكلامي وعشان اوصل الناس لانها تحب التاريخ

مش هكتب بوست دسم فيها كافه المعلومات انا مصادري 15 كتاب غير الملحوظات اللي كنت بدونها في النوته الخاصه بيا وانا بزور اي مكان سياحي

********
دلوقتي هكتب المراجع

-احمد بدوي : في موكب الشمس

- احمد فخري : مصر الفرعونية

-ادولف ارمان وهرمان رانكه : مصر والحياه المصرية في العصور القديمة

آالن جاردنر : مصر الفراعنة

تاريخ الحضاره المصريه : العصر الفرعوني ,المجلد الاول

جون ولسون : الحضارة المصرية

رشيد الناضوري : جنوب غربي اسيا وشمال افريقيا

رمضان السيد : تاريخ مصر القديمة

عبدالعزيز صالح : حضاره مصر القديمة واثارها

محمد ابراهيم بكر : من تاريخ مصر القديم

محمد ابو المحاسن عصفور : معالم حضارات الشرق الادني القديم

الموسوعة المصرية : المجلد الاول وده اصدرته وزاره الثقافة

والتر امري : مصر في العصر العتيق

w.b.Emery: Egypt and nubia

W,B smith :The Art and Architecture

H,Kees:Ancient Egypt

بالاضافه طبعا للي متسجل في النوته الخاصه بيا

ودي فيها معلومات مجمعاها من اي موتمر حضرته ومحاضرات ومناطق سياحيه زرتها

*******

البوست الجاي ان شاء الله واتكتب اني اكمل المدونه بنفس النهج ومش اغلقها ويكون ده اخر بوست فيها

هيكون المسابقه + الحياه الادبيه

لكن بنسبه كبيره هتتقفل

تحياتي

كيارا

حضاره مصر الفرعونيه الجزء السادس

2008-09-17T11:53:00.000-07:00

وسائل المواصلات

طبعا البت انا ودماغي في الموضوع اللي فات قالتلي هتطلع اوشاعه انهم كانو بياخدوها

كعاااااااااابي وانا قلت لااااااااا بلاش اوشاعات حراااااام عاااااااااا والبوست اهو بكتبه عشان

الاوشاعات واخده بالك ياللي في بالي ...

وسائل المواصلات في اي عصر لما بنتكلم عنها او لما حد يقول رايح المكان الفولاني مسافر

مثلا اي حاجه اول سوال بيجي في الانفوخي ايه هتاخدها بري ولا بحري ولا جوي

احنا بقي هنا مش هنتكلم عن الجوي لان مكنش فيه جوي لكن هتكلم عن النهري والبحري

والبري

نبدا كدا بالصلاه عللي النبي (صلوا عليه مش تتطنشوا )وش بيغمز

اولا: النقل النهري والبحري

نهر النيل كان المصريون بيتنقلوا فيه عن طريق زوارق صغيره من سيقان البردي سفتوا

البردي كان مهم ازاي بالنسبه ليهم

طيب والسفن الكبيره بيعملوها ازاي هقولكم

كانت بتتصنع من الخشب وتزود بمجاديف وبشراع مربع الشكل او مستطيل

وتتطورت صناعه السفن واختلفت اشكالها وكان ارتفاعها في مقدمتها كارتفاعها في مؤخرتها

في الدوله القديمه كانت السفن بتختلف في الاشكال والاغراض التي تستعمل من اجلها

منها السفن العريضه وسفن تجرها غيرا

اما السفن الفخمه كانت ليها قمره عريضه لا يسمح معها بوجود الشراع وكذلك لم تكن سفن

الشحن مزوده بقمرات حيث كان يستخدم كل فراغ فيها للمنقولات وكانت هناك مراكب الشحن

الكبيره التي تنقل الاثقال الضخمه وكانت بلا مجاديف او شراع وكان يجرها الرجال او تجرها

سفن اخري ومن امثله هذه السفن المعده للنقل كانت تنقل الاحجار في كافه عصور التاريخ

وقد تطورت السفن في اشكالها تطورا عظيما في عهد الدولتين الوسطي والحديثه وزخرفت

بكثير من الزخارف وخاصه سفن الرحلات والحملات البحريه التي تميزت عن سفن النيل في

بنائها نظرا لما كانت تتعرض له في اسفارها الطويله وقد اشارت بعض الاساطير والقصص

الادبيه القديمه الي ماكان يتعرض له المسافرين في البحر من مخاطر مثال علي ذلك قصه

الملاح الغريق .

المواصلات البريه

كانت اقل شاناً من مواصلات النهر لانها لم تكن في الدوله القديمه وسيله مجديه او اقتصاديه

في نقل البضائع الكبيره الحجم والعظيمه الوزن ولهذا ظلت دون تطور فقد استخدم الاشراف

محفات (حلوه محفات دي استنوا استنوا هقلوكوا هي ايه ) عباره عن مقاعد يمكن حملها

والشريف جالس فيها وكانت تزود احيانا بمظله وكانت هذه المحفه توضع علي حمارين

متجاورين او يحملها بعض الرجال (اعتقد شوفتوها في بعض الحفلات الفرعونيه بتاعه كده

من الذهب وبيقعد عليها الشخص ويفضلوا ماشيين بيه بقي).

نيجي للحمار كان هو احسن وسائل النقل الشعبيه ومع ذلك لم يمثل المصري وهو يركب

الحمار ولكن نشاهده في النقوش ينقل الحاصلات الزراعيه وغيرها من المنقولات

اما في الدوله الحديثه ابطلت المحفه والحمار ولكنها ظلت تستخدم في الحفلات والمناسبات

الخاصه فقط واستخدموا مكانها المركبات لكن لم يستعمل الحصان وحده الا في بعض الحالات

الضروريه الملحه كالفرار من معركه حربيه او لمهمه سريعه كطلب نجده او غيرها

وكانت تستخدم ايضا عربات ضخمه تجرها ثيران لنقل الزواد والامتعه لعمال المناجم اما

المركبات كانت غالبا للسفر والصيد والحرب المصري لم يكن كثير التنقل فكانت رحلاته

مقتصره علي نطاق ضيق فكان كل اقليم يتصل بجيرانه مباشره اي ان الاتصال لم يكن نشيطا

الا بين الاقاليم المتجاوره والمصري لم يتصل بالاقطار الاجنبيه الا للحصول علي سلعها

المختلفه اي ان هذا الاتصال حددته عوامل سياسيه واقتصاديه مختلفه فنري الاتصال

بالرسائل والمكاتبات اكثر نشاطا ولبعد المسافه وجد هناك طائفه من الرسل كانوا في خدمه

الخاصه من الشعب وكان هؤلاء الرسل عاده يحملون بض الهدايا والسلع الخفيفه

كده انا خلصت الحياه الاقتصااااادية كووووووولها كيكيكيكيكيكيك

البوست الجاي مش عارفه اكلم عن ايه تحبوا انت اتكلم عن الحياه العسكريه ولا الاداره ولا

الناحيه الدينيه ولا الادبيه اقترحوا انتوا بس البوست الجاي هيحتاج وقت شويه في التجهيز

بس اقترحوا عشان ابدا اعمله

حضارة مصر الفرعونيه الجزء الخامس

2008-09-05T08:01:00.000-07:00

باقي الحياه الاقتصاديه

الاول انا نزلت عن الحياه الاقتصاديه (الزراعه وتربيه المواشي والصناعه)

التجارة الداخلية

نيجي للجزء المهمل من الحياه الاقتصاديه وهو التجارة

شايفكوا بتقولوا مهمل ليه وبتقارنو كلمه تجارة بالعصر الحالي انها اساس

للحياه الاقتصاديه

هقول لان بعض الاثريين زعم ان التجاره لم تذكر في النصوص المصريه.

طيب ليه انا قلت انه زعم عشان التاتي :

1- احنا عارفين ان الرحاله في الدوله القديمه كانوا يذهبون الي النوبه للتبادل التجاري

2- قصه الملاح الغريق في منكم اكيد يعرفها عشان كانت رحلته للتجارة

3- قصه الملاح الفصيح بتدل علي انه كان بيتاجر ببعض السلع من وادي النطرون

4- رحله بونت اللي كانت في عهد الملكه حتشبسوت كانت رحله تجاريه قامت بها بعثه ملكيه

يبقي ازاي بقي متزكرتش في النصوص ولا انتوا ايه رايكو

نكمل كلامنا يلا بس خلو بالكو مش معني كلامي ان التجارة كان ليها كيان واضح وبارز في النصوص المصريه القديمه كانت ضعيفه برده

نكمل بقي

كان التبادل التجاري في الاسواق المحلية يتم عن طريق المقايضه وتشير لنا نقوش الدولة القديمه الي قيام السوق الذي تدور المعاملة فيه علي المبادلة والمقايضه حيث كان الفلاح يتبادل الحبوب بالبيض او الطيور او الحلي ..... الخ مع فلاح اخر .

ومنذ قيام الدولة الحديثه اتسع نطاق الاسواق والمقايضه فشملت بعض البضائع المستوردة خاصه في المواني الكبيره بجوار رسو السفن وكانت الوحده التي تقوم علي اساسها المقايضه هي "وبن" وهي تساوي 91 جرام من النحاس.

كده انا خلصت كلامي عن التجارة الداخليه

طيب ماتيجو نشوف التجاره الخارجيه كان ايه نظامها

في عهد الدولة الوسطي توطدت العلاقات بين مصر والبلاد الاخري كسوريا والنوبه وليبيا .

وفي عهد الدولة الحديثه اخذت الاساطيل البحريه تجوب البحرين وتعود بسلع ومواد لم تكن معروفه من قبل .

فقد اتي المصري القديم بالقردة والعاج وخشب الابنوس وجلود الفهود من النوبه ,وخشب الارز من لبنان ،والبخور من بلاد بونت ، والكحل والعطور من فلسطين وغيرها من سلع البلاد الاخري .

وعلي فكره التجارة الخارجيه ماثرتش علي الحياة المصريه بس لا دي اثرت في باقي الاقطار الاخري

حيث بدات التجارة المصريه ومصنوعاتها تنتقل الي البلاد الاخري وبدات الشعوب الاخري التي اتصلت بمصر تأخذ من حضارتها وتتطبع بالطابع المصري

وقد ادت هذه التنقلات التجارية بالطبع الي التبادل التجاري والحضاري بين مصر وهذه الدول.

وبكده خلصت الجزء وموعدنا مع الجزء القادم عن وسائل المواصلات الله هما كانو بياخدوها كعابي ولا ايه

حضاره مصر الفرعونيه الجزء الرابع

2008-08-20T16:01:00.000-07:00

تابع الحاله الاقتصاديه

هنتكلم دلوقتي عن حاله الصانع المصري

كان الصانع حالته زي الفلاح حالته بائسه برده وان كانت حاله الصانع تدعو الي السخريه

فقال احد شعراء الدوله الوسطي عن صناع المعادن

ان الحداد لا يوفد كسفير لبلاده ولا يؤدي الصانع رساله ،كذلك وصف الحداد بانه يقف بجانب موقده واصابعه مثل جلد

التمساح ورائحته انتن من بيض السمك

اما النجار فهو مرهق في عمله دائم العناء

انا بكده عرضت وجهه نظر في العامل المصري

لكن انا شايفه انها نظره غير عادله خالص ده صناعتهم ونتاج عملهم لحد الان العالم كله مبهور بيها ومعني كده ان منتجات

العامل المصري عملها بشغف وحب ومكنش مجبور عليها

لاني اعتقد انه لو كان كاره العمل ده مكنش اخرج ايات في الصنع تعيش لالاف السنين

ده احنا لو لاحظنا اننا هنلاقي مصنوعات للعمال المصريين يعجز العامل الحديث عن صنعها

برغم الامكانيات المهوله اللي عنده

نيجي بقي للمواد الخام

وكانت المواد الخام نتيجه البيئه المحليه او مما يستورده من البيئات المجاوره ولو تاملنا كده هنلاقي ان اهم المواد الخام هي

البردي

كانت له استعمالات عديده ودخل في صناعات كثيره من ذلك ان سيقان البردي استخدمت في بناء الاكواخ وعمل القوارب والحصر

والسلال والحبال والنعال وكمان كانت سيقان البرده تجمع في حزم لتقوم مقام الاعمده عند تسقيف المنازل او عند رفع تعريشاتها

الخفيفه او لتقويه الجدران و استخدم كمان في عمل صحف الكتابه وايضا كانت زهره البردي تعتبر رمز للوجه البحري

الكتان

وجد في مصر منذ اقدم العصور بالنسبه لكثره المستنقعات وجادت زراعته لوفره المياه وقد استعمل في انواع مختلفه من النسيج منها

الخشن والرقيق والشفاف حيث نهضت صناعه الغزل والنسيج منذ اقدم العصور

كان الرجال يحترفون هذه الصناعه في معظم الاحوال وكانت النساء يقمن بها في المناسج العامه او يقمن بعمليه الغزل والنسيج

كعمل خاص يقمن به في منازلهم

وكانت الانوال المستعمله تتطور بتطور الزمن

ففي الدوله الوسطي

كانت ساذجه والعمل عليها مرهقا لانها تحتم علي النساج الجوس في هيئه القرفصاء

اما الدوله الحديثه

كانت الانوال من النوع المركب التي اتاحت شيئا من الراحه للصانع الذي يقوم بالعمل عليها

وتمثل علي جدران مقابر بني حسن وطيبه مناظر تمثل زراعه الكتان

وكانت الالهه نيت هي الهه النسيج

نيجي لمراحل الكتان

1/ جمع سيقان هذا النبات

2/تمشيطها بعد التجفيف

3/تغلي السيقان ليلين لحاؤها

4/تطرق بعد ذلك لازاله هذا اللحاء

5/ تندي الالياف بالماء

6/ تفتل بمغزل

وبعد غزل الكتان تؤخذ خيوطه للانوال لنسجه

الجلود

استخدمت الجلود في الصناعه منذ اقدم العصور وكانت الجلود المستعمله لاينزع عنها شعرهاالجميل مثل

جلود الفهود او الحيوانات التي كان جلدها اقرب الي الفراء مثل بعض انواع القرود التي يؤتي بها من بلاد بونت

استخدامات الجلود

استخدمت في عمل الملابس وكان الجلد يصبغ غالبا باللون الاحمر واحيانا اصفر او اخضر

واستخدمت في صناعه التروس والجعاب وعلب المرايا وصناعه اغطيه الراس والنعال والاحزمه والمقاعد

وقرب الماء وارضيه العربات والقفازات (مثل قفاز توت عنخ امون)

الاخشاب

لم تعرف مصر الانواع الجيده من الاخشاب حتي ان بعض الانواع المتوسطه كان يحافظ عليها بشده

واهم الانواع التي كانت شائعه في مصر هي الجميز زالدوم والاثل والسنط والنبق والصفصاف وكلها انواع غير جيده

اما الاخشاب الجيده فكانت تستورد من الخارج مثل الارز الذي كان يجلب من لبنان

اما البلوط والصنوبر فكان يجلب من سوريا واسيا الصغري وجنوب اوروبا

والابنوس من النوبه وبلاد بونت

النجار

من اهم الصناع في مصر يستعمل ادوات بسيطه من النحاس اوالبرونز يستعين في تثبيت اجزائها بسيور من الجلد مثل القادوم

والمنشار والازميل والمثقاب والمسحاه (الفاره)

شوفوا بقي اد ايه ادوات بسيطه وطلعت صناعات محدش عرف يطلعها باحدث اجهزه

وقد تمكن النجار من عمل المراكب والمركبات واجزاء المنازل والاثاث والاسلحه والتوابيت المطعمه بالعاج والابنوس وغير ذلك

واننا نجدان المراكب مقوسه من الطرفين

وقد توصل المصري الي تقويس الخشب بطريقه بسيطه للغايه

يضع عامود اسطوانيا في وسط القارب ينتهي من اعلي بفرعين يثبت بينهما حبل ويوصل طرف كل فرع بطرف القارب المقابل

له ثم توضع عصا في الحبل الوصل بين الطرفين وباداره العصا تضيق المسافه بين الفرعين وبالتالي يشد طرفاهما

طرفي القارب نحو الداخل

الفخار

ان حياه الاستقرار تطلبت ان يقوم الانسان بحفظ حاجياته وكان المصري محظوظا في بيئته لان النيل كان يجلب

الطمي في كل عام

فصنع منه الاواني اللازمه لحفظ اطعمته وكان يصنع تلك الاواني من الطمي دون حرقه

ويبدو ان صناعه الفخار في مصر لم تتاثر بمؤثرات خارجيه كثيره

تعالو نشوف مراحل صنع الفخار

عجن الطين

التعديل باضافه التبن والروث رالي ان يتماسك

تشكيل الاواني

التجفيف

التكسيه والصقل والتلميع

صهر المعادن

قد عرف النحاس والبرونز منذ اقدم العصور وسيناء هي المورد الذي جاء منه النحاس والبرونز

كان اكثر استعمالا لصلابته

وعرف المصري خلط المعادن

نحاس + صفيح=برونز

فضه+دهب= الكتروم

نحاس احمر+زنك=نحاس اصفر

ومن انواع الدهب(دهب مياه -دهب جبال -دهب بلاد النوبه)

كان يقسمه المصري حسب المورد

وقد بلغ اهتمام المصري بالدهب ان عملت التخطيطات والرسوم التي تبين موقع المناجم

نيجي بقي للحديد

كان مصدره سمائي اي من الشهب ولم يستخدم في الصناعه الا في عهد الدوله الحديثه عندما توصولو الي معرفه

طريقه استخلاصه وتشكيله وهو ساخن

وقد قصر استعماله علي رؤؤس السهام وبعض ادوات القتال واستخدم في العصر الصاوي في كثير من الاغراض

وفي صناعه الالات والادوات الزراعيه التي استعملت في الزراعه

الاحجار

استخدم المصري احجار كتريه

1- الحجر الجيري

بنيت به المعابد والمقابر والهياكل المختلفه كما نحتت منه التماثيل وصنعت منه الاوانيواللوحات وغيرها

2- الصوان

صنع الالات والاسلحه

3- المرمر

صناعه الاواني

4- الحجر الرملي

في البناء والتماثيل

5- الجرانيت

زينت به المعابد وعملت به المسلات والتماثيل والاواني وتكسيه الجدران

وبكده يبقي انتهي الجزء الرابع ونلتقي في الجزء الخامس وهتكلم فيه عن التجاره

الحضاره الفرعونيه الجزء التالت

2008-07-26T03:10:00.000-07:00

الحياه الاقتصاديه

اولا الزراعه وتربيه الحيوان

تعالو بينا نتخيل البيئه المصريه في بدايه العصور الفرعونيه يلا بينا

النهر كان متسع المجري قليل الغور لانه لم يكن قد عمق هذا المجري تماما فكانت مياه الفيضان تغمر الجانبين الي مسافات بعيده وكل ده ادي بالطبع لوجود مستنقعات وغابات شائعه خاصه في منطقه الدلتا يعني البيئه كانت في البدايه بيئه صياد وبعد كده عرف الانسان استئناس الحيوان ولما ابتدت مطالب الانسان تزيد وبقي عاجز عن الاكتفاء بالحرفتين دول (الصيد _ استئناس الحيوان)
ابتدي بقي يفكر في الزراعه وتوصل للزراعه بدأحياه الاستقرار فاخذ يقتلع الغابات ويزرع مكانها وطبعا تدريجيا ابتدي يستفيد من حبيب المصرييين النيل
وابتدي ينظم جهوده المشتركه ليستطيع التغلب علي مياه النهر والتحكم فيها لفائدته
ولذا كان حبيبي من اهم البواعث التي ادت الي ظهور المجتمعات المصريه المنظمه

تاليه المصريين للنيل

لان النيل هو واهب مصر الحياه وهو الذي اهلها لتكون مهدا لحضاره اغريقيه فقد اعتبره المصريون الها وتخيلوه في هيئه انسان عظيم الثديين كبير البطن ممتلئ الجسم كنايه عن الخير والبركه ويقوم بحزم وربط رمزي الوجه القبلي والبحري وكثيرا ما وحد مع غيره من الالهه
مثل اوزوريس واطلق علي هذا الاله الموحد اسم اوزير -ابيس في العصر اليوناني

مساعي الانسان بقي للاستفاده من النيل

مهما اتقال عن ان النيل وهب الحياه لمصر فبرده مكنش ده هيحصل الا بتدخل انسان للاستفاده من كل قطره
وكان التعاون ضروري جدا لتشييد السدود وشق الترع والقنوات واقامه المقاييس والسدود
وكان الفلاح يلجأ الي وسائل تعينه علي رفع الماء الي حقله وقد توصل الي هذه الوسائل منذ اقدم العصور وظل يستعملها حتي يومنا هذا
سبحان الله ناس عملت حضاره لحد الان بتفيد اجدادها الناس ديه معملتش حضاره من فراغ ناس تعبت اوي وشقيت عشان تعمل اسم وسمعه العالم كله بيتكلم عنها بعد اكتر من من سبعه الالاف سنه
يلا نكمل عشان منخرجش برا الموضوع
ومن اهم الوسائل ديه الشادوف اما الساقيه فاقدم نموذج لها يرجع للعصر الروماني
ولا زال الفلاح المصري يستخدم المحراث والفاس في اعداد الارض للزراع

وكان الجو في مصر يساعد علي اعمال الزراعه المختلفه فالجو صحو في معظم ايام السنه ،
وطبعا ده ساعد المصري لاداء عمله بنشاط

المحراث

المحراث اللي استخدمه الفلاح زمان عباره عن سكين خشبي يثبت اليه مقبضان وعريش طويل ينتهي بنير
وكانت الثيران هي التي تجر المحراث في الدوله القديمه اما في الدوله الحديثه فقد استعملت البغال

نيجي لبذر البذور

الطريقه هي هي متغيرتش كان الفلاح بيمسك سله مصنعه من البوص او القش البردي او احيانا يحملها علي كتفه بواسطه حبل ويلقي بيده البذور
ثم يسير الخراف في الحقل مره او عده مرات لتغرز الحبوب في التربه وقد استبدلت الخراف بالخنازير في الدوله الحديثه

الحصاد

اما الحصاد فكان يتم بمنجل قصير ويستعين الفلاح علي العمل بعازف للناي او احد المنشدين الذي يشجي العمال بالحانه واناشيده
وكتير بنشوف في النقوش مناظر الحقول اثناء عمليه الحصاد والعمال في اوقات راحتهم بيتاناولوا الطعام بالقرب من مكان جمع المحصول

عمليه التذريه

وكانت التذريه بمذراه ذات ثلاثه اسنان او كانت الحبوب ومايختلط بيها ترفع علي لوحات خشب قليله التقوس وكانت هذه الطريقه تقوم بيها نساء معصوبات الراس عشان يحفظوا شعرهم من الاتربه المتصاعده
وكانت الحبوب ترفع علي اللوحات الخشبيه الي اعلي ثم تترك لتسقط الحبوب في مكانها بينما تتطاير الاتربه والتبن والقش بعيدا في الهواء

وكانت باكوره الحصاد تقدم كقرابين للالهه خصوصا لربه الحصاد رننوت واله الحبوب نبري
وكان لصاحب المزرعه نصيب من المحصول المبكر لتجربته
وبعد كده يقوم الموظف المختص بكيل حبوب المحصول ويصحبه كاتب الصوامع ليسجل عدد الكيل
بالمناسبه كان شكل الصوامع عموما ذات شكل مخروطي بها فتحه في القمه وباب من اسفل وكان التخزين يتم عن طريق الفتحه العليا
اما الاستهلاك فكان عن طريق الباب السفلي

تعالو نعرف بعض انواع الحبوب اللي كانوا يعرفوها

القمح والشوفان و سخت و العدس والفول والحمص والترمس والذره الرفيعه والكتان و الشعير وانواع عديده من الخضروات والفاكهه كالخيار والشمام والعنب والبصل والكرات والليمون وغيرها

الحيوانات بالنسبه للفلاح

كان المصري بيحب الحيوانات الاليفه خاصه اللي بتساعده في عمله
مثل الثيران والبقر والكبش والثيران لها انواع
- ذو قرون طويله تشبه القيثاره او هلاليه الشكل
- قصير القرون
-بدون قرون

تغذيه الحيوانات

كان غذاء الحيوانات المفضل لدي المصري هو التسمين
عباره عن عجين الخبز يصنع في خيوط ويطعم للحيوان
وكانت عمليه حلب البقر من الامور الصعبه فلم تقم بها النساء بل كان يقوم بها الرجال

تعالو نشوف حياه الراعي

كانوا خشنو المظهر يظهرون كانصاف متوحشين لبعدهم عن المدينه وكانوا يمثلون عراه او بنقبه غريبه الشكل من النوع القديم المصنوع من القش المضغوط وكانوا معروفين بالمهاره في الاعمال الخاصه بالفلاحه والمتعلقه بهامثل صنع القوارب والحصر من الخوص وصيد الطيور و الاسماك
ولم يكن متاع الراعي ليتعدي قدرا كبيرا من الفخار وسله تحوي اواني صغيره وبضعه حصر من البردي يصنعها بيده
وكانوا ينتقلون بالقطعان من مكان الي اخر في مهاره غريبه وكثيرا ماكانوا يلجاون الي حمل الحيوان الرضيع فتتبعه الام ويتبع هذه بقيه القطيع

وكمان كانت بتكثر بمصر الحيوانات البريه مثل الظباء والتياتل والوعول والغزلان وكان الظبي السمين يعتبر من الاطعمه الشهيه ويمثل كقربان دائما
اما الطيور فكانت عديده منها البط والاوز والحمام والسمان الا انهم لم يعرفوا الدجاج الا في العصر الفارسي
وكانت الذ الاطعمه لدي المصري هيالاوز المشوي علي السيفود ويمثل منظر من العمارنه ام الملك تمسك اوزه مشويه بيدها تتلذذ بالتهامها
وكان للاوزه مكانه خاصه واعتبر حيوان مدللا حتي ان زوجه احد موظفي معبد امون اتخذت اوزه كحيوان مدلل تتبعها اينما ذهبت
اما الخنازير فكانت دنسه وتستخدم فقط لدرس الحبوب بدلا من الخراف
اما الحصان والنعل فلم تعرفها مصر قبل غزو الهكسوس

الحاله التي كان عليها الفلاح في مصر القديمه

رغم انه كان عماد ثروه مصر الا انه كان بائسا يستحق الرحمه والرثاء
ويبين لنا خطاب ب احد الكتاب لتلميذه مقدار ماكان يعانيه الفلاح من مراره العيش فقد جاء فيه ان المحصول كانت تاكله الدود واذا ما وضع في الاجران فان الفئران والعصافير تاتي علي معظمه وعند تسليم المحصول لا يجد الفلاح لديه مايكفي لما هو مطلوب منه فيعاقب بالضرب

وبكده ابقي خلصت الجزء التالت ونلتقي في الجزء القادم وهنتكلم برده عن الحياه الاقتصاديه بس هنتكلم عن الصناعه (الصانع - المواد الخام )

حضاره مصر الفرعونيه الجزء الثاني

2008-07-03T00:03:00.000-07:00

تابع الحياه الاجتماعيه

تعالو بينا نشوف الدور الذي كان يقوم به الابن لوالده

كان يراعي دائما ان يحمي الابن اسم والده وان يخلده فهو يشرف علي تقديم القرابين له ويحافظ علي مقبرته وابقاء اثاره وده لان المصري كان يعتقد ان زوال اسمه من النقوش هــــــــــــــلاك ابدي له ولذا هنلاقي كتير بيتعمدوا ازاله اسماء بعض السابقين للانتقام منهم
ومع ذلك مفيش امثله كثيره يفتخر فيها الابن بوالده بل ولم نجد سلسله نسب كامله الا في عصور متاخره وربما ذلك لصعوبه التعرف علي اجيال سابقه وذلك لان الشخص كثيرا ماكان يغير اسمه في بعض مراحل حياته

طيب هما اجدادنا كانوا بيربو اطفالهم ازاي يلا بينا نعرف

هي عهد لدوله القديمه
كانوا يتركوهم لحريتهم حتي سن ارابعه تقريبا وكثيرا ما تمثلهم النقوش وهم عرايا مجردين من اللباس يلعبون او يصحبون ابائهم في نزهاتهم وصيدهم اما بعد الدوله القديمه يندر ان نجد صوره الطفل مجرد من اللباس وكانوا يذهبون الي مدارس تلحق بالمعابد غالبا ولكن ابناء النبلاء وذوي النفوذ كانوا يذهبون الي مدارس البلاط حيث ينشاون مع ابناء الملك وكانت العلامه المميزه لابناء الملوك والنبلاء
خصله من الشعر اشبه بالضفيره علي جانبي الراس ومع انهم كانوا يعاملون بشي من الحزم في تربيتهم اكثر من اطفال العصر الحالي الا انهم كانوا يحظون بالكثير من اللعب التي وجدت منها نمازج في بعض المقابر ومنها انواع متقدمه في صناعتها وفكرتها كثيرا
عارفين انا شفت بنفسي بعض اللعب ديه والله جميله جدا وكمان في صور للاطفال وهي بتلعب مع اصحابها ومع والدهم صور رائعه
انا هحاول انزل الصور علي اسكانر وارفعها وانزلها بجد هتعشقوا الحضاره ديه

اما بقي عن القواعد السلوكيه

راعوا فيها انه م يجعلوا الانسان ممتازفي عمله وعلاقاته مع الاخرين وهي تحض علي التعلم والابتعاد عن الشرور وعن قرناء السوء ومن تعاليم بعض الحكماء نتبين ان السلوك في حضره العلماء كان معقدا يشوبه الكثير من التكلف ولا يكاد يختلف كثيرا عن قواعد السلوك الحاليه ومن امثله ذلك ماورد علي لسان احد الحكماء "اذادعيت الي حضره العظيم فلا تجلس الا اذا دعاك واذا دعيت الي طعام فكل مما هو امامك ولا تنظر الي ما ياكله ذلك العظيم اضحك عندما يضحك فان هذا ما يبهج قلبه وكثيرا من النصائح لقواعد السلوك التي يجب علي الشخص اتباعها

وسائل الترف

كانت الاسره تشترك في الخروج مع عميدها في رحلات صيده ولهوه فبعض النقوش تبين لنا الرجل واقفا في زورقه وهو يقوم لصيد الطيور او الاسماك في المستنقعات ومعه زوجته واولاده وقد يصحبهم قط اليف ياتي بالطيور المصابه الي القارب
اما بقي في الرحلات المحفوفه بالمخاطر فغالبا كان يقوم بها الرجال وحدهم

اما بقي عن تسليه الاسره داخل الدار

كانت بتنحصر في مشاهده رب الدار واسرته لبعض المتصارعين وهم يعرضون العابهم في مرونه وخفه ومهاره او بعض المتبارزين المسلحين بعصي قصيره ويتقون ضربات خصومهم باذرعهم الطليقه التي تحميها سيور جلديه شدت اليها وتشهد بذلك المناظر الموجوده في مقابر بني حسن بالمنيا
كذلك تشاهد الاسره عروضا لبعض الفتيات يلعبن بكرات صغيره العابا فيها مهاره او يقوموا بحركات بهلوانيه او يقمن بالرقص وهو ماكان يقوم به الرجال في بعض الاحيان

وكمان كان في طرق اخري للهو مثلا قيام بعض الصبيه بلعبه يتكهن فيها احدهم بمن يضربه وهو راكع لايري ايدي زملائه
حين يهوي احدهم علي ظهره او يشتركون في قذف اداه ذات سن مدببه علي لوحه من الخشب وكمان كانت الالعاب التي تحتاج لفكر كانت محببه اوي لديهم زي رقع الشطرنج
ولو لحظنا شويه هنلاقي ان اللعب ديه احنا لحد الان بنلعبها

وبكده ابقي خلصت الحياه الاجتماعيه وطبعا انا اختصرت فيها كتييييييييييييييييييير
ولكم موعد مني بقي مع حياتهم الاقتصاديه
هنشوف فيها ازاي بيزرعو ايه الحيوانات اللي بيستخدموها وكمان هنشوف الصناعه
يلا سلاموز بقي واشوفكم في الجزء القادم

حضاره مصر الفرعونيه 1

2008-06-25T11:33:00.000-07:00

انا هتكلم عن حضارتنا هتكلم عن اجدادنا

ازاي عاشوا ازاي تاجرو كل حاجه تخص حياتهم

حياه اجتماعيه اقتصاديه سياسيه دينيه

وهبتدي بالحياه الاجتماعيه

الحياه الاجتماعيه في مصر الفرعونيه

ان المصري في عصور ماقبل الاسرات كان يتخذ زوجه كشريكه حياه

تعاونه وتنجب له الاطفال شانه شان الانسان في كل المجتمعات البدائيه

لبسيطه فانجاب الذريه كان اهم البواعث علي الزوافي تلك المجتمعات

ويستدل علي ذلك من تماثيل السيدات التي وجدت في عصور ماقبل الاسرات

فهي عموما تماثيل السيدات متضخمات الاثدان والبطون والمقصود بذلك تمثيل الامومه وانجاب الذريه

تعالو نشوف سبب الزواج المبكر في مصر الفرعونيه:

يجمع الحكماء من مختلف عصور التاريخ في نصائحهم الموجهه

الي الابناء علي حثهم علي اتخاذ زوجه وتكوين اسره في سن مبكره كلما امكنهم ذلك

وكان ذلك ابلغ الاثر في نفوس المصريين القداء

فتاصلت لديهم عاده الحرص علي الزواج المبكر

والترغيب فيه ولا شك ان هذه العاده ترجع لاسباب تتمثل في

1_ الاستجابه للواعز الديني لدي الاب الذي يرغب في ترديد اسمه بواسطه ابنائه في الدنيا

2_ تقديم القرابين يتطلب اعداد وفيره من الايدي العامله تقوم بالانشطه الاقتصاديه وفي مقدمتها الزراعه

ومن نصائح بتاح " اتخذ لنفسك زوجه وانت شابا حتي تعطيك ابنا تقوم علي ماتراه وقد اشتد واصبح رجلا فالرجل

السعيد هو كثير الاهل فالكل يوقرونه من اجل ابنائه"

وكان يبدو ان الاحتفاظ بالزوجه لم يكن سهلا فربما كان القوي يغتصب زوجه الضعيف

ويتخذها لنفسه ولذا نجد ان الملك المتوفي يوصف في نصوص الاهرام بانه

"ياخذ النساء من ازواجهن علي حسب رغبته"

اما بقي طقوسهم في الزواج فكانت عقود قانونيه

وترجع اقدم وثيقه زواج معروفه الي عصر الاسره الثانيه والعشرين

تعالوا نعرف بقي جدودنا وكان عمرهم كام!

كان بيت زواجهم في سن مبكر جداااااااااااااااا

وكان عاده في سن 15 سنه للولد و12 سنه للبنت

والعرف ان يتزوج الشاب من داخل نطاق الاسره او القريه التي ينتمي اليها

ونعرف من نصوص الانساب الخاصه ببعض العائلات

ان الزواج كان يتم بين ابناء العم او الخال واحيانا كانت الفتاه تتزوج من خالها او عمها

وفي حالات اخري في "العصر البطلمي"كان الزواج يتم فيها من الاخوه غير الاشقاء

الذين يشتركون معا من ناحيه الاب فقط

اما زواج الاشقاء فلم يعرف كما اشاع الكتاب الاغريق

وعلي راسهم ديودور الصقلي وتابعهم في هذا بعض المؤرخين المحدثين

ويرجع ذلك اللبس الي ان المصري كان يطلق علي الزوجه او

الحبيبه لفظ "سنت"sntبمعني اخت

snبمعني اخ "سن"

ويبدو ان المصري اراد من اطلاق هذا المدلول اللفظي

ان يعبر عن قوه الرابطه التي تربطه بزوجته فجعلها كرابطه الاخوه التي لا تنفصم

وبكده يبقي الجزء الاول من الحضاره الفرعونيه خلص
ونلتقي في الجزء التاني باذن الله

ان النقل بدون ذكر الاسم حسابه عند الله

ايام زمان

2008-06-18T00:06:00.000-07:00

المدونه دي هتكون خاصه بكل مواضيع التاريخ وهتكون ابحاث وكتابات خاصه

هبدا بالحضاره الفرعونيه وعند الانتهاء منها

هبدا بسرد تاريخ مصر الفرعونيه من اسرات وبعض اثارها

بعدها هتجه للدوله اليونانيه والرومانيه ثم

الدوله الاسلاميه

ثم الحديثه

اتمني من الله ان اسير علي هذه الخطه حتي اكون قدمت جزء بسيط مما تعلمته